කාවේරි ජල ගැටලුවේ උණුසුම නිසා විජේගේ ‘Jana Nayagan’ කර්ණාටකයේ ප්‍රදර්ශනය නවතී

කාවේරි ගංගා ජලය තමිල්නාඩුවට මුදාහැරීම සම්බන්ධයෙන් කර්ණාටකයේ පැවැත්වෙන විරෝධතා හේතුවෙන් තමිල් නළු විජේ රංගනයෙන් දායක වන ‘Jana Nayagan’ චිත්‍රපටයේ ප්‍රදර්ශන කටයුතු කිහිපයක් අත්හිටුවීමට සිදුව තිබේ.

කාවේරි ජල බෙදාහැරීමේ ගැටලුව සම්බන්ධයෙන් ගොවීන් සහ කන්නඩ හිතවාදී සංවිධාන විසින් පැවැත්වෙන විරෝධතා උත්සන්න වීමත් සමඟ කර්ණාටකයේ සිනමා ශාලා කිහිපයක් ආරක්ෂක හේතු මත චිත්‍රපට ප්‍රදර්ශන නතර කිරීමට පියවර ගෙන ඇත. වාර්තා වන පරිදි, ඇතැම් සිනමා ශාලා පරිශ්‍රවල තිබූ විජේගේ පෝස්ටර් සහ ප්‍රචාරක බැනර් ඉවත් කර ඇති අතර, නීතිය හා සාමය සම්බන්ධ ගැටලු ඇතිවීම වැළැක්වීම සඳහා මෙම පියවර ගෙන තිබේ.

විජයගේ ‘ජන නායගන්’ සිනමා පටයට චෙන්නායි රසිකයින්ගෙන් උණුසුම් ප්‍රතිචාර

ජූලි 23 වැනිදා තිරගත කිරීම ආරම්භ කළ ‘Jana Nayagan’ චිත්‍රපටය කර්ණාටකයේ සිනමා ශාලා 125ත් 150ත් අතර සංඛ්‍යාවක ප්‍රදර්ශනය කෙරුණු අතර, එයට තනි තිර සිනමා ශාලා 75කට වැඩි සංඛ්‍යාවක් සහ බහු තිර සිනමා ශාලා 50කට ආසන්න සංඛ්‍යාවක් ඇතුළත් විය.

කාවේරි විරෝධතා තවදුරටත් ව්‍යාප්ත වීමත් සමඟ සිනමා ශාලා හිමියන් කිහිපදෙනෙකු ස්වෙච්ඡාවෙන්ම ප්‍රදර්ශන අත්හිටුවීමට තීරණය කර ඇත. බැංගලෝරයේ උර්වාෂි සිනමා ශාලාවේ ‘Jana Nayagan’ ප්‍රදර්ශන පොලිස් උපදෙස් මත නතර කර ඇති අතර, එහි තිබූ චිත්‍රපට පෝස්ටර් සහ කටවුට් ඉවත් කර ඒ වෙනුවට ‘Karavali’ නම් කන්නඩ චිත්‍රපටය ප්‍රදර්ශනය කර තිබේ.

කාවේරි විරෝධතා පැවැත්වෙන කාලය තුළ කිසිදු නොසන්සුන් තත්ත්වයක් ඇති නොවීම සඳහා උර්වාෂි සිනමා ශාලාව ඉදිරිපිට පොලිස් ආරක්ෂාවද යොදවා ඇත. එමෙන්ම මණ්ඩ්‍යා ප්‍රදේශයේදී කන්නඩ හිතවාදී ක්‍රියාකාරීන් විසින් ‘Jana Nayagan’ චිත්‍රපටයේ ප්‍රචාරක බැනර් ඉවත් කර ඇති බවද වාර්තා වේ.

මෙම තත්ත්වය හමුවේ කර්ණාටක චිත්‍රපට වාණිජ මණ්ඩලය ද චිත්‍රපට ප්‍රදර්ශන අවලංගු කිරීම සම්බන්ධයෙන් සාකච්ඡාවක් කැඳවා ඇත. කාවේරි ජල කළමනාකරණ අධිකාරිය විසින් කාවේරි ජල නියාමන කමිටුවේ නිර්දේශය අනුව දිනකට කියුසෙක් 3,500 බැගින් දින 15ක් තමිල්නාඩුවට ජලය මුදාහැරීමට අනුමැතිය ලබාදී තිබේ.

කෙසේ වෙතත්, කර්ණාටකයේ කන්නඩ සංවිධාන සහ ගොවි සංවිධාන මෙම තීරණයට විරෝධය පළ කරමින් පවසන්නේ තම ප්‍රාන්තයද ජල හිඟයකට මුහුණ දී ඇති බැවින් මෙවැනි ජල මුදාහැරීම් ගොවීන්ට අහිතකර බලපෑමක් ඇති කරන බවයි.

මේ අතර, තමිල්නාඩු කොංග්‍රස් පාර්ලිමේන්තු මන්ත්‍රී කාර්ති චිදම්බරම් පවසා ඇත්තේ කාවේරි ජල කළමනාකරණ මණ්ඩලයේ තීරණ සම්පූර්ණයෙන් ක්‍රියාත්මක කළ යුතු බවයි.

ඔහු සඳහන් කළේ, කාවේරි ගැටලුව සම්බන්ධයෙන් පවතින එකඟතා, නියෝග සහ මණ්ඩල තීරණවලට සියලු පාර්ශ්ව ගරු කළ යුතු බවයි.

දෙමළ සිනමාව කැළඹූ 'ඉදයම්' චිත්‍රපටයට වසර 35යි - 2026 දී අලුත්ම කතාවකින් එන 'ඉදයම් මුරලි' මෙන්න

දවස් හතරක් එක දිගට කෑම ලෝකෙක තනි වෙන්න ආසද? Reecha Food Festival කෑම පිස්සෙක්ට කියාපු දවසක් මෙන්න