12 දෙනෙකුට දිවි අහිමි කළ ගුවන් අනතුර
Dilasha
හොන්ඩුරාස් හි කැරිබියන් වෙරළට ඔබ්බෙන් පසුගිය සඳුදා රාත්‍රියේ ගුවන් යානයක් කඩා වැටීමෙන් පුද්ගලයින් 12 දෙනෙකු මිය ගොස් ඇති අතර හතර දෙනෙකු දිවි ගලවා ගත් අතර එක් අයෙකු තවමත් අතුරුදහන් වී ඇති බව විදෙස් මාධ්‍ය වාර්තා කළේය.
පසුගිය සඳුදා හොන්ඩුරාස් ප්‍රධාන භූමිය අසල කැරිබියානු දූපතකින් ගුවන් ගත වී තත්පර කිහිපයකට පසු මෙම කුඩා මගී ගුවන් යානය කඩා වැටීමෙන් එහි සිටි 17 දෙනාගෙන් පස් දෙනෙකු හැර අනෙක් සියල්ලන්ම මිය ගිය බව බලධාරීන් ප්‍රකාශ කළේය.
මියගිය අය අතර ජනප්‍රිය හොන්ඩුරාස් සංගීතඥයෙකු සහ දේශපාලනඥයෙකු වන ඕරෙලියෝ මාටිනෙස් ද සිටින බව විදෙස් මාධ්‍ය වාර්තා කළේය.
ජෙට්ස්ට්‍රීම් 32 ගුවන් යානය පසුගිය සඳුදා සවස රෝටන් දූපතේ ගුවන් තොටුපළකින් පිටත් වන විට මගීන් 15 දෙනෙකු සහ කාර්ය මණ්ඩල සාමාජිකයින් දෙදෙනෙකු රැගෙන ගොස් ඇති බව හොන්ඩුරාස් සිවිල් ගුවන් සේවා ඒජන්සිය නිවේදනයක් නිකුත් කරමින් ප්‍රකාශ කර තිබේ.
ගුවන් යානයේ ගමනාන්තය රටේ උතුරු වෙරළ තීරයේ ආසන්න නගරයක් වන ලා සීබා බව සඳහන් වේ.
යානයේ සිටි පුද්ගලයින්ගෙන් 12 දෙනෙකු මිය ගොස් පස් දෙනෙකු දිවි ගලවා ගත් බව හොන්ඩුරාස් ජාතික පොලිසිය ප්‍රකාශ කළේය.
අනතුර සිදු වූ ස්ථානය අසල වැඩ කරමින් සිටි ධීවරයින් විසින් දිවි ගලවා ගත් අය සාගරයෙන් පිටතට ගත් බව අනතුර සිදු වූ ස්ථානයට ආසන්නයේ පිහිටි සැන්ටොස් ගාඩියෝලා මහ නගර සභාවේ ගිනි නිවන භට ප්‍රධානී ෆ්‍රෑන්ක්ලින් බෝර්ජාස් ප්‍රකාශ කර තිබේ.
අනතුරට ලක් වූ ධීවරයින්ගෙන් එක් අයෙකු වන ඇල්ඩෙයාර් ඇලෙමන් සඳහන් කර සිටියේ, "ඔවුන් කම්පනයට පත් වෙලා සිටියේ. ඔවුන්ට අවශ්‍ය වුණේ බෝට්ටුවට නැගීමට පමණයි" ඔහු පැවසීය.
සමහර අයගේ සිරුරුවලින් ඇටකටු නෙරා ගොස් තිබූ බවත්, තවත් සමහරුන්ගේ මුහුණේ දරුණු තුවාල තිබූ බවත් ඔහු සඳහන් කළ බව වාර්තා වේ.
ගුවන් යානය තුළ ජලය යට සිරවී සිටි සහය නියමුවාගේ සිරුර පිටතට ගැනීමට බලධාරීන් තවමත් උත්සාහ කරමින් සිටින බව බෝර්ජාස් මහතා වැඩිදුරටත් සඳහන් කළේය.
යානය කඩා වැටුණු ප්‍රදේශය ගල්පර වලින් වටවී ඇති බැවින් සංචලනය දුෂ්කර වීම හේතුවෙන් යානයේ කළු පෙට්ටිය නැවත ලබා ගැනීමට වැඩි කාලයක් ගත වන බව ඔහු සඳහන් කළේය.
අනතුරින් දිවි ගලවා ගත් පස් දෙනා ගුවන් යානයකින් සැන් පේද්‍රෝ සුලා නගරයේ රෝහලකට ප්‍රවාහනය කළ බව වාර්තා වේ. තවත් එක් පුද්ගලයෙකු සොයා තවමත් පරීක්ෂණ පවත්වන බව ද සඳහන් වේ.
