මෙන්න මේ අයට අලුතින් බස් රථ සේවාවක් - අපහසුතාවයට පත්වුණ කාලෙ ඉවරයි

ආබාධ සහිත තැනැත්තන් සඳහා ප්‍රමුඛතා බස් රථ සේවාවක් ලබන මස සිට ආරම්භ කිරීමට ප්‍රවාහන, මහාමාර්ග සහ නාගරික සංවර්ධන අමාත්‍යාංශය සැලැසුම් කර ඇත.

එහි අරමුණ බවට පත්වනුයේ පොදු ප්‍රවාහන පද්ධතිය තුළ මෙතෙක් අවධානයට ලක් නොවූ ආබාධ සහිත තැනැත්තන්ගේ ගමනාගමන අයිතිය තහවුරු කිරීමයි.

ජනාධිපති මාධ්‍ය අංශය ප්‍රකාශ කරන්න්නේ ‘සැමට සම අවස්ථා සහ මානව ගරුත්වය සුරක්ෂිත කරන රටක්’ යන රජයේ දැක්ම යථාර්ථයක් කරමින් මෙම වැඩසටහන ක්‍රියාත්මක කෙරෙන බවයි.

 මෙම ව්‍යාපෘතිය සඳහා රුපියල් මිලියන 430.7ක මූල්‍ය ප්‍රතිපාදන වෙන් කර තිබීම තවත් සුවිශේෂී කරුණකි .

මෙහි මූලික අරමුණ බවට පත්ව ඇත්තේ පොදු ප්‍රවාහන පද්ධතිය තුළ පවතින භෞතික බාධක ඉවත් කර, ආබාධ සහිත තැනැත්තන්ට ස්වාධීනව සහ සුරක්ෂිතව සමාජගතවීමට අවශ්‍ය පසුබිම සකස් කිරීමයි.

  ව්‍යාපෘතියේ පළමු අදියර යටතේ රෝද පුටු භාවිත කරන්නන්ට ඉතා පහසුවෙන් ප්‍රවේශ විය හැකි පතුල පහළ විශේෂ වර්ගයේ නවීන වායු සමනය කළ බස් රථ 10ක් පසුගිය 10 වෙනිදා හම්බන්තොට වරාය වෙත ගෙන එනු ලැබීය.

මෙම බස් රථ ලබන සෙනසුරාදා කොළඹට රැගෙන ඒමෙන් පසු මෙට්‍රෝ සමාගම වෙත නිල වශයෙන් භාර දීමට නියමිතව තිබේ. තවද ආසන 33කින් සමන්විත මෙම එක් බස් රථයක මගීන් 80 දෙනෙකුට එකවර ගමන් කළ හැකි බවයි.

ඒ වගේම රෝද පුටු භාවිත කරන්නන්ගේ ආරක්ෂාව තහවුරු කෙරෙන විශේෂිත තාක්ෂණික අංගවලින් ද මේවා සමන්විතව ඇත.

SkyUp ගුවන් සමාගමෙන් දැවැන්ත මෙහෙවරක් , සීත සෘතුවේ ශ්‍රී ලංකාවට සැලසුම් කළ ගමන් නිම කරයි

  තවද නියමු ව්‍යාපෘතියක් ලෙස මෙම සේවාව මාකුඹුර බහුවිධ ප්‍රවාහන මධ්‍යස්ථානය කේන්ද්‍ර කර ගනිමින් ආරම්භ කිරීමට නියමිතව තිබෙන බව වාර්තා වේ.

ඒ අනුව මෙම බස් රථ මාකුඹුර සිට පිටකොටුව දක්වාත්, මාකුඹුර සිට කඩවත දක්වාත් පෙරවරු සහ පස්වරු කාල සීමාවන්හිදී සෑම විනාඩි 40කට වරක් ධාවනය කිරීමට නියමිතය.

ජනාධිපති මාධ්‍ය අංශය සඳහන් කරන්නේ විශේෂයෙන් මහරගම අපේක්ෂා රෝහල සහ කොළඹ ජාතික රෝහල යන ප්‍රධාන සෞඛ්‍ය මධ්‍යස්ථාන සෘජුවම ආවරණය වන පරිදි ධාවන කටයුතු සැලසුම් කර ඇති බවයි.

මෙම බස් රථ සේවාව සඳහා ශ්‍රී ලංකා ගමනාගමන මණ්ඩලයේ තෝරාගත් රියදුරන් සහ කොන්දොස්තවරුන් 28 දෙනෙකු සඳහා විශේෂ පුහුණුවක් ලබා දීමට කටයුතු යොදා ඇත.

සමාජ සේවා අමාත්‍යාංශය මගින් ලබා දෙන මෙම පුහුණුවට බස් රථ තාක්ෂණය සහ මගී ආරක්ෂාව, වෘත්තීය ආචාරධර්ම සහ මගී සත්කාර, ආබාධ සහිත මගීන් සමඟ සන්නිවේදනය සඳහා වන සංඥා භාෂාව පිළිබඳ පුහුණුව ඇතුළත් වනු ඇත.

මෙම නියමු ව්‍යාපෘතියේ සාර්ථකත්වය මත පදනම්ව, ලබන අගෝස්තු මාසයේදී තවත් බස් රථ 100ක් මෙරටට ගෙන්වා ආබාධ සහිත තැනැත්තන් සහ සාමාන්‍ය මගීන්ගේ ප්‍රවාහන අවශ්‍යතා සඳහා යෙදවීමට සැලසුම් කර තිබේ.

සමාජ මාධ්‍ය කළඹපු වීඩියෝවේ අපරික්ෂාකාරී ලෙස රිය පදවපු රියදුරු කොටු

ජනාධිපති මාධ්‍ය අංශය තව දුරටත් සදහන් කරන්නේ එමෙන්ම මීට සමගාමීව ක්ලීන් ශ්‍රී ලංකා වැඩසටහන මගින් බස් නැවතුම්පොළවල්ද ආබාධ සහිත තැනැත්තන්ට හිතකර ප්‍රවේශ ප්‍රමිතිය සහිතව ප්‍රතිසංස්කරණය කිරීමට හෝ අලුතින් ඉදිකිරීමට සැලසුම් කර ඇති බවයි