ලංකාව පුරා අධික වැසි හේතුවෙන් ප්‍රධාන ජලාශ 16ක් සහ මධ්‍ය පරිමාණ ජලාශ 10ක් වාන් දමයි- අවට ජනතාව ප්‍රවේශමෙන්

 වාරි මාර්ග දෙපාර්තමේන්තුව මගින් පාලනය කරන ප්‍රධාන ජලාශ 16ක් සහ මධ්‍ය පරිමාණ ජලාශ 10ක් මේ වන විට වාන් දමමින් පවතින බව වාරිමාර්ග අධ්‍යක්ෂක ජල කළමණාකරණ ඉංජිනේරු එච්.එම්.පී.එස්.ඩී හේරත් මහතා සදහන් කර ඇත .

අනුරාධපුරය රාජාංගනය ජලාශය, බදුල්ල දිස්ත්‍රික්කයේ සොරබොර ජලාශය, හම්බන්තොට දිස්ත්‍රික්කයේ වීරවිල, ලුණුගම්වෙහෙර, වෙහෙරගල ජලාශය, කුරුණෑගල දිස්ත්‍රික්කයේ මාගල්ල, දැදුරුඔය යන ජලාශ ද, මහනුවර දිස්ත්‍රික්කයේ වෑමැඩිල්ල, නාලන්ද ජලාශ ද මොනරාගල දිස්ත්‍රික්කයේ අලිකොටආර ජලාශය ද මෙලෙස වාන් දමන බව වාර්තා වේ.

ඒ වගේම එච්.එම්.පී.එස්.ඩී හේරත් මහතා තව දුරටත් සදහන් කළේ කලාවැව ගංඟා ද්‍රෝණියට පසුගිය දින කිහිපයේම ඇඳ හැලුණු අධික වර්ෂාපතනයත් සමග මේ වන විට එම ගංඟා ද්‍රෝණියේ පිහිටි රාජාංගනය, දේවහූව, වෑමැඩිල්ල ජලාශ වාන් දමමින් පවතින බවයි.

ඊසාන දෙසින් රට ළඟම තියෙන අඩුපීඩන කලාපයෙන් මුහුද කැළඹෙයි - ඉදිරි දින ගැන දිවයිනටම අනතුරු ඇඟවීමක්

රාජාංගනය ජලාශයේ වාන් දොරටු 12ක් විවෘත කර ඇති අතර ඉන් තත්පරයට ඝන අඩි 18,500ක ප්‍රමාණයකින් ජලය නිකුත් කරන බවද වාර්තා වේ.

අධ්‍යක්ෂකවරයා ප්‍රකාශ කළේ කිරිඳිඔය ගංඟා ද්‍රෝණියට ලැබුණු අධික වර්ෂාපතනයත් සමග එම ගංඟා ද්‍රෝණියේ පිහිටි ලුණුගම්වෙහෙර, තිස්ස වැව, වීරවිල, යෝධ වැව, අලිකොටආර යන ජලාශය ද මේ වන විට වාන් දමමින් පවතින බවයි.

තවද ලුණුගම්වෙහෙර ජලාශයේ මේ වන විට වාන් දොරටු 6ක් විවෘත කර ඇති අතර ඉන් තත්පරයට ඝන අඩි 7,100ක ප්‍රමාණයකින් ජලය නිකුත් කරන බව සදහන්ය.

මීට අමතරව වෙහෙරගල ජලාශයේ වාන් දොරටු 6ක් විවෘත කර ඇති අතර ඉන් තත්පරයට ඝන අඩි 2,400කට අධික ප්‍රමාණයකින් ජලය මැණික් ගඟට නිකුත් කරන බවද වාර්තා වේ .

වාන් දමන මධ්‍යම පරිමාණයේ ජලාශ අතරට අංගමුව ජලාශය, බෝබුරුඇල්ල ජලාශය, මහාසියඹලාන්ගමුව ජලාශය, සද්ධාතිස්ස ජලාශය, මාලිම්පොත ජලාශය, මරතමඩු යන ජලාශ ඇතුළත් වේ.

ගාල්ල කළඹමින් වෙඩි තැබීමක් - පුද්ගලයෙක් ජීවිතක්ෂයට

එච්.එම්.පී.එස්.ඩී හේරත් මහතා දැනුම් දී තිබෙනුයේ ලැබෙන වර්ෂාපතනත් සමග වාන් දොරටුවල ජල මට්ටම් නිකුත් කිරීමේ ප්‍රමාණයන් ඉදිරියේ දී වෙනස් විය හැකි බැවින් ජලාශ අවට පදිංචි සහ පහත් බිම්වල වෙසෙන ජනතාවට විමසිලිමත්ව සිටින ලෙසයි