ජොන්ස්ටන්ට එරෙහිව තවත් නඩුවක්

හිටපු අමාත්‍ය ජොන්ස්ටන් ප්‍රනාන්දු මහතා ඇතුළු විත්තිකරුවන් තුන්දෙනෙකුට අද (08) කොළඹ මහාධිකරණය හමුවේ අධිචෝදනා පත්‍ර භාරදුනි. අල්ලස් කොමිසම විසින් ගොනු කර තිබූ තවත් නඩුවකට අදාළව කොළඹ මහාධිකරණ විනිසුරු මංජුල තිලකරත්න මහතා ඉදිරියේ එම චෝදනා භාරදෙනු ලැබීය

. අනතුරුව ජොන්ස්ටන් ප්‍රනාන්දු හිටපු අමාත්‍යවරයා ඇතුළු විත්තිකරුවන් රුපියල් 25,000/- බැගින් වූ මුදල් ඇප සහ රුපියල් ලක්ෂ 50 බැගින් වූ ශරීර ඇප දෙකක් මත මුදාහැරීමටද මහාධිකරණ විනිසුරුවරයා නියම කළේය.

එම නඩු විභාගය ඔක්තෝම්බර් 21 වනදා පැවැත්වීමටත් දින නියම විය. එම නඩුවේ සෙසු විත්තිකරුවන් ලෙස සතොස ආයතනයේ හිටපු සභාපති එරාජ් ප්‍රනාන්දු සහ එහි හිටපු ක්‍රියාකාරී අධ්‍යක්ෂවරයකු වන මොහොමඩ් සාකීර් ව නම්කර තිබේ.

2012 වසරේ වෙළෙඳ අමාත්‍යවරයා වශයෙන් කටයුතු කරමින් සතොස ආයතනයේ සේවකයින් පිරිසක් ඔවුන්ගේ නිල රාජකාරිවලින් ඉවත්කර දේශපාලන කටයුතුවල යෙදවීම තුළින් රජයට පාඩුවක් සිදුකළේ යැයි චෝදනා කොට අල්ලස් පනත යටතේ දූෂණය නැමැති වරද යටතේ අල්ලස් කොමිසම විසින් ජොන්ස්ටන් ප්‍රනාන්දු ඇතුළු විත්තිකරුවන් තිදෙනාට එරෙහිව එම නඩුව ගොනුකර තිබේ