කුසල් ගේ නායකත්වයෙන් රෙඩ්ස් කණ්ඩායමට 20 යි 20 විශිෂ්ඨ ජයක්..

Cricket Sri Lanka Cricket
මාස 1 කට පෙර
Aruna

Aruna

ශ්‍රී ලංකා ක්‍රිකට් ආයතනයේ සංවිධානයෙන් කොළඹ ආර්. ප්‍රේමදාස ක්‍රීඩාංගණයේ දී පැවැති ආරාධිත 20 - 20 ක්‍රිකට් තරගාවල‍ියේ ශූරතාව දිනාගැනීමට කුසල් මෙන්ඩිස් නායකත්වය දැරූ රෙඩ්ස් කණ්ඩායම සමත් වුණා.

ඒ, ඊයේ (16) පැවැති අවසන් මහ තරගයේ දී බ්ලූස් කණ්ඩායමට එරෙහි ව කඩුලු 7ක ජයක් වාර්තා කරමින්.

ජයග්‍රහණය සඳහා ලකුණු 137ක ඉලක්කයක් හඹාගිය රෙඩ්ස් ක්‍රීඩකයන් ඕවර 16.5ක් අවසානයේ කඩුලු 3ක් පමණක් දැවී පහසුවෙන් ම එම ඉලක්කය සපුරාගත්තා.

නායකත්වයේ පිතිහරඹයක නිරත වූ කුසල් මෙන්ඩිස් පන්දු 45ක දී හයේ පහරක් සහ හතරේ පහර 4ක් සමඟ නො දැවී ලකුණු 56ක් රැස්කරමින් සිය කණ්ඩායම ජයග්‍රහණය කරා රැගෙන ගියා.

ලසිත් කෘස්පුල්ලේ සමඟ එක් ව පළමු කඩුල්ල වෙනුවෙන් පන්දු 29ක දී ලකුණු 49ක සම්බන්ධතාවක් ගොඩනැඟූ කුසල්, ඉන් නො නැවතී වනිඳු හසරංග සමඟ ද එක් ව සිවු වැනි කඩුල්ල වෙනුවෙන් පන්දු 22ක දී ලකුණු 36ක නො බිඳුණ සම්බන්ධතාවක් ද ගොඩනැඟුවේ, රෙඩ්ස් කණ්ඩායමේ ජයග්‍රහණය තහවුරු ‍කරමින්.

පන්දු 15කට මුහුණ දුන් ලසිත් හයේ පහරකින් සහ හතරේ පහර 2කින් සිය ඉනිම සැරසූ අතර, පන්දු 14ක දී වාර්තා වූ වනිඳුගේ ඉනිමට හතරේ පහර 4ක් ඇතුළත් වුණා. කමිඳු මෙන්ඩිස් පන්දු 18කින් ලකුණු 18ක් රැස් කළේ, එක් හයේ පහරක් සමඟින්.

එහි දී බ්ලූස් කණ්ඩායම වෙනුවෙන් ලකුණු 34කට කඩුලු 2ක් දවාගැනීමට ප්‍රවීන් ජයවික්‍රම සමත් වුණා.

පළමුවෙන් පන්දුවට පහර දුන් බ්ලූස් කණ්ඩායමට රෙඩ්ස් පන්දු යවන්නන්ගේ දක්ෂ පන්දු යැවීම හමුවේ ඕවර 20 අවසන් වන විට කඩුලු 6ක් දැවී ලබාගත හැකි වූයේ, ලකුණු 136 ක් පමණ යි.

මහීෂ් තීක්ෂණ ලකුණු 22කට කඩුලු 2 ක් ද අසිත ප්‍රනාන්දු ලකුණු 31කට කඩුලු 2ක් ද දවාගනිමින් බ්ලූස් පිතිකරුවන් පීඩනයට ලක් කළා.

බ්ලූස් කණ්ඩායමේ වැඩි ම ලකුණු ලාභියා බවට පත් වූ අෂේන් බණ්ඩාර පන්දු 30ක දී හතරේ පහර 4ක් සමඟ නො දැවී ලකුණු 40ක් රැස් කරමින් ඉනිම නිමා වන තෙක් ම කඩුල්ලේ රැඳී සිටියා.

ආරම්භක පිතිකරු ළහිරු උදාර පන්දු 40ක දී හතරේ පහර 4ක් සමඟ ලකුණු 37ක් ද නායක ධනංජය ද සිල්වා පන්දු 30ක දී හතරේ පහර 4ක් සමඟ ලකුණු 25ක් ද රැස් කළා.

තරගාවලියේ වීරයා ලෙස තරග 4ක දී කඩුලු 10ක් දවාගත් අසිත ප්‍රනාන්දු සම්මාන දිනාගත් අතර, දක්ෂතම පිතිකරුවා සහ අවසන් තරගයේ වීරයා ලෙස කුසල් මෙන්ඩිස් ද දක්ෂතම පන්දු යවන්නා ලෙස ප්‍රවීන් ජයවික්‍රම ද සම්මාන ලැබුවා.


සිව්දෙසින් ගලා එන තොරතුරු සැමට කලින්, එසැනින් දැන ගන්න පුවත් WhatsApp,වෙත පිවිසෙන්න.... 
Join now