විද්‍යා ඝාතන නඩුවේ චූදිතයින්ට එල්ල වූ මරණ දඬුවම් නියෝගයෙන් ඔවුන් නිදහස් වේවිද?...
Piyumika
2015 වසරේ මහත් ආන්දෝලනයකට තුඩු දුන් යාපනයේ පාසල් සිසුවියක වූ සිවලෝගනාදන් විද්‍යා ඝාතන සිද්ධිය සම්බන්ධයෙන් මරණීය දණ්ඩනය නියම වී සිටින විත්තිකරුවන් විසින් එම දඬුවමට එරෙහිව ඉදිරිපත් කළ අභියාචනය විභාග කිරීම සඳහා ශ්‍රේෂ්ඨාධිකරණය දින නියම කෙරුණා.
ඒ අභියාචනය අද (06) ප්‍රීති පද්මන් සූරසේන, ජනක් ද සිල්වා සහ සම්පත් අබේකෝන් යන මහත්වරුන්ගේ සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබූ අවස්ථාවේදියි.
එහිදී නීතිපතිවරයා වෙනුවෙන් පෙනී සිටි රජයේ අධි නීතිඥවරයා අධිකරණය හමුවේ කරුණු දක්වමින් මෙම අභියාචනය විභාග කිරීම සඳහා දින නියම කරන ලෙස ඉල්ලා සිටියා.
ඒ අනුව අදාළ අභියාචනය එළැඹෙන අගෝස්තු මස 25 වැනිදා විභාගයට ගැනීමට ත්‍රිපුද්ගල විනිසුරු මඩුල්ල නියම කළා.
2015 වසරේ යාපනයේ පාසල් සිසුවියක වන සිවලෝගනාදන් විද්‍යා පැහැරගෙන ගොස් දූෂණය කර මරා දැමීමේ චෝදනාවට වරදකරු කෙරුණු විත්තිකරුවන් හත් දෙනෙකුට යාපනය ත්‍රිපුද්ගල මහාධිකරණ විනිසුරු මඩුල්ලක් විසින් මරණීය දණ්ඩනය නියම කෙරුණා.
ත්‍රිපුද්ගල මහාධිකරණය විසින් තමන්ට එම දඬුවම් නියම කර තිබෙන ආකාරය නීතියට පටහැනි බවත් එබැවින් මහාධිකරණ තීන්දුව අහෝසි කොට තමන්ව සියලු චෝදනාවලින් නිදොස් කොට නිදහස් කරන ලෙස ඉල්ලා විත්තිකරුවන් විසින් මෙම අභියාචනා ඉදිරිපත් කර තිබෙනවා.
You may like this video
