ශ්‍රී ලාංකිකයන්ට තායිලන්තයේ රැකියා .- කම්කරු අවබෝධතා ගිවිසුම අද අත්සන් කෙරේ

ශ්‍රී ලංකාව සහ තායිලන්තය අතර කම්කරු ක්ෂේත්‍රයේ ද්විපාර්ශ්වික සහයෝගීතාව තවදුරටත් ශක්තිමත් කරමින්, 'කම්කරු සහයෝගීතාව පිළිබඳ අවබෝධතා ගිවිසුම' (MoU) සහ 'තායිලන්තයේ ශ්‍රී ලාංකික ශ්‍රමිකයන් සේවයේ යෙදවීම පිළිබඳ ගිවිසුම' (MoA) අද (2026 සැප්තැම්බර් 14) බැංකොක් නුවරදී අත්සන් කරන ලදී.

මෙම ලේඛන දෙක ශ්‍රී ලංකාවේ විදේශ කටයුතු, විදේශ රැකියා සහ සංචාරක අමාත්‍ය විජිත හේරත් සහ තායිලන්තයේ කම්කරු අමාත්‍ය ජුලාපුන් අමෝන්විවාට් (Julapun Amornvivat) යන මහත්වරුන් විසින් අත්සන් කරන ලදී. දෙරටේ අදාළ බලධාරීන් අතර පැවති අඛණ්ඩ සාකච්ඡාවල ප්‍රතිඵලයක් ලෙස මෙම ගිවිසුම් ඇති කරගත් අතර, එමගින් තායිලන්තයේ ශ්‍රී ලාංකික ශ්‍රමිකයන් බඳවා ගැනීම සහ සේවයේ යෙදවීම සඳහා ක්‍රමවත් හා විනිවිදභාවයෙන් යුත් රාමුවක් ස්ථාපිත කෙරෙන අතරම, ඔවුන්ගේ අයිතිවාසිකම්, සුභසාධනය සහ ආරක්ෂාව ප්‍රවර්ධනය කිරීමද සිදු කෙරේ. මෙම ගිවිසුම් අත්සන් කිරීම ශ්‍රී ලංකාව සහ තායිලන්තය අතර ආරක්ෂිත, විධිමත් සහ අන්‍යෝන්‍ය වශයෙන් වාසිදායක ශ්‍රම සංචලතාව පුළුල් කිරීමේ වැදගත් සන්ධිස්ථානයක් සනිටුහන් කරයි.

තායිලන්තයේ පවතින ශ්‍රම හිඟයට විසඳුම් සෙවීම සඳහා, ස්ථාපිත නීතිමය රාමුව හරහා මූලික වශයෙන් ශ්‍රී ලාංකික ශ්‍රමිකයන් 10,000 දෙනෙකු බඳවා ගැනීමට තායිලන්ත කැබිනට් මණ්ඩලය අනුමැතිය ලබා දී ඇත. කම්කරු ප්‍රතිපත්ති සහ භාවිතයන්, කම්කරු වෙළඳපල තොරතුරු, කුසලතා සංවර්ධනය, ශ්‍රම ඵලදායිතාව, කම්කරු ආරක්ෂාව මෙන්ම නීතිවිරෝධී බඳවා ගැනීම් සහ මිනිස් ජාවාරම් වැළැක්වීම ඇතුළු ක්ෂේත්‍රවල සහයෝගීතාව සඳහා මෙම අවබෝධතා ගිවිසුම (MoU) රාමුවක් සපයයි.

තායිලන්තයේ ශ්‍රී ලාංකික ශ්‍රමිකයන් බඳවා ගැනීම සහ සේවයේ යෙදවීම සඳහා වන ප්‍රායෝගික විධිවිධාන මෙම ගිවිසුම (MoA) මගින් ස්ථාපිත කෙරේ. ඊට විනිවිදභාවයෙන් යුත් බඳවා ගැනීමේ ක්‍රියා පටිපාටි, සේවා ගිවිසුම්, නීතිමය ආරක්ෂාව, සුභසාධනය, වීසා සහ සේවා බලපත්‍ර මෙන්ම නැවත පැමිණීම සහ ආපසු ගෙන්වා ගැනීමේ විධිවිධාන ඇතුළත් වේ. මෙම ලේඛන දෙක ඒකාබද්ධව, ශ්‍රී ලාංකික ශ්‍රමිකයන්ගේ අයිතිවාසිකම් සහ සුභසාධනය සුරක්ෂිත කරමින් ඔවුන්ගේ විධිමත් රැකියා නියුක්තියට පහසුකම් සැලසීම සඳහා පුළුල් රාමුවක් සපයයි.

තායිලන්තයේ රැකියා අවස්ථා සොයා ගැනීමට ශ්‍රී ලාංකික ශ්‍රමිකයන්ට අවස්ථාව ලබා දීම සම්බන්ධයෙන් තායිලන්ත රාජකීය රජයට ස්තූතිය පළ කළ අමාත්‍ය හේරත්, ඔවුන්ගේ අයිතිවාසිකම්, සුභසාධනය සහ සමාජ ආරක්ෂාව තහවුරු කිරීමේ වැදගත්කම අවධාරණය කළේය. ගිවිසුම් ක්‍රියාත්මක කිරීම අධීක්ෂණය සහ සමාලෝචනය කිරීම සඳහා ඒකාබද්ධ ක්‍රියාකාරී කණ්ඩායමක් පිහිටුවීමේ අවශ්‍යතාව ද ඔහු පෙන්වා දුන්නේය. මෙම පසුබිම තුළ සේවක බඳවා ගැනීම් සහ රැකියා අවස්ථා හැරුණු විට, අනාගත ශ්‍රම වෙළඳපොළ සහ ආර්ථික සංවර්ධනයන්ට අනුකූලව දෙරටේ ශ්‍රම බලකාය ශක්තිමත් කිරීම සඳහා පුළුල් ශ්‍රම සහයෝගීතාවයකට පදනමක් ද මෙම අවබෝධතා ගිවිසුම මඟින් සපයයි.

ශ්‍රී ලංකාව තම ජාතිකයන් සඳහා නව ශ්‍රම වෙළඳපොළවල් ගවේෂණය කිරීම සහ විවිධාංගීකරණය කිරීම අඛණ්ඩව සිදු කරන බැවින්, ශ්‍රී ලංකා රජය තායිලන්තය සහ පුළුල් අග්නිදිග ආසියානු කලාපය ශ්‍රී ලාංකික සේවකයින් සඳහා වැදගත් නැගී එන ගමනාන්ත ලෙස සලකයි. ශ්‍රී ලංකාව සහ අග්නිදිග ආසියානු රටවල් බොහොමයක් අතර සමාජීය හා සංස්කෘතික ලක්ෂණවල ඇති සමානකම් ශ්‍රී ලාංකික සේවකයින්ට ඔවුන්ගේ නව සේවා සහ ජීවන පරිසරයන්ට වඩාත් පහසුවෙන් අනුවර්තනය වීමට හැකි වනු ඇතැයි අපේක්ෂා කෙරේ. එබැවින් තායිලන්තයේ ව්‍යුහගත රැකියා අවස්ථා ස්ථාපිත කිරීම ශ්‍රී ලංකාවේ විදේශ රැකියා ගමනාන්ත විවිධාංගීකරණය කිරීම, පුහුණු සේවකයින් සහ වෘත්තිකයන්, විශේෂයෙන් තරුණයින් සඳහා අවස්ථා පුළුල් කිරීම සහ ශ්‍රී ලංකාව සහ තායිලන්තය අතර දිගුකාලීන හා බහුවිධ සබඳතා තවදුරටත් ශක්තිමත් කිරීම සඳහා වැදගත් පියවරකි.