ඉදිරි විදුලි කප්පාදුව ගැන විදුලි බල මණ්ඩලයෙන් විශේෂ දැනුම්දීමක්..!

රට පුරා සිදුවූ විදුලි බිඳවැටීමත් සමග නොරොච්චෝලේ තාප විදුලි බලාගාරය ද මුළුමනින්ම යථා තත්ත්වයට පත් කිරීමට දින 03ක් පමණ ගතවන බව වාර්තා වනවා.

ඒ අනුව විදුලි ඉල්ලුම මත පදනම්ව කෙටි කාලීනව විදුලිය විසන්ධි කිරීමට සිදුවන බවයි විදුලිබල අමාත්‍යාංශය සඳහන් කළේ.

මෙගාවොට් 900ක විදුලිය නිපදවන බලාගාර 03 සම්පූර්ණයෙන්ම ක්‍රියාත්මක වනතුරු එලෙස ඉදිරි දින කිහිපයේ දිවයින පුරා ප්‍රදේශවල එලෙස විටින් විට කෙටිකාලීන විදුලි කප්පාදුවක් සිදුවිය හැකි බව විදුලිබල මණ්ඩලය පැවසුවා.

ප්‍රධාන සම්ප්‍රේෂණ පද්ධතියේ ඇතිවූ තාක්ෂණික දෝෂයක් හේතුවෙන් ඊයේ පෙරවරු 11.30ට පමණ දිවයින පුරා විදුලි සැපයුම බිඳවැටුණි. විදුලිබල මණ්ඩලය පෙන්වා දෙන්නේ මෙලෙස පද්ධතියේ පූර්ණ බිඳවැටීමක් සිදුව ඇත්තේ කොත්මලේ ග්‍රීඩ් උපපොළේ සිට බියගම ග්‍රීඩ් උපපොළ දක්වා විදුලිය රැගෙන එන රැහැන් මාර්ගයේ බිඳවැටීමක ප්‍රතිඵලයක් ලෙස බවය.

හදිසි විදුලි බිඳවැටීම හේතුවෙන් දිවයින පුරා ජනතාව දැඩි අපහසුතාවට පත්වී තිබුණි. මේ අතර අමාත්‍යවරුන්ගේ මාධ්‍ය හමු සහ උත්සව අවස්ථා කිහිපයක්ම පවතින අවස්ථාවේදී විදුලි සැපයුම බිඳවැටීමෙන් ඊට බාධා එල්ලවුණි.

හදිසි විදුලි බිඳවැටීමත් සමඟ අඹතලේ සහ බියගම ජල පවිත්‍රාගාරවල කටයුතු සම්පූර්ණයෙන්ම අඩාලවීමත් සමඟ කොළඹ ඇතුළු තදාසන්න ප්‍රදේශ බොහෝමයක ජල සැපයුමට ද බාධා එල්ලවිය.

ඒ හේතුවෙන් ජලය නොමැතිව ද ජනතාව දැඩි අපහසුතාවට පත්වුණි. එමෙන්ම කන්තලේ ජල පවිත්‍රාගාරයේ කටයුතු ඇණහිටීමත් සමඟ තඹලගමුව, කින්නියා, ත්‍රිකුණාමලය ප්‍රදේශවලද ජල සැපයුම ඇණහිට තිබුණි. ඒ අතර විදුලි සැපයුම ඇණහිටීමත් සමඟ කොළඹ ඇතැම් ඉන්ධන පිරවුම්හල් අසල දිගු පෝළිම්ද දක්නට ලැබුණි.

මේ අතර විදුලිබල මණ්ඩලයේ ඉංජිනේරු සංගමය පවසන්නේ සිය අකුරට වැඩ කිරීමේ වෘත්තිය ක්‍රියාමාර්ගය තාවකාලිකව අත්හිටුවන බවය.