තැන් තැන්වල කතා වෙන අගමැතිනි හරිනිගේ කැෂුවල් ඇඳුම!
Shehan
තායිලන්තය හි බැංකොක් නුවර පැවැත්වෙන BIMSTEC සමුළුවට සහභාගී වීම සඳහා ශ්‍රී ලංකාව වෙනුවෙන් අගමැතිනි හරිනි අමරසූරිය ගමන් ගොස් ඇති අතර, එහිදී ඇය ඇඳුම් ඇඳි ආකාරය සම්බන්ධයෙන් සමාජ මාධ්‍ය තුළ කතාබහක් ඇති වී තිබේ.
ශ්‍රී ලංකාව නියෝජනය කරමින් රටේ අගමැතිනිය ලෙස ඇය මෙම සංචාරයේදී තෝරාගත් ඇඳුම් සහ ඒවායේ තේරීම ගැටලුකාරී බව ඇතැමුන් පෙන්වා දී ඇත.
2 වැනිදා පස්වරුවේ තායිලන්තයේ බැංකොක් හි සුවර්ණභූමි ගුවන්තොටුපළෙන් බැස යන විට අගමැතිනිය බඩේ ස්වීටරයක් බැඳගෙන ගමන් කළ ආකාරය නොගැලපෙන බව ඇතැමුන් තර්ක කර ඇත.
තායිලන්ත ගුවන් ගමන සඳහා ඇය මෙම සැහැල්ලු (කැෂුවල්) ඇඳුම ඇඳගෙන ගොස් ඇති අතර, ගුවන්තොටුපළේදී එරට සාමාන්‍ය පිළිගැනීමේ අවස්ථාවකට සහභාගී වූවාය. එහිදී සමුළුවට පැමිණි රටවල් හයේ නායකයින් විශේෂ ආකාරයකින් පිළිගනු ලැබූවේ නැත.
ඉන් පසු පැවති රාත්‍රී භෝජන සංග්‍රහය, උත්සවය හෝ සම්මන්ත්‍රණ අවස්ථාව සඳහා ඇය එලෙස සැහැල්ලු ඇඳුමින් සැරසී සිටියේ නැත. මීට පෙර, පසුගිය මාර්තු මාසයේ යුරෝපා සංචාරයේදී ද අගමැතිනිය ප්‍රංශයේ සහ ජර්මනියේ ගමන් කර ඇත්තේ මෙවැනි සැහැල්ලු ඇඳුම් ඇඳගෙනය.
එම අවස්ථාවන්හිදී ඇයගේ ඇඳුම් පිළිබඳ සාකච්ඡාවක් හෝ විවේචනයක් මතු වී තිබුණේ නැත. බැංකොක් සංචාරය අතරතුර ඇය වට් ෆෝ පන්සලට ද ගමන් කර ඇති අතර, එහිදී "ශ්‍රී සිද්ධාර්ථ ගෞතම" චිත්‍රපටයේ රඟපෑ ඉන්දීය නළු ගගන් මලික් හමු වී ඔහු සමඟ ඡායාරූපයක් ද ගෙන තිබේ.
පන්සලේදී ඇය සාරියකින් සැරසී සිටියාය. BIMSTEC සමුළුව සඳහා සහභාගී වන නායකයින් වෙනුවෙන් පැවති භෝජන සංග්‍රහයට අග්‍රාමාත්‍ය ආචාර්ය හරිනි අමරසූරිය 3 වැනිදා රාත්‍රියේ සහභාගී වූ අතර, අද ආරම්භ වූ සමුළුවට ද සාරියකින් සැරසී සහභාගී විය.
වසර තුනකට පසු පැවැත්වෙන මෙම BIMSTEC සමුළුවේ මෙවර තේමාව වන්නේ "සෞභාග්‍යවත්, ඔරොත්තු දීම සහ විවෘතභාවය" යන්නයි. මෙම සමුළුවට සාමාජික රටවල් හතක් වන බංග්ලාදේශය, භූතානය, ඉන්දියාව, මියන්මාරය, නේපාලය, ශ්‍රී ලංකාව සහ තායිලන්තය එක්ව සිටී.
