රජයේ රෝහල් පද්ධතිය තුළ පවතින ඖෂධ ගැන විශේෂ හෙළිදරව්වක්.
Wayomi
ප්‍රමිතියෙන් අඩු ඖෂධ කිසිවක් රජයේ රෝහල් පද්ධතිය තුළ නොමැති බව වගකීමෙන් යුතුව ප්‍රකාශ කරන බව සෞඛ්‍ය හා කර්මාන්ත ඇමැති වෛද්‍ය රමේෂ් පතිරණ ප්‍රකශ කරනවා.
ඔහු ඒ බව කියා සිටියේ , පෙරේදා (30) ඖෂධ සම්බන්ධයෙන් සෞඛ්‍ය අමාත්‍යාංශයීය ශ්‍රවණාගාරයේ පැවැති විශේෂ මාධ්‍ය හමුවට සහභාගි වෙමින්.
එහිදී ඇමතිවරයා වැඩිදුරටත් කියා සිටියේ මෙවැන්නක්,
"ප්‍රමිතියෙන් අඩු ඖෂධ ගෙන්වීම සඳහා රජයෙන් කිසිදු ඉඩක් නැහැ. කිසිදු බියකින් තොරව රෝගීන්ට රජයේ රෝහල් පද්ධතිය තුළින් ලබාදෙන ඖෂධ ආරක්ෂිතව භාවිත කළ හැකියි.
වර්තමානයේ සෞඛ්‍ය ක්ෂේත්‍රය පිළිබඳවත්, ඖෂධ මිලදී ගැනීම පිළිබඳවත් වැරදි අසත්‍ය ප්‍රචාර රැසක් මාධ්‍ය මඟින් ප්‍රචාරය කිරීම සම්බන්ධයෙන් කරුණු දැක්වීමට මෙම මාධ්‍ය හමුව පවත්වනවා. සෞඛ්‍ය අමාත්‍යාංශය කිසිදු හදිසි ඖෂධ මිලදී ගැනීමක් සිදු කරන්නේ නැහැ. ගුණාත්මකභාවයෙන් අඩු කිසිදු ඖෂධයක් ප්‍රසම්පාදන ක්‍රියාවලිය මඟින් ලබා ගැනීමට කටයුතු කරන්නේ නැහැ. ශ්‍රී ලංකාවේ ලියාපදිංචි කර නොමැති ඖෂධ මෙරටට ගෙන්වීමට කිසිදු අවස්ථාවක කටයුතු කරන්නෙත් නැහැ. ඒ සම්බන්ධව කථිකාවක් ඇති වී තිබෙන්නේ කරුණු දෙකක් හේතුවෙන්. එකක් තමයි ශ්‍රී ලංකාව සහ ඉන්දියානු රජය අතර, රජයන් දෙකක් අතර ගිවිසුමක් මාර්ගයෙන් ශ්‍රී ලංකාවට ඉන්දියානු රජයෙන් කළ ඉල්ලීමකට අනුව ඔවුන්ගේ යෝජනා ක්‍රමවේදයකට අනුව “ජනඖෂධී ඖෂධ ව්‍යාපාරය” නමින් රජය සතු ආයතන මඟින් ගුණාත්මකභාවයෙන් ඉහළ ඖෂධ ඉන්දියානු ජනතාවට ලබාදීමේත්, අසල්වැසි රටවලට ලබාදීමේත් ක්‍රමවේදයක් පවතිනවා.
එම ක්‍රමවේදයට ඇතුළත් වන ලෙස ඉන්දියානු රජය කළ ඉල්ලීමකට අනුව කැබිනට් පත්‍රිකාවක් ඉදිරිපත් කර තිබෙනවා. ඒ යටතේ අවශ්‍ය අවස්ථාවකදි ඉන්දියානු රජයෙන් අපට ලබාදෙන ඖෂධ සාධාරණ මිලකට මෙරට ලියාපදිංචියෙන් පසුව ලබාගැනීම සඳහා අවශ්‍ය කැබිනට් පත්‍රිකාවක් මා ඉදිරිපත් කර තිබෙනවා. එම කැබිනට් පත්‍රිකාවෙන් අපි බලාපොරොත්තු වුණේ ඉන්දියානු රජය සමඟ අවබෝධතා ගිවිසුමක් අත්සන් කරන්න. එම කැබිනට් පත්‍රිකාව අනුමත වූවාට තවම අවබෝධතා ගිවිසුම අත්සන් කර නැහැ. එම අවබෝධතා ගිවිසුම අනුව මෙරටට ඖෂධ ගෙන්වනවා නම් ඖෂධ සහ නිෂ්පාදකයින් ඖෂධ නියාමන අධිකාරියේ ලියාපදිංචි කිරීමෙන් පසුවයි මෙරටට ගෙන්වන්නේ. දෙවැන්න පසුගිය වසරක කාලය තිස්සේ ලංකාවට ඖෂධ කිහිපයක හිඟතාවයක් තිබෙනවා. වෛද්‍යවරුන් විසින් හඳුනාගත් සෞඛ්‍ය අමාත්‍යාංශයේ නිර්දේශිත ඖෂධ 862ක් ලංකාවේ ඖෂධ සඳහා අන්තර්ගත කර තිබෙනවා. එම ඖෂධ ප්‍රසම්පාදනය කර රෝහල් වෙත ලබාදෙනවා.
පසුගිය වසරකට ආසන්න කාලයක් තිස්සේ හිඟ ඖෂධ 37ක් ලබාගැනීම පිළිබදව ගැටලු මතුවෙලා තිබෙනවා. එයට හේතුව තමයි එම 37න් 21කට ලියාපදිංචි නිෂ්පාදකයින් සිටියත්, ඔවුන් සමහර අවස්ථාවල ප්‍රසම්පාදන ක්‍රියාවලියට සම්බන්ධ වෙලා නැහැ. සමහර අවස්ථාවල ඔවුන් ඉදිරිපත් කළ මිල ගණන් ඉතා අධික මිල ගණන් වෙනවා. තවත් ඖෂධ 16ක් තිබෙනවා ලංකාවේ ලියාපදිංචි කර නොමැති. මෙම ඖෂධ 37 ලබා ගැනීම වෙනුවෙන් සෞඛ්‍ය ලේකම්වරයාට බලය තිබෙනවා, එම බලය වඩා ස්ථාවර කර ගැනීම සඳහා සහ විනිවිදභාවයෙන් යුතුව කටයුතු කිරීමට අවශ්‍ය නිසා තමයි කැබිනට් පත්‍රිකාවක් ඉදිරිපත් කරන ලද්දේ සෘජු ප්‍රසම්පාදන ක්‍රමවේදයක් යටතේ එම ඖෂධ ලබාගැනීම වෙනුවෙන්. එම කැබිනට් පත්‍රිකාව තවම ඉදිරිපත් වුණෙත් නැහැ, අනුමත වෙලාත් නැහැ. නමුත් දැනටමත් මාධ්‍ය හරහා ප්‍රචාරය ලබාදී තිබෙනවා. එම ක්‍රමවේදය යටතේ මිල දී ගත්තත් අප ඉල්ලීමක් කර තිබෙන්නේ ලියාපදිංචි සැපයුම්කරුවන්ගෙන් නොමැති අවස්ථාවල ලෝකයේ එම ඖෂධ නිෂ්පාදනය කළ ප්‍රථම සමාගමෙන් එම ඖෂධය ලබාගැනීමට අවසරය ලබාදෙන්න කියලා.
එසේ කර තිබෙන්නේ සමහර විට ලියාපදිංචි ඖෂධ සැපයුම්කරුවන් මෙයට සැපයුම් නොකරන නිසාත්, නැතිනම් ඔවුන්ගේ ඖෂධ මිල අධික නිසාත් මෙන්ම සමහරවිට ලියාපදිංචි කර නොමැති නිසාත් බව කියන්න අවශ්‍යයි. එවැනි ක්‍රමවේදයක් යටතේ ඖෂධ ගෙන්වනවා නම් කිසි විටෙක හදිසි ප්‍රසම්පාදන ක්‍රියාවලියකින් තොරව නැතිනම් ඔවුන් ලියාපදිංචි කර නැතිනම් එම ඖෂධය අනිවාර්යයෙන්ම ඖෂධ නියාමන අධිකාරියේ ඖෂධ ලියාපදිංචි කිරීමේ ක්‍රමවේදයක් පවතිනවා. ලෝකයේ පිළිගත් රටවල ලියාපදිංචි කර තිබෙනවා නම් අපට ඉතා ඉක්මනින් ලියාපදිංචිය ලබාදෙන්න පුළුවන්. එය ලෝක සෞඛ්‍ය සංවිධානය පිළිගත් ක්‍රමවේදයක්. ඒ හරහා පමණයි ගෙන්වන්නේ. එවිට එම ඖෂධවල ගුණාත්මකභාවය පිළිබඳව කිසිදු ගැටලුවක් ඇති වන්නේ නැහැ.
සෞඛ්‍ය අමාත්‍යවරයා ලෙස මා කටයුතු කරන තාක් කල් සහ මෙම නිලධාරි මණ්ඩලය කටයුතු කරන තාක් කල් අපි නීතිවිරෝධී හෝ රීති විරෝධී හෝ, සම්ප්‍රදාය විරෝධී කිසිම කටයුත්තකට සම්බන්ධ වෙන්න බලාපොරොත්තුවක් නැහැ. එහෙම දෙයක් සිදු වුණෙත් නැහැ. ඉදිරියේදී සිදු වෙන්නෙත් නැහැ."
මෙරටට පසුගිය කාලය පුරා සිදු වුණේ රෝගී ජනතාවට ලබාදීමට නොහැකි වූ ඖෂධ 37 වඩා විනිවිදභාවයකින් යුතුව රටේ ජනතාවට ලබාදීමට කටයුතු කිරීමයි. අද පුවත්පත්වල ද අසත්‍ය මාධ්‍ය වාර්තා පළ වී තිබුණා. සෞඛ්‍ය අමාත්‍යාංශය වෙනුවෙන් කිසිදු නිලධාරියෙක් ඖෂධ ප්‍රසම්පාදනයක් වෙනුවෙන් කිසිම විටෙක ඉන්දියාවට හෝ පිටරටට ගියේ නැහැ. කිහිපවරක් ගිහින් තිබුණා පුහුණු වැඩසටහන් සහ නිෂ්පාදන ඇතුළු කටයුතු පිළිබඳව අවධානය යොමු කරන්න. ඖෂධ නිෂ්පාදන සංස්ථාව විනාශ කර ඖෂධ සැපයුම් ඉන්දියාවට දෙන්න හදනවා කියලා ප්‍රවෘත්තියක් පළ වෙනවා. එම ප්‍රවෘත්තියට පාදක වෙන්නේ රජයකින් රජයකට ගිවිසුමකට ඖෂධ සැපයීම පිළිබදව මා ඉදිරිපත් කළ කාරණය. එය පෞද්ගලික අංශය සම්බන්ධ එකක් නොවෙයි. ගුණාත්මකභාවයෙන් ඉහළ ඖෂධ ඉන්දියාව හරහා ගන්න හැකි නම් අපි ඒක කරනවා. එසේ කරන්නේ රටේ ජනතාව වෙනුවෙන්. නමුත් ඒ සම්බන්ධ අවසන් ගිවිසුමට තවම එළඹ නැහැ. එය වඩා විනිවිදභාවයෙන් රජයන් දෙක අතර කෙරෙන කටයුත්තක්.
රමේෂ්ගේ ඖෂධ ගෙන්වීම ජනපති අත්හිටුවයි කියලා පුවතක් තිබෙනවා. එහි කිසිදු සාධාරණ පදනමක් හෝ එවැනි කටයුත්තක් සිදු වුණේ නැහැ. එසේ කිරීමට අවශ්‍යතාවයක් නැහැ. ජනාධිපතිතුමාත් පවසන්නේ අත්‍යවශ්‍ය ඖෂධ ජනතාවට පුළුවන් තරම් හොඳින් ලබාදෙන්න කියලා. ලංකාවට ඖෂධ ගෙන්වන්න ඉන්දියාවෙන් කිසිදු සමාගමක් තෝරාගෙන නැහැ. එවැනි සිදුවීමක් කෙරෙනවා නම් ඖෂධ නියාමන අධිකාරියේ ලියාපදිංචියට අනිවාර්යයෙන්ම යටත් විය යුතුයි. ලියාපදිංචි නොකළ ඖෂධ ලංකාවට ගෙන්වන්නේ නැහැ. එවැනි ක්‍රියාමාර්ගයකට තවම අප අවතීර්ණ වෙලත් නැහැ. අබබෝධතා ගිවිසුමට තවම දින වකවානු නැහැ, තීන්දු කරලා නැහැ, රජයන් දෙකක් අතර අවබෝධතා ගිවිසුම අත්සන් කරන්න කැබිනට් අනුමැතිය හිමිව තිබෙනවා. මම ලංකාවේ ඖෂධ සමාගම අධ්‍යක්ෂ මණ්ඩල සාමාජිකයෙක් ලෙස කටයුතු කර තිබෙනවා. එය මගේ ජීව දත්ත පෝරමයෙත් තිබෙනවා. ඔය කියන සමාගමේ මම සේවය කර නැහැ."
