මැයි මාසයේ දී ඩොලරය රු. 400 යි – ජනතාවට ඉහළ යන ජිවන මට්ටම දරා ගන්න පුලුවන් වෙයි ද..? රජයේ මන්ත්‍රීවරයෙක් පාර්ලිමේන්තුවේ දී කළ විශේෂ ප්‍රකාශය මෙන්න !

පාවෙන විනිමය අනුපාත ක්‍රමය තබාගතහොත් මැයි - ජූනි මාස වන විට ඇමරිකානු ඩොලරය මිල රු. 400 සීමාව ඉක්මවා යනු ඇතැයි පොදුජන පෙරමුණු පාර්ලිමේන්තු මන්ත්‍රී ගුණපාල රත්නසේකර මහතා පවසයි.

ඊයේ (24) දින පාර්ලිමේන්තුවේ දී ඔහු මේ බව පැවසීය. ගුණපාල රත්නසේකර මහතා ශ්‍රී ජයවර්ධනපුර විශ්ව විද්‍යාලයේ ගණකාධිකරණය පිළිබඳ ජ්‍යෙෂ්ඨ කථිකාචාර්යවරයෙකි.

අපි ඩොලරය අතහැරියා විතරයි, රුපියලේ අගය පාවෙන්න හැරියා විතරයි, 202කට තියාගත්ත ඩොලරය අගය අද රු. 300 දක්වා ඉහළ ගිහිං තියෙනවා. 290 - 300 මට්ටමේ මේ වන කොට ඩොලරය ක්‍රියාත්මක වෙනවා.

විදේශ විනිමය ලැබීම් හා ගෙවීම් අතර පරතරය ඩොලර් බිලියන 10ක් විතර තියෙද්දී, මේ පැත්තෙන් දේශීය මුදල් සැපයුම වර්ධනය වෙමින් තියෙද්දී, කවදාවත් අපි රුපියල පා කළොත්, නැතිනම් පාවෙන විනිමය අනුපාත ක්‍රමය පාවිච්චි කළොත්, සිද්ධ වෙන එකම දේ ඩොලරයේ අගය තව තවත් ඉහළ යාම.

මගේ පුද්ගලික ඇස්තමේන්තුව තමයි මැයි මාසේ ජූනි මාසේ විතර වෙන කොට අපි පාවෙන විනිමය අනුපාත ක්‍රමය තියාගත්තොත් ඩොලරයක අගය රු. 400 ඉක්මවලා යාවි. ඩොලරය 400 මට්ටමට යන කොට සිද්ධ වෙන දේ තමයි ජනතාවට දරා ගන්න බැරි මට්ටමට ජීවන වියදම අනිවාර්යයෙන්ම ඉහළ නගිනවා.

මේ අතර පාර්ලිමේන්තු මන්ත්‍රී ගුණපාල රත්නසේකර මහතා වැඩිදුරටත් පැවසුවේ දැඩි පරිශ්‍රමයක් යොදා ඩොලරය රු. 203 මට්ටමේ රඳවා තබා ගැනීමට කටයුතු කිරීම හේතුවෙන් ජීවන වියදමේ වැඩිවෙන වේගය යම් මට්ටමකට පාලනය කරගැනීමේ හැකියාවක් රජයට තිබුණු බවයි.

මෙතෙක් ලංකා ඉතිහාසයේ හැමදාම විදේශ විනිමය ලැබීම් හා විදේශ විනිමය ගෙවීම් අතර පරතරයක් තිබුණා. නිදහසෙන් පසු එකම එක අවුරුද්දක හැර අනෙක් සෑම වර්ෂයකදීම විදේශ විනිමය ලැබීම් හා ගෙවීම් අතරේ දැවැන්ත හිඟයක් අපිට තිබුණා.

අපි ජාත්‍යන්තර මූල්‍ය අරමුදලට ගියොත් ජාත්‍යන්තර මූල්‍ය අරමුදලේ යම් යම් කොන්දේසි, ඒ අය හදන වැඩපිළිවෙල අපිට පිළිගන්න වෙනවා. ඒක රටට වාසිදායක ආකාරයට සකස් කරගන්න වෙනස් කරගන්න, අපිට වාසිදායක තත්ත්වයට කොන්දේසි පවත්වා ගන්න රජය දැවැන්ත උත්සාහයක් මේ සාකච්ඡා තුළ දරාවි.

හැබැයි සනාථන සත්‍ය තමයි අපි ජාත්‍යන්තර මූල්‍ය අරමුදලට යනවා කියන්නේ අපිට කොන්දේසිවලට මුහුණ දෙන්න සිද්ධ වෙනවා. මේ කොන්දේසි අපි කැමති වුණත් නැතත් අපේ මුල් අදහස තිබ්බේ අපි ජාත්‍යන්තර මූල්‍ය අරමුදලට යන්නේ අන්තිම මොහොතේ කරන්නම දෙයක් නැතිවුණාම. දැන් බොහෝ අය කියනවා ජාත්‍යන්තර මූල්‍ය අරමුදලට ගියේ ප්‍රමාද වෙලා. රජයක් තීන්දු තීරණ ගන්න කොට වඩා හොඳම දේ මොකක්ද කියලා ගන්නවා.

ඩොලරය පාවෙන්න කියලා හැම තැනින්ම එද්දී රජය අමාරුවෙන් ඩොලරය අල්ලගෙන හිටියා. ඒ නිසාම ජීවන වියදමේ වැඩිවෙන වේගය යම් මට්ටමකට පාලනය කරගැනීමේ හැකියාවක් රජයට තිබුණා.