ලෝකයටම භයානක අනතුරු ඇඟවීමක් - සුපර් එල් නිනෝ' නිසා ලක්ෂ 4කට වැඩි පිරිසක් මියයාමේ අවදානමක්

මෙම වසරේ වර්ධනය වෙමින් පවතින ‘එල් නිනෝ’ (El Niño) දේශගුණික සංසිද්ධිය, දෙසැම්බර් මාසයේදී එහි උපරිම තීව්‍රතාවට ළඟා වීමට පෙර තවදුරටත් ශක්තිමත් විය හැකි බව ලෝක කාලගුණ විද්‍යා සංවිධානය (WMO) පවසයි.

එම සංසිද්ධිය 2027 පෙබරවාරි දක්වා පැවතිය හැකි අතර, එහි බලපෑම යටතේ මුහුදු මතුපිට උෂ්ණත්වය වාර්තාගත මට්ටම් කරා ඉහළ යා හැකි බවද ලෝක කාලගුණ විද්‍යා සංවිධානය  සඳහන් කරයි.

  ලෝක කාලගුණ විද්‍යා සංවිධානය  විසින්  නිකුත් කළ මාසික දේශගුණික වාර්තාවට අනුව, එල් නිනෝ තත්ත්වය 2027 පෙබරවාරි දක්වා පැවතීමට සියයට 100කට ආසන්න සම්භාවිතාවක් පවතී.

එමෙන්ම, 1950 වසරේ සිට වාර්තා වී ඇති ප්‍රබලතම එල් නිනෝ සිදුවීම් අතරට මෙය එක්විය හැකි බව ලෝක කාලගුණ විද්‍යා සංවිධානයේ  මහලේකම් සෙලෙස්ට් සවුලෝ (Celeste Saulo) ප්‍රකාශ කළාය. එල් නිනෝ සංසිද්ධියේ ප්‍රධාන කේන්ද්‍රස්ථානය වන මධ්‍යම හා නැගෙනහිර නිවර්තන පැසිෆික් සාගරයේ මුහුදු මතුපිට උෂ්ණත්වය, ඔක්තෝබර් සිට දෙසැම්බර් දක්වා කාලය තුළ සාමාන්‍ය අගයට වඩා සෙල්සියස් අංශක 3.7කින් ඉහළ යා හැකි බව  ලෝක කාලගුණ විද්‍යා සංවිධානය අනාවැකි පළ කරයි.

මෙම උෂ්ණත්ව විචලනය 2015 නොවැම්බර් සිට 2016 ජනවාරි දක්වා වාර්තා වූ පෙර වාර්තාව වන සෙල්සියස් අංශක 2.6ක ඉහළ යාමට වඩා සැලකිය යුතු ලෙස වැඩි අගයකි. සවුලෝ පෙන්වා දෙන්නේ එල් නිනෝ තත්ත්වයට බලපාන සාගර ජලයේ උෂ්ණත්වය මේ දක්වා මැන ඇති ඉහළම මට්ටම්වලට ළඟා වී ඇති බවයි.

එම නිසා සාගරයෙන් වායුගෝලයට මුදා හැරිය හැකි තාප ප්‍රමාණයද ඉහළ යා හැකි බව ඇය සඳහන් කළාය. එල් නිනෝ යනු ලොව පුරා කාලගුණ රටාවලට බලපෑම් කරන ‘එල් නිනෝ–දකුණු දෝලන’ (El Niño–Southern Oscillation – ENSO) දේශගුණික චක්‍රයේ උණුසුම් අවධියයි.

මෙම සංසිද්ධිය ගෝලීය උෂ්ණත්වය ඉහළ නැංවීමට මෙන්ම ලෝකයේ විවිධ ප්‍රදේශවල වර්ෂාපතන රටා වෙනස් කිරීමටද හේතු වේ. එහි ප්‍රතිඵලයක් ලෙස ඇතැම් ප්‍රදේශවල දැඩි නියඟ තත්ත්වයන් ඇති විය හැකි අතර, තවත් ප්‍රදේශවල අධික වර්ෂාපතනය සහ ගංවතුර වැනි තත්ත්වයන් ඇති විය හැකිය. සාමාන්‍යයෙන් එල් නිනෝ තත්ත්වයක් වසර දෙකත් හතත් අතර කාලයකට වරක් ඇති වේ.

මේ අතර, යුරෝපා සංගමයේ කොපර්නිකස් දේශගුණික විපර්යාස සේවය (Copernicus Climate Change Service) අනුව, අගෝස්තු මාසයේ සාමාන්‍ය ගෝලීය උෂ්ණත්වය සෙල්සියස් අංශක 16.96ක් ලෙස වාර්තා වී තිබේ. එය වාර්තාගත උණුසුම්ම මාසය ලෙස සැලකෙන 2023 ජූලි මාසයේ උෂ්ණත්වය සමඟ සම මට්ටමකට පැමිණීමකි.

එමෙන්ම, චිකාගෝ විශ්වවිද්‍යාලයේ Climate Impact Lab හි පර්යේෂකයන් පසුගිය මාසයේදී පළ කළ අනාවැකියකට අනුව, මෙම වසරේ ඇති විය හැකි ‘සුපර් එල් නිනෝ’ (Super El Niño) තත්ත්වය හේතුවෙන් ජූනි මාසයේ සිට 2027 පෙබරවාරි දක්වා කාලය තුළ ලොව පුරා අතිරේක මරණ 451,000ක් පමණ සිදුවිය හැකි බවට ඇස්තමේන්තු කර තිබේ.

සියලුම රජයේ පාසල් දරුවන්ට සුබම සුබ ආරංචියක් - රුපියල් මිලියන 1,614ක් වැය කරයි

දශක හතරක සිනමා ගමන නිමවෙයි- බොලිවුඩ් සිනමාව සොලවාලූ නානා පටේකාර්ගේ හදිසි නික්මයෑම