ජාතික සමාජ සංවර්ධන ආයතනය කැලණිය විශ්වවිද්යාලයට අනුබද්ධ කිරීමට සූදානම් – අග්රාමාත්ය හරිනි අමරසූරිය පාර්ලිමේන්තුවේදී කළ හෙළිදරව්ව!
ජාතික සමාජ සංවර්ධන ආයතනය කැලණිය විශ්වවිද්යාලයට අනුබද්ධ කිරීමේ කටයුතු සාකච්ඡා මට්ටමේ ජාතික සමාජ සංවර්ධන ආයතනය (NISD) කැලණිය විශ්වවිද්යාලයට අනුබද්ධ කිරීම සඳහා රජය සැලසුම් කරමින් සිටින බවත්, ඒ සඳහා අවශ්ය ඉදිරි පියවර තීරණය කිරීමට සාකච්ඡා ආරම්භ කර ඇති බවත් අග්රාමාත්ය හරිනි අමරසූරිය මහත්මිය පවසයි.
පාර්ලිමේන්තු මන්ත්රී එම්.එල්.ඒ.එම්. හිස්බුල්ලා මහතා යොමු කළ ප්රශ්නයකට පිළිතුරු දෙමින් අග්රාමාත්යවරිය මේ බව සඳහන් කළාය.
ඒ අනුව, අධ්යාපන, උසස් අධ්යාපන හා වෘත්තීය අධ්යාපන අමාත්යාංශය, විශ්වවිද්යාල ප්රතිපාදන කොමිෂන් සභාව (UGC) සහ කැලණිය විශ්වවිද්යාලය එක්ව යෝජිත අනුබද්ධ කිරීම සඳහා කාලරාමුවක් සකස් කිරීමට කටයුතු කරමින් සිටී.
ජාතික සමාජ සංවර්ධන ආයතනය රාජ්ය ආයතනයක් මිස රාජ්ය නොවන සංවිධානයක් නොවන බැවින්, රාජ්ය නොවන විශ්වවිද්යාල සඳහා අදාළ වන නීතිමය රාමුව එයට අදාළ නොවන බව ද අග්රාමාත්යවරිය පැහැදිලි කළාය.
1978 අංක 16 දරන විශ්වවිද්යාල පනත යටතේ මෙම ආයතනය රාජ්ය විශ්වවිද්යාලයකට අනුබද්ධ කිරීම සඳහා අවශ්ය නීතිමය සහ පරිපාලනමය ක්රියාමාර්ග පිළිබඳව රජය මේ වනවිට සොයා බලමින් සිටින බව ද ඇය සඳහන් කළාය.
මේ සම්බන්ධයෙන් ප්රතිපත්තිමය තීරණයක් 2025 මාර්තු 14 වැනිදා කැබිනට් මණ්ඩලය විසින් ගෙන ඇති අතර, 2026 සැප්තැම්බර් 23 වැනිදා පැවති රැස්වීමකදී අදාළ යෝජනාව විශ්වවිද්යාල ප්රතිපාදන කොමිෂන් සභාව විසින් ද සලකා බලා තිබේ.
ශක්යතා අධ්යයනයක් (Feasibility Study) සිදුකිරීමෙන් අනතුරුව කැලණිය විශ්වවිද්යාලය සමඟ සාකච්ඡා කර ඉදිරි ක්රියාමාර්ග තීරණය කළ හැකි බව විශ්වවිද්යාල ප්රතිපාදන කොමිෂන් සභාව අමාත්යාංශයට දැනුම් දී ඇත.
කෙසේ වෙතත්, යෝජිත අනුබද්ධ කිරීම සම්බන්ධයෙන් තීරණයකට එළඹීමට පෙර කැලණිය විශ්වවිද්යාලයේ සෙනෙට් සභාව සහ අදාළ පීඨ සමඟ සාකච්ඡා කළ යුතු බව ද අග්රාමාත්යවරිය පෙන්වා දුන්නාය.
විශ්වවිද්යාලය සිය ස්ථාවරය විශ්වවිද්යාල ප්රතිපාදන කොමිෂන් සභාව වෙත දැනුම් දීමෙන් පසුව රජයට මෙම ක්රියාවලියේ ඉදිරි පියවර ගැනීමට හැකි වනු ඇති බව ද ඇය පැවසුවාය.
එමෙන්ම, අනුබද්ධ කිරීම සිදුකිරීමෙන් අනතුරුව ජාතික සමාජ සංවර්ධන ආයතනයේ දැනට සේවය කරන කාර්ය මණ්ඩලය විශ්වවිද්යාල පද්ධතියට ඒකාබද්ධ කරගැනීම සඳහා ගත හැකි ක්රියාමාර්ග පිළිබඳව ද ශක්යතා අධ්යයනයේදී අවධානය යොමු කර ඇති බව අග්රාමාත්යවරිය වැඩිදුරටත් සඳහන් කළාය.
5 ශිෂ්යත්ව කඩඉම් ලකුණු නිකුත් වේ- ඔබේ දරුවාට ලැබුණු පාසල දැන්ම ඔන්ලයින් පරීක්ෂා කරගන්න – නිල වෙබ් අඩවිය මෙන්න