කතරගම දේවාලයේ ආධාර මුදලින් - අපේක්ෂා රෝහලේ ළමා වාට්ටුව ‘කතරගම දෙවියන්ට පිං පිණිස විවෘත කළේ මෙහෙමයි. - (PHOTOS)
Wayomi
කතරගම දෙවියන්ට පිං පිණිස රුහුණු මහා කතරගම දේවාලයට බැතිමතුන් විසින් ලබාදෙන ආධාර මුදලින් ශ්‍රී ලංකා ගුවන් හමුදාවේ විරෝධාර රණවිරුවන්ගේ ශ්‍රමදායකත්වයෙන් ඉදිකරන ලද මහරගම අපේක්ෂා රෝහලේ සිව්මහල් ළමා වාට්ටු සංකීර්ණය අද (03) වන දින පෙ.ව 8.30 විවෘත කරනු ලැබුවා.
මෙම අවස්ථාවට කතරගම දේවාලයේ බස්නායක නිලමේ ඩිල්ෂාන් වික්‍රමරත්න , සෞඛ්‍ය අමාත්‍යාංශයේ ලේකම් විශේෂඥ වෛද්‍ය පාලිත මහීපාල ඇතුළු අමුත්තන් රැසක් සහභාගි වී සිටියා.
ශ්‍රී ලංකා ගුවන් හමුදාවේ ව්‍යාපෘති කළමණාකරණය සහ ඉදිකිරිම යටතේ 2023.09.21 දින ඉදිකිරිම් ආරම්භ කළ මෙම සිව්මහල් වාට්ටු සංකීර්ණයට වැය වී ඇති මුදල රුපියල් මිලියන 150 කි. ව්‍යාපෘතිය සදහා මාස 08 ක කාලයක් වෙන් කර තිබුනි.
මෙම ගොඩනැගිල්ලේ වාස්තු විද්‍යා සැළසුම්කරණය RAPA Chartered Architects ආයතනය යටතේ නිර්මාණ ශිල්පීන් නොමිලේ තම සේවාවන් ලබාදි ඇති අතර, දෙමාපිය සහ දරුවන්ගේ මනස නිරවුල්ව තබාගත හැකි අන්දමින් එම කටයුතු සිදු කර ඇත.
කිසිදු අයෙකුගේ නමක් ගමක් නොමැතිව ‘කතරගම දෙවියන්ට පිං පිණිස’ යනුවෙන් පමණක් සමරු පලකයේ සඳහන් කිරීමට කටයුතු කර තිබු අතර, අපේක්ෂා රෝහලේ නේවාසික රෝගී දරුවන් ඇතුළු පිරිසකගේ ප්‍රධානත්වයෙන් එම වාට්ටු සංකීර්ණය විවෘත විය.
