ලංකාවට එන ඉන්දියානු සංචාරකයින්ට සුබ ආරංචියක්- Pine Labs සහ WEBXPAY එකතු වී UPI ගෙවීම් ශ්‍රී ලංකාවට ගෙනෙයි

ශ්‍රී ලංකාවට පැමිණෙන ඉන්දීය සංචාරකයින්ට තමන්ට හුරුපුරුදු ඩිජිටල් ගෙවීම් ක්‍රම භාවිත කරමින් මෙරට තුළදී ඉතා පහසුවෙන් ගනුදෙනු කිරීමේ අවස්ථාව සැලසීම අරමුණු කරගනිමින්, ප්‍රමුඛ මූල්‍ය තාක්ෂණික (Fintech) සමාගම් දෙකක් වන Pine Labs සහ WEBXPAY උපායමාර්ගික හවුල්කාරිත්වයකට එළඹ තිබේ.

මෙම හවුල්කාරිත්වය යටතේ ඉන්දීය සංචාරකයින්ට ඉන්දියාවේ අතිශය ජනප්‍රිය ඒකාබද්ධ ගෙවීම් අතුරුමුහුණත (UPI - Unified Payments Interface), බැංකු කාඩ්පත් සහ අන්තර්ජාල බැංකු සේවා ඇතුළු ගෙවීම් ක්‍රම රැසක් භාවිත කරමින් ශ්‍රී ලංකාවේදී සෘජුවම ගනුදෙනු කිරීමට හැකි වේ. ගෙවීම් ක්‍රම රැසක් එකම පද්ධතියකට: ඉන්දියානු මහ බැංකුව අනුමත කළ PA-CB (Payment Aggregator Cross-Border) රාමුව යටතේ ශ්‍රී ලංකාවේ ගෙවීම් එකතු කිරීමේ සේවා සපයන සමාගම් දෙකක් අතර මෙවැනි හවුල්කාරිත්වයක් ඇති වූ පළමු අවස්ථාව මෙය ලෙස වාර්තා වේ.

මෙම නව වැඩපිළිවෙළ යටතේ WEBXPAY වෙළෙඳ ජාලය වෙත පහත ගෙවීම් පහසුකම් එක්වේ

 UPI සහ UPI AutoPay: ඉන්දියාවේ බහුලව භාවිත වන ක්ෂණික ගෙවීම් පද්ධතිය. ඉන්දීය බැංකු කාඩ්පත්:

ප්‍රධාන ඉන්දීය බැංකු විසින් නිකුත් කරනු ලබන සියලුම ඩෙබිට් සහ ක්‍රෙඩිට් කාඩ්පත්. අන්තර්ජාල බැංකු සේවා: ඉන්දියාවේ බැංකු 100කට අධික සංඛ්‍යාවක Net Banking පහසුකම්.

වාරික ගෙවීම් (Easy EMI): භාණ්ඩ හා සේවා මිලදී ගැනීමේදී වාරික වශයෙන් ගෙවීම් කිරීමේ පහසුකම. 

මෙම සේවාව ලබාගැනීම සඳහා මෙරට වෙළෙඳුන්ට තමන් දැනට භාවිත කරන ගෙවීම් පද්ධති (Payment Systems) වෙනස් කිරීමට අවශ්‍ය නොවීම විශේෂත්වයකි.

එමෙන්ම, ගෙවීම් පියවීම (Settlement) ඊළඟ ව්‍යාපාරික දිනයේදීම (Next Business Day) සිදුවන බැවින් මෙරට ව්‍යාපාරිකයින්ගේ මුදල් ප්‍රවාහයට එය දැවැන්ත පිටුවහලක් වනු ඇත. සංචාරක සහ සිල්ලර වෙළෙඳ ක්ෂේත්‍රයට නව පිබිදීමක්: 2025 වසර තුළදී පමණක් ඉන්දීය සංචාරකයින් 530,000කට අධික පිරිසක් ශ්‍රී ලංකාවට පැමිණ ඇති අතර, ඒ අනුව ඉන්දියාව ශ්‍රී ලංකාවේ විශාලතම සංචාරක වෙළෙඳපොළ බවට පත්ව තිබේ.

Pine Labs සහ WEBXPAY සමාගම්වල නියෝජිතයින් පෙන්වා දෙන්නේ, සංචාරක, ආගන්තුක සත්කාර (Hospitality) සහ සිල්ලර වෙළෙඳ (Retail) ක්ෂේත්‍රවල ව්‍යාපාරිකයන්ට මෙම පහසුකමෙන් විශාල ආදායම් වර්ධනයක් ලබාගත හැකි බවයි.

ජාත්‍යන්තර සංචාරකයින් මුහුණ දෙන මුදල් හුවමාරු කිරීමේ බාධා අවම කරමින්, ශ්‍රී ලංකාවේ ඩිජිටල් ගෙවීම් පද්ධතිය ජාත්‍යන්තර සංචාරක වෙළෙඳපොළ සමඟ සෘජුව සම්බන්ධ කිරීමට ලැබීම මෙරට ආර්ථිකයට ලැබුණු වැදගත් ඉදිරි පියවරකි.

ඩොලරයට සාපේක්ෂව ශ්‍රී ලංකා රුපියල සුළු වශයෙන් අවප්‍රමාණය වෙයි - බැංකු මට්ටමේ අලුත්ම විනිමය අනුපාත මෙන්න