2026 අයවැයේ නිවාස ව්‍යාපෘති ප්‍රමාද නැතිව අවසන් කරන්න - ජනපතිගෙන් දැඩි නියෝග

2026 අයවැය ප්‍රතිපාදන යටතේ සැලසුම් කර ඇති සියලුම නිවාස ව්‍යාපෘති නියමිත කාල රාමු තුළ අවසන් කර ප්‍රමාදයකින් තොරව මහජනතාවට භාරදීමට ජනාධිපති අනුර කුමාර දිසානායක මහතා නිලධාරීන්ට දැඩි උපදෙස් ලබාදී ඇත.

කාර්යක්ෂමතාව සහ වගවීම තහවුරු කිරීම සඳහා මෙම ව්‍යාපෘති අධීක්ෂණය තනි සම්බන්ධීකරණ ආයතනයක් යටතේ ක්‍රියාත්මක කිරීමේ අවශ්‍යතාවය ද ජනාධිපතිවරයා අවධාරණය කළේය.

අද (02) ජනාධිපති ලේකම් කාර්යාලයේදී ජාතික නිවාස සංවර්ධන අධිකාරියේ නිලධාරීන් සමඟ පැවති සාකච්ඡාවකදී ජනාධිපතිවරයා මෙම උපදෙස් ලබාදුන්නේය. මෙහිදී “අයිති වීමට ස්ථානයක් - ලස්සන ජීවිතයක්” ජාතික නිවාස වැඩසටහන ඇතුළු 2026 අයවැය යටතේ ක්‍රියාත්මක වන ව්‍යාපෘතිවල සැලසුම් සහ වත්මන් තත්ත්වය සමාලෝචනය කෙරිණි.

විශේෂයෙන්ම, අඩු ආදායම්ලාභී පවුල් සඳහා රුපියල් මිලියන 10,200ක සහ ගැටුම් හේතුවෙන් අවතැන් වූ ප්‍රජාවන් සඳහා රුපියල් මිලියන 5,000ක නිවාස ව්‍යාපෘතිවල ප්‍රගතිය සහ ඉලක්කගත කාලසටහන් ජනාධිපතිවරයා සමීපව පරීක්ෂා කළේය. එසේම, පසුගිය වසරවල ආරම්භ කර තවමත් නිම නොකළ ජාතික නිවාස සංවර්ධන අධිකාරියේ ව්‍යාපෘති කඩිනම් කිරීමට ද අවධානය යොමු විය.

මෙම සාකච්ඡාවට නිවාස, ඉදිකිරීම් සහ ජල සම්පාදන අමාත්‍ය සුසිල් රණසිංහ, නියෝජ්‍ය අමාත්‍ය ටී.බී. සරත්, ජනාධිපති ජ්‍යෙෂ්ඨ අතිරේක ලේකම් රසල් අපොන්සු, අමාත්‍යාංශ ලේකම් ඉංජි. එල්. කුමුදු ලාල් බෝගහවත්ත, භාණ්ඩාගාරයේ ජාතික අයවැය දෙපාර්තමේන්තු අධ්‍යක්ෂ ජනරාල් ජූඩ් නිලුක්ෂාන්, ජාතික නිවාස සංවර්ධන අධිකාරියේ සභාපති ජේ.කේ. අරවින්ද ශ්‍රීනාත් ඇතුළු ජ්‍යෙෂ්ඨ නිලධාරීන් සහභාගී වූහ.