ගංවතුරින් බිඳවැටුණු ජල සැපයුම් ගැන විශේෂ දැනුම්දීමක්

දිත්වා කුණාටුව ඇතිවූ බරපතල වර්ෂාවන් හා ගංවතුරු හේතුවෙන් දිස්ත්‍රික්ක ගණනාවක ජල සැපයුම් බිඳවැටීම් මතුව ඇති මැද, දින තුනක් ඇතුළත ඒවා සම්පූර්ණයෙන් යථා තත්ත්වයට පත් කිරීමට අවශ්‍ය පියවර ගෙන ඇති බව ජාතික ජලසම්පාදන හා ජලාපවහන මණ්ඩලයේ (NWSDB) සභාපති ඉංජිනේරු ඒ.එම්.පී.සී.ටී. බණ්ඩාර මහතා පැවසීය.

මෙම තත්ත්වය තුළ මහනුවර දිස්ත්‍රික්කයේ ජල පිරිපහදු මධ්‍යස්ථාන හා පොම්පාගාර බරපතල හානිග්‍රස්ත වී ඇති අතර, තිස්සමහාරාම, කතරගම, බදුල්ල, බණ්ඩාරවෙල, වැලිමඩ, අම්පාර, උතුරු මැද, උතුරු සහ වයඹ පළාත්වලද ජල සැපයුම් බිඳවැටී තිබේ.

ජනාධිපති අනුර කුමාර දිසානායක මහතාගේ උපදෙස් මත ත්‍රිවිධ හමුදාව, වාරිමාර්ග දෙපාර්තමේන්තුව, මාර්ග සංවර්ධන අධිකාරිය සහ විදුලිබල මණ්ඩලයේ සහාය ලබාගෙන මෙම පුනරුදය කටයුතු ක්‍රියාත්මක වෙමින් පවතින බව සභාපතිවරයා ත්‍රිවිධ හමුදා ආරක්ෂක මූලස්ථානයේ අද (30) පැවැත්වූ මාධ්‍ය හමුවකදී සඳහන් කළේය.

"ජලයෙන් යටවූ මධ්‍යස්ථානවල පොම්ප ක්‍රියාත්මක කිරීමට නොහැකි වීම හේතුවෙන් බිඳවැටීම් ඇතිවූවත්, බවුසර් ආධාර මගින් අනෙකුත් ප්‍රදේශවලට ජලය ලබාදෙමින්, ඉදිරි දින තුන ඇතුළත සියයට 100ක ජල සැපයුමක් ලබාදෙන බවට සහතිකයක් දෙමි" 

යනුවෙන් ඔහු පැවසීය.