සංවර්ධන ව්‍යාපෘති වෙනුවෙන් ඕනෑම අවස්ථාවක මුදල් වෙන් කරනවා - ජනපති

දිස්ත්‍රික් මට්ටමින් ක්‍රියාත්මක සංවර්ධන ව්‍යාපෘති ප්‍රමාද වීම වළක්වා ගනිමින් එහි ප්‍රතිලාභ නියමිත කාලය තුළ ජනතාවට ලබා දීම අදාළ දිස්ත්‍රික්කයේ රාජ්‍ය නිලධාරින්ගේ වගකීම බවත්, යම් සංවර්ධන ව්‍යාපෘතියක් ආරම්භ කළ විට එය අවසන් කරන දිනය දක්වා ඉලක්කගත සැලැස්මක් ඔවුන් සතුව තිබිය යුතු බවත් ජනාධිපති අනුර කුමාර දිසානායක මහතා අවධාරණය කළේය.

පසුගිය කාලයේ ආරම්භ කළ සංවර්ධන ව්‍යාපෘති නියමිත කාලයට අවසන් නොකිරීම සහ ඒවායේ ව්‍යාපෘති කාලය දීර්ඝ කරමින්, ඇස්තමේන්තුගත වියදම ඉහළ නැංවීම හේතුවෙන් එම ව්‍යාපෘතින්හි ප්‍රතිලාභ මෙන්ම ආයෝජනය කරන මුදලේ ප්‍රතිලාභද රටට අහිමි වු බව අවධාරණය කළ ජනාධිපතිවරයා මේ වසරේ සිට ආරම්භ කෙරෙන සියලු සංවර්ධන ව්‍යාපෘති නියමිත දිනට අවසන් කිරීමට කටයුතු කළ යුතු බවද ප්‍රකාශ කළේය.

ඓතිහාසික මහියංගන රජමහා විහාරස්ථානයේ වාර්ෂික ඇසළ මහා පෙරහැර මංගල්‍යයට ජනපති එක් වෙයි

ජනාධිපති අනුර කුමාර දිසානායක මහතා මේ බව සඳහන් කළේ ඊයේ(06) පස්වරුවේ මොනරාගල දිස්ත්‍රික් ලේකම් කාර්යාලයේ පැවති මොනරාගල දිස්ත්‍රික් විශේෂ සම්බන්ධීකරණ කමිටු රැස්වීම අමතමිනි.   

මොනරාගල දිස්ත්‍රික්කය තුළ 2025 වසරට අදාළව විවිධ අමාත්‍යාංශ, දෙපාර්තමේන්තු හා ආයතන විසින් ක්‍රියාත්මක කරන ලද සංවර්ධන ව්‍යාපෘතිවල ප්‍රගතිය සමාලෝචනය කිරීම සහ ඉදිරි සංවර්ධන අවශ්‍යතා විමසා බැලීමද මෙහිදී සිදු කෙරිණි

ජනතාවට අත්‍යවශ්‍ය සංවර්ධන ව්‍යාපෘති වෙනුවෙන් ඕනෑම අවස්ථාවක මුදල් වෙන් කිරීමට සූදානම් බව මෙහිදී සඳහන් කළ ජනාධිපතිවරයා මහා භාණ්ඩාගාරය සතු මුදල් ගමට ගලා යාමට නම් ග්‍රාමීය සංවර්ධන ව්‍යාපෘති වේගවත් කළ යුතු බවද පෙන්වා දුන්නේය.

හිටපු ඇමතිගේ බන්ධනාගාර ජීවිත ගැන බන්ධනාගාර දෙපාර්තමේන්තුව කියන කතා

කොටියාගල, කැබිලිත්ත රක්ෂිතයේ මායිම් ලකුණු කිරීම හේතුවෙන් ගොවි බිම් අහිමි වූ ගොවීන්ගේ ගැටලුව පිළිබඳවද මෙහිදී විශේෂ අවධානය යොමු කෙරුණු අතර ගොවීන්ගේ වගා බිම් ආශ්‍රිත ගැටලු විසඳීමට විධිමත් ක්‍රමවේදයක් සකස් කරන ලෙසද ජනාධිපතිවරයා නිලධාරීන්ට උපදෙස් දුන්නේය.

දිස්ත්‍රික්කයේ විවිධ රාජ්‍ය ආයතනවල පවතින පුරප්පාඩු පිළිබඳවද මෙහිදී අවධානය යොමු කෙරුණු අතර මෙම වසරේ රාජ්‍ය සේවයට අලුතින් 62,000ක් බදවා ගැනීමට අනුමැතිය ලබා දී ඇති බවත්, අවශ්‍යතාව පරිදි එය ලක්ෂයක් දක්වා ඉහළ යනු ඇති බවත් සඳහන් කළ ජනාධිපතිවරයා ඒ යටතේ මෙම පුරප්පාඩු පිරවීමට කටයුතු කරන ලෙසද නිලධාරින්ට උපදෙස් දුන්නේය.

ප්‍රාදේශීය සභාවලට අවශ්‍ය යන්ත්‍ර සූත්‍ර ලබා දීමට මෙන්ම පළාත් පාලන ආයතන ශක්තිමත් කිරීමටද ඉදිරි අයවැයෙන් විශේෂ අවධානයක් යොමු කරන බව ජනාධිපතිවරයා පැවසීය.

වාහන ලියාපදිංචි කරාට අංක තහඩු ගන්න බෑ - මෙන්න අලුත්ම තත්ත්වය

එමෙන්ම ඇතැම් වාරිමාර්ග ව්‍යාපෘති සඳහා කෙතරම් මුදල් වැය කළද දීර්ඝ කාලයක් තිස්සේ එම ව්‍යාපෘති අවසන් වී නොමැති බව පෙන්වා දුන් ජනාධිපති අනුර කුමාර දිසානායක මහතා මහා පරිමාණ වාරිමාර්ග ව්‍යපෘති පිළිබඳ සමාලෝචනයක් සිදු කිරීමේ අවශ්‍යතාවද පෙන්වා දුන්නේය.

රාජ්‍ය ආයතනවල සිදු කෙරෙන විශාල ඉදිකිරීම් සම්බන්ධයෙන් නැවත අවධානය යොමු කළ යුතු බවත්, එම ව්‍යාපෘති සැබැවින්ම අවශ්‍යද යන්න සමාලෝචනය කළ යුතු බවත් සඳහන් කළ ජනාධිපතිවරයා දීර්ඝ කාලයක් තිස්සේ වැඩ අවසන් කර නොමැති ආණ්ඩුවේ ඉදිකිරීම්වල අවශ්‍යතාව හඳුනා ගනිමින් ඊට විකල්ප යෝජනා ඉදිරිපත් කරන ලෙසද උපදෙස් දුන්නේය.

දැදුරු ඔයේ මාළු ඇල්ලුවොත් තෑගි ගොඩයි - වැඩිම මාළුවාට සම්මානයක්

එමෙන්ම සංවර්ධන ව්‍යාපෘති ක්‍රියාත්මක කිරීමේදී ප්‍රජා පාදක සමිතිවලට කොන්ත්‍රාත් ප්‍රදානය කළ හැකි සීමාව ඉහළ නැංවීමට අනුමැතිය ලබා ගෙන ඇති බවත් ග්‍රාමීය සංවර්ධනය වේගවත් කිරීම එහි අරමුණ බවත් ජනාධිපතිවරයා පැවසීය. '

මොනරාගල දිස්ත්‍රික්කය සඳහා නගර සභාවක් නොමැතිවීම, සෙවනගල ප්‍රාදේශීය ලේකම් කොට්ඨාසය සඳහා ප්‍රාදේශීය සභාවක් ලබා දීම පිළිබඳවද මෙහිදී අවධානය යොමු කෙරුණු අතර සියඹලාණ්ඩුව ප්‍රාදේශීය ලේකම් කොට්ඨාසයේ ඉදිකළ සූර්ය බලශක්ති ව්‍යාපෘතිය හේතුවෙන් ඉඩම් අහිමි වූ ගොවීන්ගේ ගැටලුවට කඩිනම් විසදුම් ලබා දීමට මැදිහත්වන ලෙසද ජනාධිපතිවරයා නිලධාරීන්ට උපදෙස් දුන්නේය.

අද මේ ලග්න වලටනම් වාසනාව උතුරන සමාජයේ සැලකිළි වැඩිවන දවසක් - අද දවසේ ලග්න පලාපල

එමෙන්ම බුත්තල කර්මාන්ත පුරයේ බදු ඔප්පු ලබා දීමේ ප්‍රගතිය විමසා බැලුණු අතර දිස්ත්‍රික්කයේ මාර්ග සහ පාලම් සංවර්ධනය, තැලසීමියා රෝගීන් සඳහා වෙන් වූ නේවාසික ප්‍රතිකාර ඒකකය සඳහා ගොඩනැගිල්ලක් ඉදිකිරීම පිළිබඳවද සාකච්ඡා කෙරිණි.

ඌව පළාත් ආණ්ඩුකාර නීතිඥ කපිල ජයසේකර, වෙළෙඳ, වාණිජ, ආහාර සුරක්ෂිතතා නියෝජ්‍ය අමාත්‍ය ආර්.එම්. ජයවර්ධන, පාර්ලිමේන්තු මන්ත්‍රී අජිත් අගලකඩ, එච්.එම්. ධර්මසේන, රුවන් විජේවීර, සරත් කුමාර යන මහත්වරු ඇතුළු ප්‍රදේශයේ දේශපාලන නියෝජිතයන්ද, මොනරාගල දිස්ත්‍රික් ලේකම් එම්.එම්. විජේනායක මහතා ඇතුළු දිස්ත්‍රික්කයේ රාජ්‍ය නිලධාරිහු මෙම අවස්ථාවට එක්ව සිටියහ.   

රාජ්‍ය සේවයට එන්න ඉන්න හැමෝටම මෙන්න සුබ ආරංචියක්