අනුරාධපුරයේදී වෛද්‍යවරිය සිද්ධියකට ස්ට්‍රයික් දාපු දොස්තරලා මීගමුව රෝහලේ තරුණියකට අතවර කළ වෛද්‍යවරයා ගැන සද්ද නැහැ!
Shehan
මීගමුව දිස්ත්‍රික් මහ රෝහලේ බාහිර රෝගී අංශයට ප්‍රතිකාර ලබා ගැනීමට පැමිණි තරුණියකට එහි වෛද්‍යවරයෙකු විසින් ලිංගික හිංසනයක් සිදුකළ බවට වූ සිදුවීමක් සහ ඊට ප්‍රතිචාර වශයෙන් රජයේ වෛද්‍ය නිලධාරීන්ගේ සංගමය (GMOA) "තමන්ට වගකීමක් නැතැයි" පවසමින් දුන් පිළිතුර ආන්දෝලනයට තුඩු දිය හැකි බවට සාකච්ඡාවට ලක්වෙමින් තිබේ.
වින්දිත තරුණිය මීගමුව රෝහලට ප්‍රතිකාර සඳහා පැමිණි අවස්ථාවේදී වෛද්‍යවරයෙකු විසින් ශාරීරික අතවරයක් සිදුකර ඇයට හිංසා කළ බවට පොලිසියට ඉදිරිපත් කළ පැමිණිල්ලේ සඳහන් වේ. මේ සම්බන්ධයෙන් රජයේ වෛද්‍ය නිලධාරීන්ගේ සංගමයේ මාධ්‍ය ප්‍රකාශක වෛද්‍ය චමිල් විජේසිංහ ප්‍රකාශ කළේ, චෝදනා එල්ල වී ඇති වෛද්‍යවරයා එම සංගමයේ සාමාජිකත්වයෙන් ඉවත් කරන ලද පුද්ගලයෙකු බවයි.
පසුගියදා අනුරාධපුරයේදී වෛද්‍යවරියකට සාමාන්‍ය පුද්ගලයෙකු අතින් අතවරයක් සිදුවූ අවස්ථාව බැරෑරුම් ලෙස සලකා කටයුතු කළ මෙම සංගමය, එම පුද්ගලයා අත්අඩංගුවට ගන්නා ලෙස ඉල්ලමින් සහ වෛද්‍යවරුන්ගේ පහසුකම්වල ගැටලු මතු කරමින් දිවයින පුරා වැඩ වර්ජනයක් ද සංවිධානය කළේය.
නමුත් මෙවර සිදුව ඇත්තේ ඊට ප්‍රතිවිරුද්ධ තත්ත්වයක් වන අතර, සාමාන්‍ය පුද්ගලයෙකු වෛද්‍යවරයෙකුගෙන් අතවරයට ලක්ව ඇත. මේ සම්බන්ධයෙන් මීගමුව රෝහලෙන් වාර්තාවක් ඉල්ලා ඇති අතර, එහිදී හෙළි වූ එක් කරුණක් වන්නේ අදාළ වෛද්‍යවරයා මීට පෙර ද රජයේ වෛද්‍ය නිලධාරීන්ගේ ව්‍යවස්ථාව උල්ලංඝනය කළ පුද්ගලයෙකු බවයි. ඔහු 2021 වසරේදී විනය විරෝධී හැසිරීම් හේතුවෙන් සංගමයේ සාමාජිකත්වයෙන් නෙරපා හරින ලදී.
GMOA හි සම්පූර්ණ නිවේදනය :
මීගමුව දිස්ත්‍රික් මහ රෝහලේ ප්‍රතිකාර ලබා ගැනීමට පැමිණි තරුණියක් විසින් සිදු කරන ලද පැමිණිල්ල මීගමුව දිස්ත්‍රික් මහ රෝහලේ බාහිර රෝගී අංශයට ප්‍රතිකාර ලබා ගැනීම සඳහා පැමිණි තරුණියක්, එහිදී ඇයව පරීක්ෂා කළ වෛද්‍යවරයෙක් විසින් ලිංගික හිංසනයකට ලක් කරනු ලැබුවේ යයි සිදු කරන ලද පොලිස් පැමිණිල්ලක් පිළිබඳ තොරතුරු මාධ්‍ය හරහා වාර්තා වී ඇත.
අදාල සිදුවීම සම්බන්ධයෙන්, රජයේ වෛද්‍ය නිලධාරීන්ගේ සංගමයේ මීගමුව දිස්ත්‍රික් මහ රෝහල් ශාඛාවෙන් ලබාගත් තොරතුරු වලට අනුව මෙම සිදුවීමට අදාල වෛද්‍යවරයා, අප සංගමයේ ව්‍යවස්ථාව උල්ලංඝනය කරමින් විනය විරෝධීව හැසිරීම හේතුවෙන් වසර කීපයකට පෙර රජයේ වෛද්‍ය නිලධාරීන්ගේ සංගමයේ සාමාජිකත්වයෙන් නෙරපා හරින ලද අයෙකු බව තහවුරු කරන ලදී. එසේ වුවත්, රජයේ රෝහලක් තුළ සිදුවුණු මෙම බරපතල සිදුවීම සම්බන්ධයෙන් අපක්ෂපාති පරීක්ෂණයක් සිදුකර වහාම නීතිය ක්‍රියාත්මක කර වැරදිකරුවන් සම්බන්ධයෙන් දැඩි ක්‍රියාමාර්ග ගත යුතු බව අප විශ්වාස කරන අතර, එම විමර්ශන සඳහා රජයේ වෛද්‍ය නිලධාරීන්ගේ සංගමයේ උපරිම සහයෝගය ද ලබාදෙනු ඇත.
සෞඛ්‍ය සේවාව තුළ පමණක් නොව සමස්ත සමාජය තුළද කාන්තාවගේ ආරක්ෂාව තහවුරු විය යුතු බව අප තරයේ විශ්වාස කරන අතර ඒ වෙනුවෙන් වඩා ශක්තිමත් ප්‍රතිපත්තියක් සහ වැඩපිළිවෙළක් ඉදිරියේදී ස්ථාපිතකිරීම වෙනුවෙන් අවශ්‍ය නායකත්වය ලබාදීමට ද රජයේ වෛද්‍ය නිළධාරීන්ගේ සංගමය සුදානම් බව අවධාරණය කරමු.
ස්තූතියි.
[
