ඔබත් බහරේන් රැකියාවට යන කෙනෙක් ද? - එහෙනම් මේ එන්නත අනිවාර්යයි!
Shehan
බහරේන් රාජ්‍යයට පැමිණෙන විදේශීය ශ්‍රමිකයන් අතර Meningococca රෝගය වළක්වා ගැනීම සඳහා Meningococcal එන්නත අනිවාර්ය කර ඇති බව එරට සෞඛ්‍ය අමාත්‍යාංශය නිවේදනය කරයි.
මෙම තීරණය ශ්‍රී ලාංකික ශ්‍රමිකයන්ට ද අනිවාර්ය වේ.
ඒ අනුව, විදේශ කටයුතු අමාත්‍යාංශය සහ බහරේන්හි ශ්‍රී ලංකා තානාපති කාර්යාලය එක්ව, බහරේන් රාජ්‍යයේ සහ ගල්ෆ් සහයෝගිතා කවුන්සිලයේ (GCC) උපදෙස් පරිදි, ශ්‍රී ලාංකිකයන් සඳහා එන්නත්කරණ වැඩසටහනක් ක්‍රියාත්මක කිරීමට සැලසුම් කර ඇත.''
මෙනින්ගොකොකල් රෝගය යනු නයිසීරියා මෙනින්ජිටිඩිස් (Neisseria meningitidis, මෙනින්ගොකොකස් ලෙසද හැඳින්වේ) බැක්ටීරියාවෙන් ඇතිවන ආසාදන තත්ත්වයකි. ප්‍රතිකාර නොකළහොත් මෙය ඉහළ මරණ අනුපාතයක් සහිත වන නමුත් එන්නත මගින් එය වළක්වා ගත හැකිය.
මෙනින්ජයිටිස් යනු බෝවන රෝගයක් වන අතර, සංවර්ධිත හා සංවර්ධනය වෙමින් පවතින රටවල රෝග, මරණ සහ ආබාධිත තත්ත්වයන්ට මෙනින්ජයිටිස් සහ මෙනින්ගොකොක්සිමියාව ප්‍රමුඛ හේතු වේ.
විශේෂයෙන් සංක්‍රමණික ශ්‍රමිකයන් විශාල වශයෙන් රැඳී සිටින ප්‍රදේශවල, රෝගය පැතිරීම අවම කිරීම සඳහා මෙනින්ගොකොකල් එන්නත ඔවුන්ගේ ප්‍රතිශක්තිකරණ උපාය මාර්ගයේ ප්‍රධාන අංගයක් ලෙස භාවිතා කිරීමට ගල්ෆ් සහයෝගිතා කවුන්සිලයේ මාර්ගෝපදේශවලින් නිර්දේශ කර ඇත.
මෙම එන්නත්කරණ අවශ්‍යතාවය ශ්‍රමිකයන්ගේ සෞඛ්‍ය ආරක්ෂා කිරීමටත්, විභව වසංගත තත්ත්වයන් වළක්වා ගැනීමටත් මහජන සෞඛ්‍ය ඉලක්කයන්ට අනුකූලව ක්‍රියාත්මක වේ.
බහරේන් රාජ්‍යය දශක ගණනාවක් තිස්සේ ශ්‍රී ලාංකික ශ්‍රමිකයන්ගේ ජනප්‍රිය රැකියා ගමනාන්තයක් වන අතර, වර්තමානය වන විට එය තවදුරටත් ව්‍යාප්ත වෙමින් පවතී. 2024 වසරේදී බහරේන්හි රැකියා සඳහා ශ්‍රී ලාංකික ශ්‍රමිකයන් 4,000කට අධික පිරිසක් පිටත්ව ගොස් ඇත.
