අහිංසක රෝගියෙක් වෛද්‍යවරයකුට කරපු දෙයක්..
Piyumika
අහිංසක රෝගියකු ලෙස ප්‍රතිකාර ලබාගැනීමට පැමිණ, අනුරාධපුර ශික්ෂණ රෝහලේ විශේෂඥ වෛද්‍යවරයකු රවටා, නිධානයකින් ගොඩගත් බව කියන මැණික් හා රන්කාසි තොගයක් එම වෛද්‍යවරයාට විකුණා රුපියල් ලක්ෂ 45ක මුදලක් රැගෙන ගිය මහා පරිමාණ සංවිධානාත්මක කොල්ල කල්ලියක එක් සාමාජිකයකු එම රන්කාසි සහ මැණික් ගල්වලින් කොටසක් සමඟ අත්අඩංගුවට ගත් බව අනුරාධපුර කොට්ඨාස අපරාධ විමර්ශන අංශය පවසයි.
මෙලෙස අත්අඩංගුවට පත්ව ඇත්තේ ගලෙන්බිඳුණුවැව ප්‍රදේශයේ පදිංචි හැට හැවිරිදි ගොවියෙකි. රුපියල් ලක්ෂ 45ක මුදල් කොල්ලකා මේ ප්‍රදේශය මඟහැර ගොස් සැඟව සිටින ගලෙන්බිඳුණුවැව, ගැටලාව, කොකාවැව ප්‍රදේශයේ පදිංචි ජ්‍යොතිෂවේදියකු , ආයුර්වේද වෛද්‍යවරයකු ලෙස කටයුතු කරන පුද්ගලයකු ඇතුළු දෙදෙනකු අත්අඩංගුවට ගැනීමට නියමිත බව පොලිසිය කියයි.
මෙම විශේෂඥ වෛද්‍යවරයාගේ මුදල් කොල්ලකා පලා යාමෙන් අනතුරුව, යළිත් වරක් වෙනත් පුද්ගලයකුට රන්කාසි සහ මැණික් ගල් විකිණීමට යන බවට ලද තොරතුරකට අනුව ගැනුම්කරු ලෙස පොලිස් උපාය දූතයකු යොදවා, එක් සැකකරුවකු අත්අඩංගුවට ගැනීමට හැකිවූ බව අනුරාධපුර කොට්ඨාස අපරාධ විමර්ශන අංශය පවසයි.
රෝගී තත්ත්වයක් සඳහා ප්‍රතිකාර ලබාගැනීමට පැමිණි දුප්පත් ගොවියෙකු ලෙස පෙනී සිටි මෙම සංවිධානාත්මක අපරාධ කල්ලියේ එක් සාමාජිකයෙකු වෛද්‍යවරයා නොමඟ යවා හිතවත්කමක් ඇති කරගෙන සූක්ෂ්ම එම වෛද්‍යවරයා ගලෙන්බිඳුණුවැව ප්‍රදේශයට ගෙන්වාගෙන මෙම ගනුදෙනුව සිදු කර ලක්ෂ 45ක මුදල සැකකරුවන් ලබාගෙන ඇති බව පොලිසිය කියයි.
එම මැණික් ගල් සඳහා වශියක් කිරීමට, එයට ආරක්ෂාවක් (සාත්තුවක්) යෙදිය යුතු බව පවසා, ඒවා ‘ජීවම්’ කිරීමේ කටයුතු සිදු කර සතියකින් ලබාදෙන බවට පවසා, එම රන්කාසි සහ මැණික් වෛද්‍යවරයාගෙන් යළි ලබාගෙන ඇති සැකකරුවන් සතියකින් පසු දුරකතනවලට ප්‍රතිචාර නොදැක්වීම හේතුවෙන් සිද්ධියට මුහුණ පෑ වෛද්‍යවරයා මෙම පැමිණිල්ල සිදු කර ඇති බව පොලිසිය කියයි.
මෙම රන් කාසි සහ මැණික් නිධානයකින් ගොඩගත් ඒවා බව, තමන් පසුව දැන ගත් බවත් වෛද්‍යවරයකු ලෙස තමන් එවැනි වැරදි ක්‍රියාවලට සම්බන්ධ වීමට අකමැති බවත් යළි එම මුදල් ඉල්ලා දෙන ලෙසටත් පවසා මෙම පැමිණිල්ල ඉදිරිපත් කර තිබූ බව පොලිසිය වැඩිදුරටත් සඳහන් කළේය.
මේ සම්බන්ධයෙන් අත්අඩංගුවට ගත් සැකකරු සතුව තිබූ රන්කාසි සහ මැණික් ගල් ව්‍යාජ ඒවාද නැතිනම් නිධානයකින් ගොඩගත් රන් කාසිද යන්න නිශ්චිතවම දැනගැනීම සඳහා පුරාවිද්‍යා වාර්තාවක් ලබාගැනීමට නියමිතව තිබූ බව පොලිසිය පවසයි.
අත්අඩංගුවට ගත් සැකකරු අනුරාධපුර මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි.
අනුරාධපුර කොට්ඨාස භාර ජ්‍යෙෂ්ඨ පොලිස් අධිකාරි තිළිණ හේවාපතිරණ මහතාගේ උපදෙස් මත, අනුරාධපුර කොට්ඨාස අපරාධ විමර්ශන අංශයේ ස්ථානාධිපති ප්‍රධාන පොලිස් පරීක්ෂක චමින්ද ගුණසේකර, පොලිස් සැරයන්වරුන් වන බණ්ඩාර (48317), නිශාන් (61406), සමන් (71544), මදුශාන් (88901), යන නිලධාරීහු මෙම වැටලීම සිදු කළහ.
