කුක් දූපත්හි වසර 3ක් අතරමං වූ ශ්‍රී ලාංකික අම්මාගේ සංවේදී කතාව - වීසා ප්‍රශ්න හතක් නිසා ගෙදර එන්න බැරුව විඳින දුක මෙන්න

වසර තුනකට ආසන්න කාලයක් කුක් දූපත්හි (Cook Islands) අතරමංව සිටින ශ්‍රී ලාංකික කාන්තාවක් සම්බන්ධයෙන් නව තොරතුරු අනාවරණය වී තිබේ. ආගමන විගමන උපදෙස් සහ අවස්ථා කිහිපයකදී වීසා අයදුම්පත් ප්‍රතික්ෂේප වීම හේතුවෙන් ඇයට යළි ශ්‍රී ලංකාවට පැමිණීමට නොහැකි වී ඇති බව බීබීසී පුවත් සේවය වාර්තා කරයි.

බීබීසී වාර්තාවට අනුව, මෙම කාන්තාව 50 හැවිරිදි රුචිරා රණසිංහ මහත්මියයි. මූල්‍ය දුෂ්කරතා හේතුවෙන් තමන් පවත්වාගෙන ගිය කුඩා ටී-ෂර්ට් නිෂ්පාදන කර්මාන්ත ශාලාව වසා දැමීමට සිදුවීමෙන් අනතුරුව ඇය 2018 වසරේදී ශ්‍රී ලංකාවෙන් පිටත්ව ගොස් තිබේ.

මුලින්ම හොංකොං වෙත ගොස් රැකබලා ගන්නියක ලෙස සේවය කළ ඇය, 2022 දෙසැම්බර් මාසයේදී නවසීලන්තය බලා පිටත්ව ගොස් එහිදී දේශපාලන රැකවරණය (Asylum) සඳහා අයදුම් කර ඇත.

කෙසේ වෙතත්, නවසීලන්තයෙන් තාවකාලිකව පිටව වෙනත් රටක සිට රැකියා වීසා බලපත්‍රයක් සඳහා අයදුම් කරන ලෙස ආගමන විගමන උපදේශකයෙකු ඇයට උපදෙස් ලබාදී ඇති බව බීබීසී වාර්තාවේ දැක්වේ.

ඒ අනුව කුක් දූපත් වෙත ගිය රුචිරා රණසිංහ මහත්මිය ඉදිරිපත් කළ රැකියා වීසා අයදුම්පත ප්‍රතික්ෂේප වී තිබේ. එමෙන්ම නවසීලන්තයෙන් පිටව යාම හේතුවෙන් දේශපාලන රැකවරණ අයදුම්පතට අදාළව ඇය සතුව තිබූ වීසා බලපත්‍රයේ කොන්දේසි ද උල්ලංඝනය වී ඇත.

මේ අතර, නවසීලන්තය හරහා ගමන් කිරීම සඳහා ඇය ඉදිරිපත් කළ වීසා අයදුම්පත් තුනක් සහ ඕස්ට්‍රේලියාව හරහා ගමන් කිරීම සඳහා ඉදිරිපත් කළ අයදුම්පත් හතරක් ද ප්‍රතික්ෂේප වී තිබේ.

එම තත්ත්වය හමුවේ ශ්‍රී ලංකාවට යළි පැමිණීම සඳහා ප්‍රායෝගික ගමන් මාර්ගයක් සොයා ගැනීම ඇයට දැඩි අභියෝගයක් වී ඇති බව බීබීසී වාර්තා කරයි. හවායි හෝ ටහිටි (Tahiti) හරහා ගමන් කිරීමට ඇය දැරූ උත්සාහයන් ද සාර්ථක වී නොමැත.

ඊට හේතුව වී ඇත්තේ අදාළ වීසා නිකුත් කිරීමේ ක්‍රියාවලියේදී අවශ්‍ය ජෛවමිතික දත්ත ලබාදීමේ අවශ්‍යතාව සපුරාලීමට නොහැකි වීමයි. නොවැම්බර් මාසයේදී විවාහ වීමට නියමිත එකම පුත්‍රයා සිටින රුචිරා රණසිංහ මහත්මිය, කෙසේ හෝ යළි මව්බිමට පැමිණීමට තමන් දැඩි කැමැත්තෙන් පසුවන බව ප්‍රකාශ කර තිබේ.

"ඔවුන් ඉල්ලා සිටින ඕනෑම දෙයක් කිරීමට මම සූදානම්. මට අවශ්‍ය කෙසේ හෝ නැවත ගෙදර යාමටයි" යනුවෙන් ඇය බීබීසී වෙත පවසා ඇත.

මේ අතර, කුක් දූපත්හි හෝටලයක් විසින් ඇයට නොමිලේ නවාතැන් පහසුකම් සලසා දී ඇති අතර, ප්‍රදේශවාසීන් ද ආහාර, ඇඳුම් පැළඳුම් ඇතුළු අත්‍යවශ්‍ය ද්‍රව්‍ය ලබාදෙමින් ඇයට සහාය වන බව වාර්තාවේ සඳහන් වේ.

නවසීලන්තය හරහා වෙනත් රටකට ගමන් කිරීම (Transit) ඇයගේ සැබෑ අරමුණ ද යන්න පිළිබඳව බලධාරීන් තුළ සැකයක් පැවතීම හේතුවෙන් ඇයගේ වීසා අයදුම්පත් ප්‍රතික්ෂේප කළ බව ආගමන නවසීලන්තය (Immigration New Zealand) ආයතනය බීබීසී වෙත ප්‍රකාශ කර තිබේ.

සංගක්කාරට ඩබ්ලින්වලදී වුණු අකරතැබ්බයට රයන්එයාර් එකෙන් අමුතු උත්තරයක්- වර්ගවාදී චෝදනාවලට මඟහැර පිළිතුරු

වාහන ආදායම් බලපත්‍ර ලබා ගැනීමට හෝ අලුත් කිරීමට - අද සිට ක්‍රියාත්මක වන අති විශේෂ නිතිය මෙන්න