ඉරානයේ නව ශ්‍රේෂ්ඨ නායකයා පත්වේ

ඝාතනයට ලක් වූ ඉරානයේ ශ්‍රේෂ්ඨ නායක අයතුල්ලා අලි කමේනිගේ අනුප්‍රාප්තිකයා ලෙස ඔහුගේ පුත් මොජ්තබා කමේනි පත් කිරීමට ඉරානය පියවර ගෙන ඇති බව රොයිටර් පුවත් සේවය වාර්තා කරයි.

ඊයේ (08) විශේෂඥයන්ගේ සභාව විසින් පැවැත්වූ ඡන්ද විමසීමේදී මොජ්තබා කමේනි ඉදිරියෙන්ම සිටි අපේක්ෂකයා බවත්, අවසන් තීරණය ලෙස ඔහුව නව ශ්‍රේෂ්ඨ නායකයා ලෙස පත් කළ බවත් සඳහන් වේ.

මෙම සභාවේ සාමාජිකයන් 88 දෙනකුගෙන් යුක්ත වන අතර, ඔවුන්ගේ අවසන් ප්‍රකාශය අනුව "අයතුල්ලා සයිද් මොජ්තබා හොසේයිනි කමේනි" ඉස්ලාමීය ජනරජයේ තුන්වන නායකයා ලෙස පත් කර ඇත.

මොජ්තබා කමේනි (වයස 56) සිය පියාගේ යටතේ ඉරාන ආරක්ෂක අංශ තුළ විශාල බලපෑමක් ඇති කළ අයෙකු වන අතර, දැවැන්ත ව්‍යාපාරික ජාලයන් මෙහෙයවන පූජකවරයෙකු ලෙසද ප්‍රකටය.

ඔහු දැඩි මතධාරී ලෙස හඳුනාගෙන ඇති අතර, මෙම පත්වීමත් සමඟ ඉරාන පාලනය දැඩි මතධාරීන් සතුව තවදුරටත් පවතින බවට ඉඟි පළ වී ඇත. මෙය සිදු වන්නේ එක්සත් ජනපදය හා ඊශ්‍රායලය විසින් සිදු කළ ප්‍රහාරවලින් අලි කමේනි ඝාතනය වීමෙන් පසුවය.

එම යුද්ධයේ පසුබිම තුළ මෙම අනුප්‍රාප්තික තේරීම ඉරානයේ දැඩි තීරණයක් ලෙස සැලකේ.

එක්සත් ජනපද ජනාධිපති ඩොනල්ඩ් ට්‍රම්ප් මොජ්තබාගේ පත්වීම "අනුමත නොකළ" බව ප්‍රකාශ කර ඇති අතර, එය ඉරානයේ තීරණයට විරුද්ධත්වයක් ලෙස දක්නට ලැබේ.  

වියළි කාලගුණය රට පුරා – පස්වරු 2ට පස්සේ දකුණේ ස්වල්ප වැසි පමණයි