කාන්තාවන් 14ක් විවාහ කරගෙන පොලිස් දැලට මාට්ටු වුණු හැටි - "ඒ මදිවට බැංකුවකින් කෝටි 13කුත් පන්නලා"

"ATM කාඩ්පත් 11ක්, ක්‍රෙඩිට් කාඩ්පත් 4ක්..."

ඔඩීෂා ප්‍රාන්තයේ කේන්ද්‍රපාරා දිස්ත්‍රික්කයේ 54 හැවිරිදි පුද්ගලයෙකු රජයේ නිලධාරියෙකු ලෙස කටයුතු කරමින් රට පුරා කාන්තාවන් කිහිප දෙනෙකු විවාහ කරවා ගැනීම සම්බන්ධයෙන් අත්අඩංගුවට ගෙන තිබෙනවා.

රමේෂ් චන්ද්‍ර ස්වේන් හෙවත් බිදු ප්‍රකාශ් ස්වේන් හෙවත් රමණි රන්ජන් ස්වේන් අපරාධකාරයා ලෙස පිළිගෙන තිබෙනවා.

පසුගිය වසරේ ජූලි මාසයේදී, දිල්ලි අධ්‍යාපන නිලධාරිනියක් ඔහුට එරෙහිව විධිමත් පැමිණිල්ලක් කළ විට මෙම පුද්ගලයා අත්අඩංගුවට ගනු ලැබුවා.

මධ්‍යම සෞඛ්‍ය අමාත්‍යාංශයේ ජ්‍යෙෂ්ඨ සාමාන්‍ය අධ්‍යක්ෂ මට්ටමේ සේවකයෙකු ලෙස කටයුතු කරමින් සිටියදී ස්වේන් 2018 දී දිල්ලි ආර්ය සමාජ මන්දිරයේදී වෙනත් කාන්තාවක් සමඟ විවාහ වී තිබෙනවා.

තමා රවටා ඇති බව දැනගත් පසු කාන්තාව තම සහකරුට එරෙහිව නඩුවක් ගොනු කළා.

පොලිස් පරීක්‍ෂණවලදී මෙම පුද්ගලයා සිදුකළ වංචා රැසක්‌ අනාවරණය වුණා. ඔහුගේ මෙහෙයුම් ක්‍රමයට ව්‍යාජ අනන්‍යතාවයක් භාවිතා කිරීමද ඇතුළත් වෙනවා.

මෙම පුද්ගලයා සෞඛ්‍ය අමාත්‍යාංශයේ සහකාර අධ්‍යක්ෂවරයකු ලෙස පෙනී සිටිමින් කාන්තාවන් 14 දෙනෙකු විවාහ කරගෙන තිබෙනවා. පරීක්ෂකයන්ට අනුව, මොහු මැදිවියේ තනිකඩ කාන්තාවන් ගොදුරු කර තිබෙනවා. ඔහු විවාහයෙන් පසු තම බිරිඳ දරුවන් බිහි කල පසු ඔවුන් හැර යාමට පුරුදුව සිට තිබෙන අතර වින්දිතයින් අතර නීතීඥයින්, ගුරුවරුන්, වෛද්‍යවරුන් සහ විශ්ව විද්‍යාල සිසුවියන් ද සිටිනවා.

ඔහු රිමාන්ඩ් භාරයට පත් කිරීමෙන් වංචනික මුදල් ගණුදෙණු පිළිබඳවද තොරතුරු අනාවරණය වී තිබෙනවා.

ඔහුගේ බදු දී ඇති දේපළෙන් ATM කාඩ්පත් 11ක්, ක්‍රෙඩිට් කාඩ්පත් 4ක් පොලිස් භාරයට ගෙන තිබෙනවා. 2006 වසරේ බැංකු 13කින් රුපියල් කෝටියක් සොරකම් කිරීම සම්බන්ධයෙන් ස්වේන් කේරළ පොලිසියට හසු වුණා. වෛද්‍ය විද්‍යාලවලට ඇතුළත් කර දෙන බවට තරුණ තරුණියන් වංචා කිරීම සම්බන්ධයෙන්ද හයිද්‍රාබාද් විශේෂ පොලිස් කණ්ඩායම ඔහු අත්අඩංගුවට ගෙන තිබෙනවා.