ගුවන් හමුදාවෙන් විශේෂ පණිවිඩයක්

ශ්‍රී ලංකා ගුවන් හමුදාව විසින් සහන මෙහෙයුම්වල නිරත වන ප්‍රදේශවල, ඩ්‍රෝන යානා ක්‍රියාත්මක කිරීමෙන් වළකින ලෙස ඉල්ලීමක්  කර තිබේ.

ඒ අනුව නිවේදනයක් නිකුත් කරමින් ගුවන් හමුදාව ප්‍රකාශ කර ඇත්තේ, මානුෂීය ආධාර සහ ආපදා සහන මෙහෙයුම් අතරතුර ඩ්‍රෝන මෙහෙයුම් ක්‍රියාත්මක කිරීම ශ්‍රී ලංකා ගුවන් හමුදාව මඟින් කරනු ලබන ගුවන් මෙහෙයුම් සඳහා අවදානම් තත්ත්වයක් ඇති බවයි.

ඒ අනුව ගුවන් අවකාශයේ අනවසර ඩ්‍රෝන යානා පැවතීම ගුවන් ගමන් මාර්ගවලට සහ මුදාගැනීමේ සහ සහන මෙහෙයුම්වලට බාධා කළ හැකි අතර ගුවන් යානා අනතුරු සිදුවීමට ඉඩ ඇති බව ද ගුවන් හමුදාව අවධාරණය කරයි.

ගුවන් හමුදාව නිකුත් කළ නිවේදනයේ වැඩිදුරටත් සදහන් වෙන්නේ එවැනි සිදුවීම් යානයේ සිටින ගුවන් කාර්ය මණ්ඩල සාමාජිකයින්ගේ ජීවිත, ගුවන් යානා සහ භූමියේ සිටින පුද්ගලයින්ට බරපතළ තර්ජනයක් එල්ල කරන බවයි.

ඒ වගේම ශ්‍රී ලංකා ගුවන් හමුදාව මහජනතාවගෙන් මෙම ඉල්ලා සිටින්නේ මේ වන විට ගුවන් හමුදාව විසින් ක්‍රියාත්මක කරන මානුෂීය ආධාර සහ ආපදා සහන ‍මෙහෙයුම්වල ආරක්ෂාව සහ කාර්යක්ෂමතාව සහතික කිරීම සඳහා සහයෝගය දෙන ලෙසයි.

තවද ශ්‍රී ලංකා ගුවන් හමුදාව මහජනතාවගෙන් ඉල්ලා සිටින්නේ සියලුම ඩ්‍රෝන යානා ක්‍රියාත්මක කිරීමට පෙර එම යානා ගුවන්ගත කිරීමේ සහ ගොඩබෑමේ වේලාවන් පිළිබඳව පහත අංක අමතා දැනුම් දෙන ලෙසයි.

සාමාන්‍ය දුරකථන: 0112343970 / 0112343971

ක්ෂණික දුරකථන: 115