සුදු සීනි සහ රතු සීනි කන හැමෝමට රතු එළියක්..මේ ගැන දැඩි අවධානයෙන් ඉන්න.
Aruna
ශ්‍රි ලංකාවේ නිෂ්පාදිත රතු සීනි සමග ඉන්දියාවෙන් ආනයනය කරන ලද සුදු සීනි මිශ්‍ර කරමින් ඉන්දියානු රතු සීනි ලෙස වෙළෙඳපලට නිකුත් කිරීමේ ජාවාරමක් පාරිභෝගික කටයුතු පිළිබඳ අධිකාරියේ රත්නපුර දිස්ත්‍රික් ලේකම් කාර්යාලයට අනුයුක්ත නිලධාරීන් විසින් ඊයේ ( 15) දින ඇඹිලිපිටිය ප්‍රදේශයේදී වැටලීමකට ලක් කර තිබෙන බව වාර්තා වනවා.
එහිදී අදාල ව්‍යාපාරිකයා විසින් කාලයක් තිස්සේ මෙම ජාවාරම සිදුකර ඇති බවට සැක කරයි.
කිලෝග්රෑම් 50 හිස් සීනි අසුරන 2500 කට අධික ප්‍රමාණයක්ද එම ස්ථානයේ තිබියදී අදාල නිලධාරීන් විසින් තම භාරයට ගෙන තිබේ.
එමෙන්ම අදාල සීනි හිස් අසුරන ප්‍රමානය අනුව ඒවායේ තිබූ සීනි ඉන්දියානු රතු සීනි ලෙස සකස්කර වෙළඳපළට අලෙවි කර ඇතිද යන්න සම්බන්ධව තවදුරටත් නිලධාරීන් විසින් විමර්ශන සිදු කරමින් පවතින බවයි පැවසෙන්නේ.
මෙසේ කලවම් කර රතු සීනි බවට පත් කරන ලද සීනි කිලෝග්‍රෑමයක් රුපියල් 300.00 ක පමණ මිලකට අලෙවිකර ඇති අතර සුදු සීනි කිලෝවක් රුපියල් 240.00 බැගින් සහ රතු සීනි කිලෝවක් රුපියල් 310.00 බැගින් ඔවුන් මිලදීගෙන ඇති බවට හඳුනාගන ඇත.
මේ සම්බන්ධව තවදුරටත් නිලධාරීන් විසින් විමර්ශන සිදු කරන අතර ඉදිරියේදී නඩු පැවරීමට ද නියමිත බවයි පැවසෙන්නේ.
