යුරෝපයේ විශාලතම න්‍යෂ්ටික බලාගාරයට රුසියාවෙන් ප්‍රහාරයක්!!.කලාපයේ අවධානම් තත්ත්වයක්.

රුසියාවේ හමුදා ප්‍රහාරයකින් පසු යුරෝපයේ විශාලතම න්‍යෂ්ටික බලාගාරය වන යුක්රේනයේ Zaporizhzia න්‍යෂ්ටික බලාගාරය ගිනි ගෙන ඇති බව වාර්තා වනවා.

මේ අතර, රුසියානු ආක්‍රමණය හමුවේ අවතැන් වන යුක්රේන සිවිල් වැසියන් ඉවත් කිරීම සඳහා මානුෂීය කොරිඩෝවක් නිර්මාණය කිරීම සම්බන්ධයෙන් දෙපාර්ශ්වය ම අවබෝධයකට පැමිණ ඇතැයි වාර්තා වනවා.

ඊයේ පැවති දෙවන වටයේ සාකච්ඡාවලදී යි මෙම තීරණයට එළඹ ඇත්තේ.

කෙසේ වෙතත් සාකච්ඡාවලට එක්වූ යුක්රේන නියෝජිතයෙක් ප්‍රකාශ කර ඇත්තේ, රුසියාව සමඟ දෙවන වටයේ සටන් විරාම සාකච්ඡාවලින් බලාපොරොත්තු වූ ප්‍රතිඵල නොලැබුණු බවයි.

බලාපොරොත්තු වූ ප්‍රතිඵල නොලැබුණ ද සිවිල් වැසියන් ඉවත් කිරීම සම්බන්ධයෙන් දෙපාර්ශවය අවබෝධයකට පැමිණ ඇති බවයි ඔහු කියාසිටියේ.

යුක්රේන ජනාධිපති උපදේශක Mykhailo Podolyak පැවසුවේ ගැටුම් හමුවේ අවතැන්වන සහ පීඩාවට පත්වන සිවිල් වැසියන් ඉවත් කිරීමට ඉඩ සැලසීම සඳහා දෙපාර්ශවය ම තාවකාලික සටන් විරාමයක් පිළිබඳ අවදානය යොමු කළ බවයි.

ඒ අනුව අදාළ මානුෂීය කොරිඩෝව පිහිටා ඇති ස්ථානවල දී, ජනතාව ඉවත් කිරීමට අවස්ථාව ලබාදීම වෙනුවෙන් ගැටුම් නැවැත්වීමට හැකි වනු ඇති.