ජනපතිගෙන් සහ අගමැතිගෙන් රටට විශේෂ පණිවුඩයක්

ජනාධිපති අනුර කුමාර දිසානායක මහතා විසින් නිදහස් දිනය වෙනුවෙන් පණිවුඩයක් නිකුත් කර ඇත. එම පණිවුඩයෙන් 78 වන ජාතික නිදහස් දිනය අප විසින් සමරනු ලබන්නේ, අභියෝග රැසක් මධ්‍යයේ වුවද රට ආර්ථික වශයෙන් ස්ථාවරභාවයක් අත්පත් කර ගනිමින් ඉදිරියට යමින් සිටින ඓතිහාසික මොහොතක බව ඔහු සඳහන් කර ඇත.

එසේම ලාංකිකයන් වශයෙන් අප සැමගේ සාමූහික පොරබැදීමේ ප්‍රතිඵලයක් වශයෙන් බලපෑම් සහගත ආර්ථික ප්‍රගතියක් සාක්ෂාත් කර ගැනීමට වසර එකහමාරක් වැනි කෙටි කාලයකදී අපි සමත් වූ බවද ජනාධිපතිවරයා අවධාරණය කරයි.

අඳාළ පණිවුඩය පහතින්,

අද රටම සමරන 78 වන නිදහස් දින සැමරුම

"අප ලද සාර්ව ආර්ථික ප්‍රතිලාභ ලංකාවේ සියලු පළාත්වල සියලු ජාතීන්ට අයත් ප්‍රජාව වෙත ගලා යාමට සැලැස්වීම අපගේ ඊළඟ ප්‍රධාන අරමුණ වේ. එය සිදු නොකර, අලුතින් ගොඩනැඟෙන සංවර්ධන ක්‍රියාදාමයේ සැබෑ රිද්මය සාක්ෂාත් කිරීමට නොහැකි බව අපි තරයේ විශ්වාස කරමු. මෑතකාලයේ සිදු වූ විශාලතම ස්වභාවික ව්‍යසනයට මුහුණ දීමට අපට සිදුවිය. එම ව්‍යසනයේ අත්දැකීම වේදනාකාරී වුවද, ගෙවුණු වසර එකහමාරක කෙටි කාලය තුළ අප ගොඩනඟා ගත් ස්ථාවර පදනම් මත, සියලු පාර්ශ්වයන්ගේ සහායද සහිතව, යළි යථා තත්ත්වයට පත්වීමේ ක්‍රියාවලිය තුළ අපි සාර්ථකව ඉදිරියට පියමං කරමින් සිටිමු. නිදහස ලබා ගෙවුණු කාලය තුළ, නිවැරදි දිශානතියක් කරා අප රට යොමු කිරීමටත්, ජාතික වශයෙන් ළඟා කර ගත යුතු ඉලක්ක ළඟා කර ගැනීමටත්, එකමුතුව ජීවත් වීමටත් ලැබූ ඉතිහාසයේ ස්වර්ණමය අවස්ථා බොහෝවිට මඟ හැරී ඇත. එහෙත්, මෙවර එම වරද නැවත සිදුනොකර, අප රට පැවතියාටත් වඩා දියුණු, ශක්තිමත් සහ ගෞරවනීය රාජ්‍යයක් ලෙස ඉහළට ඔසවා තැබීමේ තිර අදිටනින් යුතුව අපි වෙහෙසෙමු. එම වැඩපිළිවෙළ ක්‍රියාවට නංවන්නේ අපගේ අභිමානවත් සංස්කෘතිය, පෞරාණික ඉතිහාසය සහ අගනා උරුමයන් ආරක්ෂා කර ගනිමින්, ඒ මත සවිමත් ලෙස දෙපා තබාගෙන බවද මෙහි ලා සිහිපත් කරමි. විසිවන සියවස තුළ උපන්, එහෙත්, බොඳව ගිය අභිමානවත් රටක් පිළිබඳ වූ සිහිනය, විසිඑක්වන සියවස තුළ සැබෑ කරමින්, රටේ ජනතාව අපේක්ෂා කරන දියුණු, ඉසුරුමත් සහ යහපත් රටක් ලෙස ශ්‍රී ලංකාව ගොඩනඟා, අප ප්‍රාර්ථනා කරන නව යුගය නියත වශයෙන්ම නිර්මාණය කළ හැකි බවට මා සතුව ඇත්තේ අචල විශ්වාසයකි. එහිදී මෙරට සියලු පුරවැසියන්ගේ ශක්තිය, ඔවුන්ගේ සාමුහිකත්වය සහ නොසැලෙන ගුණය කෙරෙහි අපි දැඩිව විශ්වාස තබා ඇත්තෙමු. ගෙවුණු සියවසේ මඟහැරුණු ජයග්‍රහණ මෙරටට අත්කර දෙමින්, සියලුදෙනා එක්ව දකින සුන්දර සිහිනය වන ‘පොහොසත් රටක් - ලස්සන ජීවිතයක්’ ගොඩනැඟීම සඳහා, එකමුතුව, තිර අදිටනින් සහ සහෝදරත්වයෙන් අත්වැල් බැඳ ගනිමු'යි සියලු පුරවැසියන්ට යළි ආරාධනා කරමින්, නිදහසේ සැබෑ අරමුණු කරා අප රැගෙන යාමට දිරි වඩන, අර්ථවත් ජාතික නිදහස් දිනයකට සුබපැතුම් එක් කරමි."

අද කොළඹ යන අයට පොලීසියෙන් විශේෂ නිවේදනයක්

එමෙන්ම 78 වන නිදහස් දිනය සමරනු ලබන්නේ අලුත් නිදහසක් පිළිබඳ වූ බලාපොරොත්තුවෙන් බවට අග්‍රාමාත්‍ය ආචාර්ය හරිනි අමරසූරිය ප්‍රකාශ කරයි.

නිදහස් දිනය සම්බන්ධයෙන් සුබ පැතුම් පණිවුඩයක් එක්කරමින් ඇය සඳහන් කරන්නේ මහජනතාවගේ ආණ්ඩුවක් සමඟින් අපි අලුත් මඟකට යොමු වී ඇති බවයි.

එමෙන්ම සාරධර්මවලින් පිරි ශ්‍රී ලංකික ජාතියක් ගොඩනැගීම වෙනුවෙන් සියලුදෙනාගේම දායකත්වය ලබා දියයුතු කාලය එළැඹ ඇති බව ද අග්‍රාමාත්‍යවරිය සඳහන් කරයි.

අඳාළ පණිවුඩයේ වැඩිදුරටත් සඳහන් වන්නේ පටු දේශපාලන අරමුණු පසෙකලා සමස්ථ ජාතියේ උන්නතිය වෙනුවෙන් සියලුදෙනා අත්වැල් බැඳගතයුතු යුගය ආරම්භ වී ඇති බවයි.

ගොඩනඟමු ශ්‍රී ලංකා තේමාව යටතේ සමරන 78වන නිදහස් දින උත්සවය අදයි