කොළඹ සරසවියෙන් නොමැකෙන වාර්තාවක්- උපාධි ප්‍රදානයේදී රන් පදක්කම් 16ක් දිනූ වෛද්‍ය හසිනි රංගිකා

කොළඹ විශ්වවිද්‍යාලයේ සාමාන්‍ය උපාධි ප්‍රදානෝත්සවයේදී වෛද්‍ය පීඨයේ විශිෂ්ට අධ්‍යයන දක්ෂතා දක්වමින් වෛද්‍ය හසිනි රංගිකා ඈපා ආරච්චි රන් පදක්කම් 16ක් දිනාගනිමින් සුවිශේෂී වාර්තාවක් තබා තිබේ.

තම MBBS කණ්ඩායමේ Valedictorian ලෙස කටයුතු කළ වෛද්‍ය හසිනි, අවසාන MBBS පරීක්ෂණය ඇතුළුව අධ්‍යයන ප්‍රවාහයන් පහෙන්ම ප්‍රථම පන්තියේ ගෞරව සාමාර්ථ ලබාගැනීමට සමත්ව ඇත.

වෛද්‍ය අභ්‍යාසලාභී පත්වීම් සඳහා වන MBBS උපාධිධාරීන්ගේ සමස්ත ලංකා කුසලතා ලැයිස්තුවේ ප්‍රථම ස්ථානය හිමිකර ගැනීම ඇගේ අධ්‍යයන දිවියේ තවත් සුවිශේෂී ජයග්‍රහණයක් වන අතර, අධ්‍යයන විශිෂ්ටත්වය වෙනුවෙන් පිරිනමන මහාචාර්ය තිලක් හෙට්ටිආරච්චි සම්මානයද ඇය විසින් හිමිකරගෙන තිබේ.

ඇගේ උපාධි අපේක්ෂක කාලය පුරාම Dean’s List Awards සඳහා තේරී පත්වෙමින් සහ Mitsubishi UFJ Foundation ශිෂ්‍යත්වය හිමිකර ගනිමින් ඇය සිය අධ්‍යයන විශිෂ්ටත්වය අඛණ්ඩව පෙන්නුම් කර ඇත. අධ්‍යයන කටයුතු සහ සායනික පුහුණුවට අමතරව වෛද්‍ය පර්යේෂණ ක්ෂේත්‍රයටද සක්‍රීය දායකත්වයක් ලබාදී ඇති වෛද්‍ය හසිනි, ගැබිනි කාන්තාවන්ගේ මානසික සෞඛ්‍යය සහ ස්ක්‍රබ් ටයිෆස් රෝග විනිශ්චය සලකුණු පිළිබඳ පර්යේෂණ ප්‍රකාශයට පත් කර තිබේ.

ශ්‍රී ලංකා වෛද්‍ය සංගමයේ වාර්ෂික විද්‍යාත්මක සම්මේලනය ඇතුළු ප්‍රධාන විද්‍යාත්මක සමුළු රැසකදී සිය පර්යේෂණ සොයාගැනීම් ඉදිරිපත් කර ඇති ඇය, ඩෙංගු සහ පෙනහළු ආශ්‍රිත රෝග පිළිබඳවද තවදුරටත් පර්යේෂණ කටයුතුවල නිරතව සිටින්නීය. MBBS වැඩසටහන සඳහා පිරිනැමුණු රන් පදක්කම් 32 අතරින් 16ක්ම දිනාගැනීමට සමත්වීම වෛද්‍ය හසිනිගේ මෙම සුවිශේෂී ජයග්‍රහණයේ කැපී පෙනෙනම කරුණකි.

එමෙන්ම, කොළඹ වෛද්‍ය පීඨය පිරිනමන සමස්ත රන් පදක්කම් 30 අතරින් 16ක් ඇය විසින් දිනාගෙන ඇති බවද විශ්වවිද්‍යාල මාධ්‍ය ඒකකය සඳහන් කර තිබේ.

දිවයිනේ MBBS උපාධිධාරීන්ගේ කුසලතා ලැයිස්තුවේ ප්‍රථම ස්ථානය හිමිකර ගැනීමත් සමඟ වෛද්‍ය හසිනි තැබූ මෙම වාර්තාව ඇගේ කැපවීම, විනය සහ අධ්‍යයන විශිෂ්ටත්වය මනාව පිළිබිඹු කරයි. ඇයගේ මෙම සුවිශේෂී ජයග්‍රහණය කොළඹ විශ්වවිද්‍යාලයට අභිමානයක් එක් කරන අතර, ශ්‍රී ලංකාවේ අනාගත වෛද්‍යවරුන් සහ වෛද්‍ය පර්යේෂකයන් සඳහාද ආදර්ශයක් වනු ඇත.