ශ්‍රී ලංකා කෞතුක වස්තු ආපසු ගැනීමට කමිටුවක්

 පෘතුගාලයේ දැනට රඳවා ඇති ශ්‍රී ලාංකික කෞතුක වස්තු ආපසු ලබා දීම පිළිබඳ මූලික අධ්‍යයනයක් සිදු කිරීම සඳහා ඒකාබද්ධ කමිටුවක් පිහිටුවීමට ශ්‍රී ලංකා විදේශ අමාත්‍ය විජිත හේරත් සහ පෘතුගාල විදේශ අමාත්‍ය පාවුලෝ රැන්ගල් එකඟ වූහ. 

විදේශ කටයුතු අමාත්‍යාංශයේ පැවති නිල රැස්වීමකදී, පෘතුගීසි පාලන සමයේදී රැගෙන ගිය කෞතුක වස්තු සම්බන්ධයෙන් අමාත්‍ය හේරත් විසින් ඉදිරිපත් කරන ලද යෝජනාවට අමාත්‍ය රැන්ගල් සහාය පළ කළ අතර, එම යෝජනාව පිළිගත යුතු බවත්, ඒ පිළිබඳව අධ්‍යයනය කිරීම සඳහා ඒකාබද්ධ කමිටුවක් පිහිටුවන බවත් ප්‍රකාශ කළේය. ශ්‍රී ලංකාව සහ පෘතුගාලය අතර සංස්කෘතික ගිවිසුම ක්‍රියාත්මක කිරීම කෙරෙහි ද සාකච්ඡාවේදී අවධානය යොමු වූ අතර, එය ක්‍රියාත්මක කිරීම පිළිබඳව තවදුරටත් සංවාදයක් ආරම්භ කිරීමට සැලසුම් කර ඇත.

ලෝක බෞද්ධ සංඝ සම්මේලනය ශ්‍රී ලංකාවේදී!

නවදිල්ලිය හරහා පෘතුගාලයට යාමට අවශ්‍ය ශ්‍රී ලාංකිකයින් මුහුණ දෙන වීසා දුෂ්කරතා පිළිබඳ ගැටළුව අමාත්‍ය හේරත් මතු කළේය. ශ්‍රී ලාංකික සංචාරකයින් සඳහා වඩාත් පහසු යාන්ත්‍රණයක් සංවර්ධනය කිරීම පිළිබඳව සොයා බලන බවට අමාත්‍ය රැන්ගල් සහතික විය.

ඓතිහාසික සබඳතා මත පදනම්ව සංස්කෘතික හා මානව සබඳතා ශක්තිමත් කිරීම පිළිබඳව ද අමාත්‍යවරුන් දෙදෙනා සාකච්ඡා කළ අතර ආයෝජන, වෙළඳාම, සංචාරක සහ පුනර්ජනනීය බලශක්ති ක්ෂේත්‍රයේ සහයෝගීතාව වැඩි දියුණු කිරීම සඳහා වැඩසටහන් සංවර්ධනය කිරීමට එකඟ විය.

ද්විපාර්ශ්වික සබඳතා ඉදිරියට ගෙන යාම සඳහා දේශපාලන සංවාද යාන්ත්‍රණයක් ස්ථාපිත කිරීම සහ අන්‍යෝන්‍ය වැදගත්කමක් ඇති කලාපීය සහ ගෝලීය ගැටළු විසඳීම පිළිබඳව දෙපාර්ශ්වයම අවධාරණය කළහ.

එක්සත් ජාතීන්ගේ සංවිධානය තුළ අඛණ්ඩ සහයෝගීතාව ද නැවත තහවුරු කරන ලදී. ඊට අමතරව, ඩිට්වා සුළි කුණාටුවෙන් පසු පෘතුගාලයේ හදිසි ආපදා සහන ආධාර සඳහා අමාත්‍ය හේරත් මහතා කෘතඥතාව පළ කළ අතර ශ්‍රී ලංකාවේ ප්‍රතිසංස්කරණ කටයුතු සඳහා තවදුරටත් සහාය ඉල්ලා සිටියේය.

අද ඩොලරයේ මිල ගණන්