බස් ගාස්තු සම්බන්ධයෙන් විශේෂ තීරණයක්

මෑතකාලීනව සිදුවූ බස් ගාස්තු සංශෝධනයත් සමග මගීන් සහ බස් කොන්දොස්තරවරුන් අතර ඇතිවී තිබෙන ගැටලු සම්බන්ධයෙන් අවධානය යොමු කළ බව ජාතික ගමනාගමන කොමිෂන් සභාව පවසයි. 

 ඇතැම් බස්රථ බස් ගාස්තු සංශෝධනය ක්‍රියාත්මක නොකිරීමත් ඊට අදාළ ඉතිරි මුදල් මගීන්ට ලබානොදීමත් හමුවේ මෙම මතගැටුම් මතුවී තිබේ. ඉකුත් කොරෝනා වසංගත සමයේදී බස් ගාස්තු මිල වැඩි කළ අතර ඩීසල් මිල අඩුවීම හේතුවෙන් බස් ගාස්තු මෙලෙස යළි සංශෝධනයකට ලක්විය. 

ඒ අනුව බස් මගීන්ට බස්රථ තුළදී සිදුවෙන අපහසුතා සැලකිල්ලට ගෙන සංශෝධනය කරන ලද බස් ගාස්තු මිල දර්ශනය බස්රථ තුළ ප්‍රදර්ශනය කිරීමට මෙලෙස තීරණය කර තිබේ. මිල දර්ශනය සියලුම බස් කොන්දොස්තරවරුන් වෙත ලබාදීමට ද තීරණය කළ බව ජාතික ගමනාගමන කොමිෂන් සභාව පැවසීය.

සියලුම අන්තර් පළාත් බස්රථ සඳහා ද මෙම තීරණය ක්‍රියාත්මක කෙරෙනු ඇත.