රාජ්ය විශ්වවිද්යාලවල මේ සිසුන්ට ළඟටම ගිහින් රු. ලක්ෂයක ශිෂ්යාධාරයක් - ඊළඟ වැඩසටහන අගෝස්තුවල
ශාරීරික සීමාවන් තම අධ්යාපන සිහිනවලට බාධාවක් කර නොගත් ශ්රී ලංකාවේ රාජ්ය විශ්වවිද්යාලවල අධ්යාපනය ලබන ආබාධ සහිත සිසුන් සඳහා ජනාධිපති අරමුදල මඟින් ක්රියාත්මක කරන “සරසවි දිරියෝ අභිමන්” සුවිශේෂී ශිෂ්යාධාර වැඩසටහනේ සමාරම්භක උත්සවය අග්රාමාත්ය ආචාර්ය හරිනි අමරසූරියගේ ප්රධානත්වයෙන් අද (11) දින පෙරවරුවේ අරලියගහ මන්දිරයේදී පවත්වා ඇත.
ඒ අනුව මෙම වැඩසටහන යටතේ මේ වන විට ශ්රී ලංකාවේ රාජ්ය විශ්වවිද්යාලවල අධ්යාපනය ලබන ආබාධ සහිත සියලුම සිසුන් ඇගයීමට ලක් කරන බව සඳහන්. එසේම එක් සිසුවෙකුට රුපියල් ලක්ෂයක එක්වරක් පිරිනමන ශිෂ්යාධාරයක් ලබාදීමට ජනාධිපති අරමුදල කටයුතු කරයි.
ඒ අනුව මෙම “සරසවි දිරියෝ අභිමන්” සමාරම්භක උත්සවයේදී ආබාධ සහිත විශ්වවිද්යාල සිසුන් 236 දෙනෙකු ඇගයීමට ලක් කෙරුණු අතර, මෙම වැඩසටහන සඳහා සුදුසුකම් ලබා ඇති සමස්ත සිසුන් සංඛ්යාව 400කට ආසන්න බව වාර්තා වේ.
එසේම කොළඹට පැමිණීමේදී මුහුණ දීමට සිදුවන දුෂ්කරතා සැලකිල්ලට ගනිමින් උතුරු, උතුරු මැද සහ නැගෙනහිර පළාත් වැඩසටහන අගෝස්තු මාසයේදී පැවැත්වීමට ද සැලසුම් කර ඇත.
මේ අතර අද (11) දින ශිෂ්යාධාර පිරිනැමීමේදී විශේෂත්වයක් වූයේ ප්රතිලාභී සිසුන් අසළටම ගොස් ශිෂ්යාධාර පිරිනැමීමයි.
මෙම “සරසවි දිරියෝ අභිමන්” වැඩසටහන, ආබාධ සහිත සිසුන්ගේ කැපවීම, හැකියාව සහ අධ්යාපන ජයග්රහණයට ජාතික ඇගයීමක් ලබාදෙන අතර, කිසිදු ශාරීරික සීමාවක් අධ්යාපන සිහිනවලට බාධාවක් නොවිය යුතු බවට රජය දරන ස්ථාවරය යළිත් තහවුරු කරන, ජනාධිපති අරමුදල මඟින් ක්රියාත්මක කෙරෙන සුවිශේෂී සමාජ සවිබල ගැන්වීමේ වැඩසටහනක් වේ.
එහිදී අදහස් දැක්වූ අග්රාමාත්ය ආචාර්ය හරිනි අමරසූරිය මහත්මිය කියා සිටියේ, සමාජයේ සියලු දෙනාට හිමි අයිතිවාසිකම් ආබාධ සහිත පුද්ගලයන්ටත් හිමි විය යුතුයි යන පදනමේ සිට වත්මන් රජය රාජ්ය ප්රතිපත්ති සකස් කරමින් සිටින බවයි.
"අද දවස අපේ රටේ ඉතිහාසයේ විශේෂයෙන්ම ජනාධිපති අරමුදලේ ඉතිහාසයේ ඉතාමත් සුවිශේෂී දිනයක්. ගත වූ වසර එකහමාරක කාලය ඇතුළත ගත් තවත් සුවිශේෂී පියවරක් අද ක්රියාත්මක වෙනවා. ජනතාවාදී ජනාධිපති අරමුදලක් ඇති කිරීමේ ප්රයත්නයේ තවත් සාර්ථක පියවරක් තැබූ දවසක් බව කිව යුතුයි. අප රටේ විශ්වවිද්යාල අධ්යාපනය ලැබීම ලේසි නැහැ. ඒක හැමෝටම ලැබෙන්නේ නැහැ. ලක්ෂ ගණනක් දරුවන් උසස් පෙළ සමත් වුණාට විශ්වවිද්යාලවලට ඇතුළත් වන්නේ ඊට සාපේක්ෂව ඉතා සුළු පිරිසක්. අද මෙහි සිටින්නේ විශ්වවිද්යාල අධ්යාපනය ලබන ඉතාම ධෛර්යයවන්ත සහ අධිෂ්ඨානශීලී පුරවැසියන් පිරිසක්. ඔබ අභියෝග ගණනාවක් ජයගෙන, දිනපතා ඒ අභියෝගවලට මුහුණ දෙමින් තමයි මෙතැනට පැමිණ තිබෙන්නේ. ඔබට යම් ඇගයීමක් කිරීමට ලැබීම ගැන සතුටු වෙනවා. ඔබ ඇත්තටම සමාජයට, රටටම ආදර්ශයක්. ඔබේ ධෛර්යයට අපි ගරු කරනවා. ආබාධ සහිත ප්රජාව සමාජයේ කොටසක්. සමාජයේ සියලුම දෙනාට හිමි අයිතිවාසිකම් ආබාධ සහිත පුද්ගලයන්ටත් අයිතියි කියන පදනමේ සිටගෙන අපේ රජය ප්රතිපත්ති සකස් කරමින් සිටිනවා. සියලු පුළුල් පරාසයන් දෙස බලා මේ විවිධත්වයන් අපේ අධ්යාපන පද්ධතිය තුළ පිළිගන්නවා කියන පණිවිඩය අපි දිය යුතුයි.
ඒ විවිධත්වයන් තුළින් ඉගෙන ගෙන ඉහළටම යන්න පුළුවන් කියන විශ්වාසය සමාජය තුළ ගොඩනැඟිය යුතුයි. විශ්වවිද්යාල පද්ධතියට ආබාධ සහිත දරුවන් ඇතුළත් කර ගත්තේ විශාල සටනකින් පසුවයි. දැන් ශිෂ්යන්ට ඕනෑම විෂයක් හැදෑරීමේ අයිතිය තහවුරු කර තිබෙනවා. ඒ අයිතිය ලබා ගැනීමට පැමිණෙන ශිෂ්ය ශිෂ්යාවන්ට බාධාවකින් තොරව අධ්යාපන කටයුතු සිදුකරගෙන යෑමට අවශ්ය වටපිටාවව සකස් කිරීම අප සියලු දෙනාගේ වගකීමක්. සෑම විශ්වවිද්යාලයකම ආබාධ සහිත සිසු සිසුවියන් වෙනුවෙන් විශේෂ ඒකක තිබිය යුතුයි. අධ්යාපනය ඩිජිටල්කරණ කාර්යසාධක බළකාය මේ පිළිබදව අධ්යයනය කළ යුතුයි. මේ සම්බන්ධව නියමු ව්යාපෘතියක් ආරම්භ කර තිබෙනවා. සියලුම විවිධත්වයන් පිළිගන්න පුළුවන් විශ්වවිද්යාල බිහි කිරීමේ වගකීම තිබෙනවා. මෙය අත්හැරි නොහැකි වගකීමක්. සමාජයේ කොටසක් මගහැර දියුණු සමාජයක් ගොඩනගන්න බැහැ. දිවයිනේ බහුතරයක් විශ්වවිද්යාලවල අධ්යාපනය ලබන, විශේෂ අවශ්යතා සහිත සිසු දරුදැරියන් 236 දෙනෙකු පළමු අදියර යටතේ අද ඇගයීමට පාත්රවෙනවා. ඔබ වෙනුවෙන් ජනාධිපති අරමුදල මගින් රුපියල් මිලියන 23.6 ක ප්රතිපාදන ලබා දෙමින් සිදු කරන මේ මහඟු කාර්යය රජය වෙනුවෙන් මම අගය කරනවා. ඔබ සමග දෙමාපියන්ටත් මම ගෞරවයක් පුද කරන්න කැමතියි. ඔබ වෙනුවෙන් ඔවුන් විශාල සටනක් කර තිබෙනවා. ඔබේ දරුවන්ගේ අනාගතය තහවුරු කිරීමට ඔබ දිවා රෑ නොබලා මහන්සි වූ බව අපි දන්නවා. ඔබ ලබන උසස් අධ්යාපනය රටේ තිරසර සංවර්ධනයට දායක කරගත හැකි පරිදි අවස්ථා නිර්මාණය කර ගැනීමටත්, ඒ සදහා අවශ්ය වෘත්තීය මඟපෙන්වීම ලබාදීමටත් රජයක් ලෙස අපි උපරිමයෙන් ක්රියා කරනවා. ඔබ රටට බරක් නෙමෙයි. ඔබ රටට වටිනා මානව සම්පතක්. ඔබ මේ සමාජයේ කොටස්කරුවන්. ඔබ තුළ තිබෙන සිහින සැබෑ වේවා කියා මම ප්රාර්ථනා කරනවා."
![රටම කළඹමින් මහා භාණ්ඩාගාරයේ අනාරක්ෂිත තත්ත්වයක් හෙළි වෙයි - කළින් තොරතුරු පිට ගිය හැටිත් COPE එකට දිගාරියි [VIDEO]](https://cdn.ibcstack.com/article/6008ce4c-21da-40c6-acb5-e6faf08b4ed8/26-6a520a41a8829-sm.webp)
![විපක්ෂ නායක සජිත් ප්රේමදාසගෙන් හදිසියේම විශේෂ ප්රකාශයක් - හේතුව මෙන්න [VIDEO]](https://cdn.ibcstack.com/article/7aa65967-68ee-4460-a5b7-6b0c10e15dd6/26-6a50ff7b4b23e-sm.webp)
![සහල් භාවිත කළ හැක්කේ ආහාර පිණිස බත් ලෙස පමණක් බවට පනවා තිබූ ගැසට් නිවේදනය ඉවත් කරයි - ජනපති [VIDEO]](https://cdn.ibcstack.com/article/f169a2ee-b84f-4e56-988b-54a11262c495/26-6a50ed3d4ca8a-sm.webp)
![ළමයි හදන්න දිරිමත් කරන්න අම්මට තාත්තට දෙන්නටම නිවාඩු දෙන්න ඕනේ දරුවෝ වැඩියෙන් ඉන්නකොට ණය පොළිය අඩු කරන්න ඕනේ - අජිත් [VIDEO]](https://cdn.ibcstack.com/article/80304919-d4e4-4bbb-bc93-5d310b21d331/26-6a50cc3b26d67-sm.webp)
![එයාව මරන්න නැත්නම් ඕන දෙයක් කරන්න මගේ කිසිම විරුද්ධත්වයක් නැහැ. මම එයාගේ මිනිය ගෙදරට ගෙනියන්නේ නැහැ - නරුම පුතාගේ දේහය භාර ගැනීම මව ප්රතික්ෂේප කරයි [VIDEO]](https://cdn.ibcstack.com/article/21ed9baf-bfcb-483f-8d23-689428584601/26-6a50b46acc990-sm.webp)
![චීනයේ කම්හලක දැවැන්ත ගින්නක් - පුද්ගලයින් 28ක් ජීවිතක්ෂයට - වීඩියෝ දර්ශන ලොව පුරා සමාජ මාධ්ය කළඹයි [VIDEO]](https://cdn.ibcstack.com/article/273404b2-24e8-46fe-b7fa-6432ea14b274/26-6a4fce6fc2c37-sm.webp)
