ඉරානයට එරෙහිව අඛණ්ඩව යුද වදිනවා- ඊශ්‍රායල අගමැති

ඊශ්‍රායල අග්‍රාමාත්‍ය බෙන්ජමින් නෙතන්යාහු මහතා පවසා ඇත්තේ, ඉරානයට එරෙහිව යුද්ධය අඛණ්ඩව පවත්වාගෙන යන බවත්, එය ඊශ්‍රායලය විසින් අමෙරිකාව යුද්ධයකට පෙළඹුවේ නොවන බවත්ය.

ඊයේ (19) පැවති මාධ්‍ය හමුවකදී ඔහු මෙසේ ප්‍රකාශ කළ අතර, අමෙරිකානු ජනාධිපති ඩොනල්ඩ් ට්‍රම්ප් මහතාගේ ඉල්ලීම මත ඉරානයේ බලශක්ති මූලාශ්‍රයන්ට පහරදීම් නවතා දැමූ බවද සඳහන් කළේය.

ඔහු තහවුරු කළේ, ඉරානයේ සවුත් පාර්ස් (ලෝකයේ විශාලතම ස්වභාවික වායු නිධිය) සම්බන්ධ පිරිපහදු මධ්‍යස්ථානයට ඊශ්‍රායලය විසින් එල්ල කළ ප්‍රහාරය "ඊශ්‍රායලය තනිවම" සිදු කළ බවත්ය. මෙම ප්‍රහාරයට ප්‍රතිචාර වශයෙන් ඉරානය විසින් ගල්ෆ් කලාපයේ බලශක්ති මධ්‍යස්ථාන කිහිපයකට බැලිස්ටික් මිසයිල ප්‍රහාර මාලාවක් එල්ල කළ බව විදෙස් මාධ්‍ය වාර්තා කරයි.

එම ප්‍රහාර එල්ල වූ ස්ථාන අතර:

කටාර් රාජ්‍යයේ රාස් ලැෆාන්  – විශාල හානි සහ ගිනි ගැසීම් සිදුව ඇති බව කටාර් බලධාරීන් පවසයි.

මසායිද් හෝල්ඩිංග් ආයතනය (කටාර්).

එක්සත් අරාබි එමීර් රාජ්‍යයේ අල්-හොස්න් ගෑස් පිරිපහදුව.

සෞදි අරාබියේ සැම්රෙෆ් පිරිපහදුව සහ අල් ජුබයිල් කාර්මික නගරය.

කුවේට්හි මිනා අබ්දුල්ලා තෙල් පිරිපහදුවට ඩ්‍රෝන ප්‍රහාරයක් එල්ල වී ගින්නක් ඇති වී ඇත.

ඩොලර් 115 ඉක්මවා ගිය බොරතෙල් මිලට අලුත් හැරවුමක්

ඉරාන විප්ලවීය ආරක්ෂක බලකාය (IRGC) ප්‍රකාශ කළේ, මෙම ප්‍රහාර "අපගේ බලයෙන් කුඩා කොටසක්" පමණක් භාවිතා කළ බවත්, ඉරාන බලශක්ති යටිතල පහසුකම් නැවතත් ඉලක්ක කළහොත් "සම්පූර්ණ විනාශය දක්වා" ප්‍රතිප්‍රහාර එල්ල කරන බවත්ය. කටාර් රජය රාස් ලැෆාන් ප්‍රහාරය සඳහා ඉරානය සෘජුව වගකිව යුතු බව චෝදනා කර ඇති අතර, ඉරාන තානාපති කාර්යාලයේ ආරක්ෂක හා යුධ උපදේශකවරයාට පැය 24ක් තුළ රටෙන් පිටව යන ලෙස නියෝග කර ඇත.

ඉරානය මෙම ප්‍රහාර පිටුපස අමෙරිකාව සහ ඊශ්‍රායලය සිටින බව චෝදනා කර ඇති අතර, ආර්ථික විචාරකයන් මෙය කලාපීය බලශක්ති යුද්ධයක පෙර නිමිත්තක් ලෙස හඳුන්වයි.

සවුත් පාර්ස් නිධිය ඉරානයේ දේශීය ගෑස් අවශ්‍යතාවයෙන් 70%කට වැඩි ප්‍රමාණයක් සපයයි. මේ අතර, ඉරාන පාර්ලිමේන්තුවේ සාකච්ඡා කර ඇත්තේ හෝමුස් සමුද්‍ර සන්ධිය හරහා ගමන් කරන නෞකා සඳහා ගාස්තු හා බදු අය කිරීමේ යෝජනාවකි.

එය සම්මත වුවහොත්, එම මාර්ගය භාවිතා කරන රටවල් ඉරානයට ගෙවීම් කළ යුතුය. මෙම තත්ත්වය හේතුවෙන් ලෝක බොරතෙල් හා ගෑස් මිල ඉහළ ගොස් ඇති අතර, යුද්ධය පෙබරවාරි අගභාගයේ සිට ආරම්භ වී මේ වන විට බලශක්ති යටිතල පහසුකම් ඉලක්ක කරන නව අදියරකට පත්ව ඇත.

බලශක්ති අර්බුදය මැද—විදුලියට බදු අඩු කිරීමට යුරෝපා සැලසුම