සෞඛ්‍ය ක්ෂේත්‍රයේ විශාල ජයග්‍රහණයක් - ආශ්චර්යමත් ගසේ ඇටවලට තියෙන අරුම පුදුම හැකියාව සොයා ගයි

"ආශ්චර්යමත් ගස" වශයෙන් හැඳින්වෙන මුරුංගා ගසෙහි ඇටවලට, පානීය ජලයේ අඩංගු PVC මයික්‍රොප්ලාස්ටික් අංශු 98.5%ක් දක්වා ඉවත් කිරීමේ සුවිශේෂී හැකියාවක් පවතින බවට බ්‍රසීලයේ සහ බ්‍රිතාන්‍යයේ විද්‍යාඥයින් පිරිසක් සොයාගෙන තිබෙනවා.

ඒ අනුව මීට දින කිහිපයකට පෙර ප්‍රකාශයට පත් කරන ලද මෙම පර්යේෂණ වාර්තාවට අනුව, ජලය පිරිපහදු කිරීම වෙනුවෙන් දැනට බහුලව භාවිතා වන රසායනික ද්‍රව්‍යවලට සමාන කාර්යක්ෂමතාවයකින් මුරුංගා ඇට ක්‍රියා කරන බව තහවුරු වී ඇති බව සඳහන්.

එමෙන්ම මුරුංගා ඇට "කැටිකාරකයක්" (Coagulant) වශයෙන් ක්‍රියා කරමින් ජලයේ ඇති කුඩා මයික්‍රොප්ලාස්ටික් අංශු එකිනෙක ඇලවීමට සලස්වන අතර එමඟින් එම අංශු විශාල වී පහසුවෙන් පෙරා ඉවත් කළ හැකි තත්ත්වයට පත් වෙයි.

ඒ අනුව පර්යේෂකයන් අවධානය යොමු කර ඇත්තේ ජලයේ බහුලව දක්නට ලැබෙන හානිකර PVC මයික්‍රොප්ලාස්ටික් ඉවත් කිරීම සම්බන්ධයෙනි.

එමඟින් මිනිස් කෙස් ගසක ඝනකමෙන් හතරෙන් එකක් පමණ වන ඉතා කුඩා අංශු ඉවත් කිරීමට හැකි වී ඇති බව සඳහන්.

එමෙන්ම දැනට භාවිතා වන 'ඇලුමිනියම් සල්ෆේට්' වැනි රසායනික ද්‍රව්‍ය මෙන් නොව, මුරුංගා ඇට ස්වභාවිකව දිරාපත් වන අතර පරිසරයට විෂ සහිත නොවන බවත් ඇලුමිනියම් අධික ලෙස ශරීරගත වීම ස්නායු රෝග ඇති වීමට බලපෑ හැකි බවත් විද්‍යාඥයන් ප්‍රකාශ කරයි.

තවද එක් මුරුංගා ඇටයකින් ජලය ලීටර් 10ක් පමණ පිරිපහදු කළ හැකි බව පර්යේෂකයන් පවසයි.

එසේම විශාල නගරවල ජල පිරිපහදු පද්ධති සඳහා මුරුංගා ඇට විශාල ප්‍රමාණයක් අවශ්‍ය වන බැවින්, මෙම ක්‍රමය දැනට කුඩා ප්‍රජාවන් සඳහා හෝ රසායනික ද්‍රව්‍ය සපයා ගැනීමට අපහසු ප්‍රදේශ සඳහා වඩාත් සුදුසු වනු ඇති බව වාර්තා වේ.

කෙසේ වෙතත් ලොව පුරා නළ ජලයෙන් 83%ක පමණ මයික්‍රොප්ලාස්ටික් අඩංගු බව 2024 අධ්‍යයනයකදී හෙළි වී ඇති පසුබිමක, මෙවැනි ස්වභාවික විසඳුමක් සොයා ගැනීම සෞඛ්‍ය ක්ෂේත්‍රයේ විශාල ජයග්‍රහණයක් වශයෙන් සැලකේ.

එමෙන්ම ඉදිරි පර්යේෂණ මඟින් අනෙකුත් ප්ලාස්ටික් වර්ග සහ ඉතා කුඩා 'නැනෝප්ලාස්ටික්' (Nanoplastics) ඉවත් කිරීමට ඇති හැකියාව පිළිබඳව ද සොයා බැලීමට නියමිත බව සඳහන්. 

ගෑස් සිලින්ඩරය ඉක්මනින් ඉවර වෙනවාද? ගෑස් ඉතිරි කරගන්න කවුරුත් නොදන්නා රහස් 5ක් මෙන්න!