තේ වගාකරුවන්ට සහ පැළ තවාන් හිමියන්ට දැවැන්ත සහනයක් - ලක්ෂ 10ක ආවරණයක් -අයදුම් කරන හැටි සහ කොන්දේසි මෙන්න

තේ පැළ තවාන් සහ තේ වගාවන් සඳහා නව රක්ෂණ ක්‍රමවේදයක් හඳුන්වා දීමට කෘෂිකාර්මික හා ගොවිජන රක්ෂණ මණ්ඩලය පියවර ගෙන තිබේ. මෙම වැඩසටහන යටතේ ස්වභාවික විපත් සහ වෙනත් අවදානම් හේතුවෙන් සිදුවන හානි සඳහා අක්කරයකට රුපියල් මිලියනයක් දක්වා රක්ෂණ ආවරණයක් ලබාගත හැකිය.

කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යාංශය යටතේ ක්‍රියාත්මක වන මෙම මණ්ඩලය සඳහන් කරන්නේ, තේ වගාකරුවන්ට සිදුවිය හැකි මූල්‍ය අලාභ අවම කිරීම සහ මෙරට තේ කර්මාන්තයේ සංවර්ධනය දිරිමත් කිරීම මෙම වැඩසටහනේ ප්‍රධාන අරමුණ බවයි.

ඒ අනුව, ගංවතුර, නියඟය සහ නායයෑම් වැනි පාලනය කළ නොහැකි ස්වභාවික විපත් මෙන්ම පාලනය කළ නොහැකි රෝග හා පළිබෝධ උවදුරු හේතුවෙන් වගාවන්ට සිදුවන හානි ද මෙම රක්ෂණ ක්‍රමය යටතේ ආවරණය කෙරේ.

තේ කුඩා වතු සංවර්ධන අධිකාරියේ ලියාපදිංචි වී ඇති හෝ ව්‍යාපාරයක් ලෙස ලියාපදිංචි කර ඇති තේ පැළ තවාන් සහ තේ වගාවන් සඳහා මෙම රක්ෂණ පහසුකම ලබාගත හැකිය. කෙසේ වෙතත්, ඒ සඳහා තේ පර්යේෂණ ආයතනය විසින් නිර්දේශ කරනු ලබන වගා පිළිවෙත් අනුගමනය කිරීම අනිවාර්ය වේ.

මෙම රක්ෂණ ක්‍රමවේදය යටතේ තේ පැළ තවාන් සඳහා එක් පැළයකට රුපියල් 35ක වාර්ෂික රක්ෂණ වටිනාකමක් නියම කර තිබේ. එමෙන්ම, නව තේ පැළ සිටුවීමේ සිට අස්වනු නෙළීම ආරම්භ වන තෙක් වූ වසර හතරක කාලසීමාව සඳහා තේ වගාකරුවන්ට අක්කරයකට රුපියල් මිලියනයක් දක්වා උපරිම රක්ෂණ ආවරණයක් ලබාගත හැකිය.

තේ පැළ තවාන් සහ තේ වගාවන් සඳහා අදාළ වාර්ෂික රක්ෂණ වාරිකය රක්ෂිත වටිනාකමෙන් 6%ක් ලෙස නියම කර ඇත.

ශ්‍රී ලංකාවේ විදේශ විනිමය ඉපැයීම් සඳහා සැලකිය යුතු දායකත්වයක් සපයන තේ කර්මාන්තය ආරක්ෂා කර ගැනීමත්, තේ වගාකරුවන්ට මූල්‍ය ආරක්ෂාවක් සැලසීමත් මෙම වැඩසටහන මගින් අපේක්ෂා කරන බව මණ්ඩලය වැඩිදුරටත් සඳහන් කරයි.

මෙම රක්ෂණ ක්‍රමවේදය පිළිබඳ වැඩිදුර තොරතුරු කෘෂිකාර්මික හා ගොවිජන රක්ෂණ මණ්ඩලයේ දිස්ත්‍රික් කාර්යාලවලින් හෝ 1918 ක්ෂණික ඇමතුම් අංකය ඇමතීමෙන් ලබාගත හැකිය.

ඇමෙරිකාවෙන් ඉරානයට හදිසි ලිපියක් - මැදපෙරදිග සාම සාකච්ඡා අස්සේ ලෝක වෙළෙඳපොළේ තෙල් මිල පහතට

ශ්‍රී ලන්කන් ගුවන් යානයක් අනතුරට - කුරුල්ලෙකු ගැටීම නිසා ගුවන් යානයේ දෝෂයක් - අනූනවයෙන් බේරුණු ගුවන් යානය