හදිසියේ ගාස්තු වැඩි කිරීමක් සම්බන්ධයෙන් ජනතාවට දැනුම්දීමක්.(VIDEO)

විදුලි සංදේශ සේවා සපයන සමාගම්වලට අත්තනෝමතික ලෙසින් සේවා ගාස්තු මිල ඉහළ දැමීමට කිසිදු අවසරයක් නැතැයි විදුලි සංදේශ නියාමන කොමිෂන් සභාව පවසනවා.

එම කොමිසමේ තරඟකාරීත්ව අධ්‍යක්ෂ ඉන්ද්‍රජිත් හඳපාන්ගොඩ මහතා පෙන්වා දෙන්නේ ඒ පිළිබඳව මුදල් අමාත්‍යාංශයේ පැහැදිලි කිරීම අදාළ ආයතන වෙත යොමු කර ඇති බවයි.

භාණ්ඩ හා සේවා මත පැනවෙන 2.5%ක සමාජ ආරක්ෂණ දායකත්ව බද්ද හේතුවෙන් විදුලි සංදේශ ගාස්තු හා මුදල් ගෙවා නරඹන රූපවාහිනි නාලිකා ගාස්තු (PAY TV) වැඩිකිරීමට දුරකථන සහ අන්තර්ජාල සේවා සැපයුම් සමාගම් පියවර ගෙන තිබෙනවා.

ඒ සම්බන්ධයෙන් ලැබුණු පැමිණිලි මත විමර්ශන ආරම්භ කළ විදුලි සදේශ නියාමන කොමිෂන් සභාව මුදල් අමාත්‍යාංශයෙන් ලබා ගත් පැහැදිලි කිරීම අදාළ සේවා සැපයුම් සමාගම්වලට යොමු කළා.

මේ අතර ජනතාව පිට බර පටවන දුරකථන සමාගම්වලට විරුද්ධව ගන්නා ක්‍රියාමාර්ග පිළිබඳවල කොමිෂන් සභාව ජනතාව දැනුවත් කළ යුතු බවල සමස්ත ලංකා කොමියුනිකේෂන් හිමියන්ගේ සංගමය පවසනවා.