රුපියල් 5000ට මල් කැකුළක් පරලොව යැවූ පාපතරයන් කොටුවෙයි
Zara
කළුතර ගමගොඩ පාර, රජවත්ත ප්‍රදේශයේ නිවසකට පෙට්‍රල් බෝම්බ ප්‍රහාරයක් එල්ල කරමින් කුඩා දරුවෙකු ඝාතනය කිරීමේ සිදුවීමට අදාළව පුද්ගලයින් දෙදෙනෙකු කළුතර අපරාධ විමර්ශන ඒකකය විසින් අත්අඩංගුවට ගෙන තිබෙනවා.
අදාළ ප්‍රහාරයෙන් කාන්තාවකට ද බරපතළ තුවාල සිදුවී තිබෙනවා.
මෙලෙස අත්අඩංගුවට ගෙන ඇත්තේ, දොඩංගොඩ අක්කර 33 ප්‍රදේශයේ සහ සහ කළුතර කෝන්ගොඩ ප්‍රදේශයේ පදිංචි 23 සහ 25 හැවිරිදි තරුණයින් දෙදෙනෙකි.
සැකකරුවන් 29 වන දා රාත්‍රියේ බෝම්බ ප්‍රහාරය එල්ල කර තිබුණු අතර, බෝම්බ ප්‍රහාරය එල්ල කිරීමට පෙර ඔවුන් පෙට්‍රල් මිලදී ගැනීමට කරදර ප්‍රදේශයේ ඉන්ධන හලකට යන අයුරු CCTV කැමරාවක මෙලෙස සටහන්ව තිබුණා.
සැකකරුවන් ඉකුත් 29 රාත්‍රියේ කළුතර ගමගොඩ ප්‍රදේශයේ නිවසකට පෙට්‍රල් බෝම්බ ප්‍රහාරය එල්ලකර තිබූ අතර, එහිදී එම කාන්තාව තුවාල ලබා එම නිවසට රූපවාහිනි නැරඹීමට පැමිණ සිටී සෙනාල් සංධීප නැමැති පස් හැවිරිදි පිරිමි දරුවෙකු මියගොස් තිබුණි.
මත්කුඩු ජාවරමකට අදාළ මුදල් ගනුදෙනුවක් මත ලබාදුන් කොන්ත්‍රාත්තුවක් අනුව සැකකරුවන් තුවාල ලැබූ කාන්තාව ඉලක්ක කරගනිමින් පෙට්‍රල් බෝම්බ ප්‍රහාරය එල්ලකර තිබෙනවා.
ප්‍රහාරයෙන් පිලිස්සුම් තුවාල ලැබූ දරුවාගේ විලාපය සමග සැකකරුවන් රැගෙන ආ අනෙක් බෝම්බය එල්ල නොකරම පලාගොස් ඇති බව පොලීසිය පැවසුවා.
සැකකරුවන් ප්‍රහාරය සඳහා භාවිතා කළ යතුරුපැදිය, තවත් පෙට්‍රල් බෝම්බයක්, සැදීමට භාවිතා කළ දෑ සහ ජංගම දුරකථන දෙකක්ද සොයාගෙන තිබෙනවා.
කොන්ත්‍රාත්තුව වෙනුවෙන් සැකකරුවන්ට ලැබී ඇත්තේ රුපියල් 5,000ක මුදලක් බවට ද, සිදුකළ වැඩිදුර විමර්ශනවලදී හෙළිව ඇති බව වැටලීමට එක්වූ නිලධාරියෙක් පැවසීය.
සැකකරුවන් කළුතර මහෙස්ත්‍රාත් අධිකරණයට ඉදිරිපත් කිරීමට නියමිතව තිබුණා.
