විජයගේ ‘ජන නායගන්’ සිනමා පටයට චෙන්නායි රසිකයින්ගෙන් උණුසුම් ප්‍රතිචාර

තලපති විජේගේ බොහෝ බලාපොරොත්තු තැබූ නවතම චිත්‍රපටය වන Jana Nayagan අද (23) සිනමා ශාලාවල තිරගත කිරීම ආරම්භ කර තිබේ.

මාස හයකට ආසන්න කාලයක් සහතික කිරීම සම්බන්ධයෙන් වාරණ මණ්ඩලය සමඟ පැවති ගැටලු හේතුවෙන් ප්‍රමාද වූ මෙම චිත්‍රපටය නැරඹීම සඳහා ඉන්දියාව ඇතුළු ලොව පුරා විජේ රසිකයන් උදෑසන දර්ශන වෙත එක්වී ඇත.

චිත්‍රපටය තිරගත වීමත් සමඟ සමාජ මාධ්‍ය ජාලා ඔස්සේ රසික ප්‍රතිචාර විශාල වශයෙන් පළ වෙමින් පවතී.

චිත්‍රපටයේ පළමු භාගය අවසන් වීමට පෙර දර්ශනය වන විශේෂ ටයිටල් කාඩ් එකක් මේ වන විට රසිකයන් අතර දැඩි අවධානයට ලක්ව තිබේ.

එම ටයිටල් කාඩ් එකේ විජේගේ නම විශේෂ නාම තුනක් සමඟ ඉදිරිපත් කර ඇත.

එහි පළමුව “තලපති විජේ” ලෙසත්, දෙවනුව “ඉලය තලපති විජේ” ලෙසත්, තෙවනුව “තමිල්නාඩු ගරු ප්‍රධාන අමාත්‍යවරයා” ලෙසත් සඳහන් කර ඇති බව වාර්තා වේ.

මේ හේතුවෙන් සමාජ මාධ්‍ය තුළ බොහෝ රසිකයන් “Title card peaked” යනුවෙන් සිය ප්‍රතිචාර පළ කර තිබේ. ‘ඉලය තලපති’ සිට ‘තලපති’ දක්වා විජේගේ ගමන විජේට “ඉලය තලපති” (තරුණ නායකයා යන අර්ථය) යන නාමය ලබා දී ඇත්තේ ඔහුගේ පියා වන චිත්‍රපට අධ්‍යක්ෂ එස්. ඒ. චන්ද්‍රසේකර් විසින් 1994 වසරේදීය. එය විජේ නැගී එන ජනප්‍රිය වීර චරිතයක් ලෙස ස්ථාපිත කිරීමේ අරමුණින් භාවිත කළ නාමයක් විය.

පසුව ඔහුගේ සිනමා ප්‍රතිරූපය සහ සමාජ දූෂණයට එරෙහිව සටන් කරන නායක චරිත වැඩිවීමත් සමඟ 2017 වසරේදී අධ්‍යක්ෂ ඇට්ලි විසින් “ඉලය” යන කොටස ඉවත් කර “තලපති” යන නාමය භාවිත කළේය. එතැන් සිට “තලපති” යන නාමය විජේගේ තිර ප්‍රතිරූපය, බොක්ස් ඔෆිස් ජනප්‍රියත්වය සහ දැවැන්ත රසික පදනම නියෝජනය කරන සංකේතයක් බවට පත්ව තිබේ.

''මම භාවනා කරමින් සීතා මෑණියන්ට යාච්ඤා කළා'' - සීතා මෑණියන්ගේ චරිතය රඟපෑම ආශීර්වාදයක් බව සායි පල්ලවි කියයි

දේශපාලනයට පිවිසීම සහ Tamilaga Vettri Kazhagam (TVK) දේශපාලන පක්ෂය ආරම්භ කිරීමෙන් පසු එම නාමය ඔහුගේ පොදු අනන්‍යතාවයේ කොටසක් බවටද පත්ව ඇත. රසික ප්‍රතිචාර ඉහළට චිත්‍රපටයේ ටයිටල් කාඩ් දර්ශනය පිළිබඳව රසිකයන් සමාජ මාධ්‍ය ඔස්සේ දැඩි උද්යෝගයෙන් ප්‍රතිචාර දක්වා තිබේ.

එක් රසිකයෙකු සඳහන් කර ඇත්තේ, “තලපති මෝඩ් එක ආරම්භයි” යනුවෙනි. තවත් රසිකයෙකු සඳහන් කර ඇත්තේ, “වසර ගණනාවක් පුරා ප්‍රේක්ෂකයන්ට අමතක නොවන අවස්ථා ලබාදුන් විජේ මහතාගේ ගමනේ Jana Nayagan තවත් විශේෂ සන්ධිස්ථානයක් වනු ඇතැයි විශ්වාස කරනවා” යනුවෙනි.

චෙන්නායි නගරයේදීද රසිකයන් චිත්‍රපට නිකුතුව උත්සවයක් ලෙස සමරමින් සිටින බව වාර්තා වේ. ආදායම් වාර්තා පිළිබඳ අවධානය දකුණු ඉන්දීය චිත්‍රපට වෙළෙඳ විශ්ලේෂක රමේෂ් බාලා පවසන්නේ Jana Nayagan චිත්‍රපටය ඉන්දියාවේ පෙර වෙන්කිරීම් හරහා රුපියල් කෝටි 20ක පමණ ආදායමක් ලබා ඇති බවයි.

විදේශ පෙර වෙන්කිරීම් ආදායම රුපියල් කෝටි 15ක් පමණ වන බවද ඔහු සඳහන් කර ඇත.

පළමු දිනයේ ආදායම පිළිබඳව ඔහු අනාවැකි පළ කරමින් ඉන්දියාව තුළ රුපියල් කෝටි 60ක් සහ ලොව පුරා රුපියල් කෝටි 90ක් පමණ ආරම්භක ආදායමක් ලැබිය හැකි බව සඳහන් කර තිබේ.

පළමු සති අන්තය සඳහා ඉන්දියාව තුළ රුපියල් කෝටි 150ත් 180ත් අතර සහ ලොව පුරා රුපියල් කෝටි 250ක පමණ ආදායමක් අපේක්ෂා කරන බවද ඔහු පවසා ඇත.

විජේගේ අවසන් සිනමා ගමනද? විජේගේ ප්‍රධාන නළුවෙකු ලෙස 69 වැනි සහ අවසන් චිත්‍රපටය ලෙස ප්‍රචාරය වන ජන නායගන්ට (Jana Nayagan), ඔහුගේ දේශපාලන ගමනට පෙර රසිකයන්ට ලබාදෙන සමුගැනීමේ සිනමා නිර්මාණයක් ලෙස සැලකේ.

එච්. විනෝත් අධ්‍යක්ෂණය කළ මෙම චිත්‍රපටය KVN Productions විසින් නිෂ්පාදනය කර ඇති අතර, වාර්තා වන පරිදි එහි නිෂ්පාදන වියදම ඉන්දීය රුපියල් කෝටි 500කට ආසන්නය. පූජා හෙග්ඩේ, බොබී ඩියෝල් සහ මමිතා බයිජු ඇතුළු ජනප්‍රිය නළු නිළියන් රැසක් රංගනයෙන් එක්වන අතර, සංගීතය අනිරුද් රවිචන්දර් විසින් නිර්මාණය කර ඇත.

විජේගේ පෙර චිත්‍රපට වන Leo සහ The Greatest of All Time (GOAT) ලබාගත් ආදායම් වාර්තා අභිබවා යාමට ජන නායගන්ට (Jana Nayagan) සමත් වේද යන්න පිළිබඳව මේ වන විට සිනමා ක්ෂේත්‍රයේ දැඩි අවධානය යොමුව තිබේ.

Welcome to the Jungle නිසා බොලිවුඩයම හෙල්ලෙයි- සුපිරි තරු ගොඩක් එක්ක කොමඩි රැල්ල ආයෙත් එයිද?