අධ්‍යාපන ක්ෂේත්‍රයම උඩුයටිකුරු කරමින් නව අධ්‍යාපන ප්‍රතිසංස්කරණ රැසක් - නොවැම්බර්වල 1 සිට 11 ශ්‍රේණි දක්වා මාර්ගෝපදේශ මාලාවක්

අග්‍රාමාත්‍ය ආචාර්ය හරිනි අමරසූරිය විසින් නව අධ්‍යාපන ප්‍රතිසංස්කරණයට අදාළ යෝජනා සහ ප්‍රතිපත්ති රැසකට අමාත්‍ය මණ්ඩල අනුමැතිය හිමි ව ඇති බව සඳහන් කරයි.

ඇය මේ බව සඳහන් කළේ අධ්‍යාපන අමාත්‍යංශයේ ස්වේච්ඡා උපදේශක සභාව සමඟ අද(09) දින පාර්ලිමේන්තු සංකීර්ණයේදී පැවති විශේෂ සාකච්ඡාවකදීයි.

එහිදී අදහස් දැක් වූ අග්‍රාමාත්‍යවරිය,

අධ්‍යාපන ක්ෂේත්‍රයම වෙනස් කරමින් ගුරුවරුන්ට විශේෂ වෘත්තීය බලපත්‍ර සහ සහතික කිරීමේ ක්‍රමවේදයක් - බලපත්‍රය දෙන්නේ මේ ගුරුවරුන්ට පමණයි - අගමැති

"අධ්‍යාපන පද්ධතියේ ගුණාත්මක සහ ව්‍යුහමය වෙනස්කම් රැසක් සිදු කිරීම සඳහා වූ තීරණාත්මක ප්‍රතිපත්ති සහ යෝජනා ගණනාවකට අමාත්‍ය මණ්ඩල අනුමැතිය හිමිවී තිබෙනවා. විශේෂයෙන් ජාතික අධ්‍යාපන කොමිෂන් සභාව මඟින් සකස් කරන ලද අධ්‍යාපන ප්‍රතිසංස්කරණ පිළිබඳ සංකල්ප පත්‍රිකාවට, ජාතික අධ්‍යාපන ආයතනය (NIE) මඟින් ඉදිරිපත් කළ සංශෝධිත ජාතික විෂයමාලා රාමුව (National Curriculum Framework) සහ 1 සිට 11 ශ්‍රේණි දක්වා වන ශිෂ්‍ය ඇගයීම් රාමුව සඳහා අමාත්‍ය මණ්ඩල අනුමැතිය හිමි වුණා. ඒවගේම උසස් පෙළ සඳහා වන ඇගයීම් රාමුව මේ දිනවල සකස් වෙමින් පවතිනවා. ජාතික අධ්‍යාපන සභාව (Education Council) පිහිටුවීම සඳහා වන වාර්තාවත් අමාත්‍ය මණ්ඩල අනුමත කළා. ඊට අදාළ කෙටුම්පත් සම්පාදනය සඳහා අධ්‍යාපන අමාත්‍යාංශය මඟින් කමිටුවක් පත් කිරීමට ඉදිරියේදී කටයුතු කරනවා. ඒවගේම අධ්‍යාපන ක්ෂේත්‍රය ඩිජිටල්කරණය කිරීමේ ප්‍රතිපත්තිය ජාතික අධ්‍යාපන කොමිෂන් සභාවේ අනුමැතියෙන් පසුව ජනාධිපතිතුමා වෙත මේ වනවිට යොමු කර තිබෙනවා. ඉදිරියේදී එය අමාත්‍ය මණ්ඩලය වෙත ඉදිරිපත් කිරීමට නියමිතයි. පාසල් අධ්‍යාපනය තුළ ඩිජිටල් ක්ෂේත්‍රයේ සංවර්ධනය වෙනුවෙන් වසර 5ක් සඳහා රුපියල් බිලියන 96ක ව්‍යාපෘති යෝජනාවක් ඉදිරිපත් කළා ඒ සඳහාත් ප්‍රතිපත්තිමය අනුමැතිය හිමිවී තිබෙනවා."

පැලවත්තම කම්පා කළ ඉත්තෑවාගේ මරණය - මරා රැගෙන ගිය පිරිස සෙවීමට පොලිස් විමර්ශන

එසේම අග්‍රාමාත්‍යතුමිය පැවසුවේ රාජ්‍ය සහ රාජ්‍ය නොවන දෙඅංශයේම අධ්‍යාපනයේ ගුණාත්මකභාවය තහවුරු කිරීමේ (Quality Assurance) ක්‍රියාවලිය ශක්තිමත් කිරීම සඳහා උප කමිටුවක් ක්‍රියාත්මක කර ඇති අතර උසස් පෙළ අවසන් කරන සිසුන් සඳහා විශ්වවිද්‍යාල, විද්‍යාපීඨ (NCOE) සහ වෘත්තීය අධ්‍යාපන ආයතන සඳහා වෙන වෙනම අයදුම් කිරීමේදී මතුවන පරිපාලනමය ගැටලු විසඳීම සඳහා, සියලු උසස් අධ්‍යාපන විකල්පයන් සඳහා එකම ජාලයකින් අයදුම් කළ හැකි 'ඒකාබද්ධ ඇතුළත් කිරීමේ ප්‍රතිපත්තියක්' සකස් කරන ලෙස විශ්වවිද්‍යාල ප්‍රතිපාදන කොමිෂන් සභාව ඇතුළු අදාළ ආයතනවලට උපදෙස් දී ඇති බවත්, 2028 වසරේ සිට නියමු ව්‍යාපෘතියක් ලෙස එම ක්‍රමවේදය ක්‍රියාත්මක කිරීමට අපේක්ෂිත බවත් ය.

මෙහිදී අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතා සඳහන් කළේ උසස් අධ්‍යාපන ක්ෂේත්‍රයේ ඉංජිනේරු, වෛද්‍ය (පාඨමාලා සහ පශ්චාත් උපාධි) සහ කෘෂිකර්ම ක්ෂේත්‍රයන් සඳහා වන ප්‍රතිපත්ති සකස් කිරීමට විශේෂ කමිටු පත් කර ඇති බවත්, රාජ්‍ය නොවන උපාධි පිරිනමන ආයතන නියාමනය කිරීම, උපාධි පිරිනැමීමේ තත්ත්වය ලබා දීම සඳහා වූ මාර්ගෝපදේශ පිළිබඳ නව ප්‍රතිපත්තියටද අමාත්‍ය මණ්ඩල අනුමැතිය හිමිවී ඇති බවයි.

එමෙන්ම සිසුන්ගේ අන්තර්ජාල ආරක්ෂාව සහ ඩිජිටල් සුබසාධනය සඳහා වයස් කාණ්ඩ 5ක් යටතේ (1-2, 3-5, 6-7, 8-10 සහ 11-13 ශ්‍රේණි) මාර්ගෝපදේශ මාලාවක් සකස් කර ඇති බවත් ඊට අදාළ නියමු ව්‍යාපෘතිය ලබන නොවැම්බර් මාසයේදීත්, පූර්ණ ක්‍රියාත්මක කිරීම ලබන වසරේ මුලදී සිදු කිරීමට සැලසුම් කර ඇති බවත් නිලධාරීන් මෙහිදී හෙළි කර ඇත.

හෙට ලංකාවටම වෙන්න යන දේ - 1න් පසු ගිගුරුම් සහිත වැසි - ප්‍රවේශම් වන මෙන් දන්වයි

තවද (TVET) වෘත්තීය අධ්‍යාපන ක්ෂේත්‍රය, කර්මාන්ත සහ රැකියා වෙළඳපොළේ අවශ්‍යතාවලට ගැලපෙන පරිදි යාවත්කාලීන කිරීම, නව්‍යකරණය, AI තාක්ෂණය භාවිතය සහ කර්මාන්තශාලා ආශ්‍රිත පුහුණු අවස්ථා පුළුල් කිරීම සඳහා වූ සිව්වැදෑරුම් මූලෝපායික සැලැස්ම ද මෙහිදී සාකච්ඡාවට ලක් විය.

ගුරු පුරප්පාඩු අනුව කඩිනමින් ඉදිරියේදී ගුරුවරුන් බඳවා ගැනිම, ගුරු ස්ථානමාරු සිදු කිරීම ක්‍රමවත් කිරීම, පාසල් දරුවන්ගේ සනීපාරක්ෂාව තහවුරු කිරීම කඩිනම් කිරීම, පාසල් දරුවන්ගේ නිරෝගී සෞඛ්‍ය වෙනුවෙන් ක්‍රීඩා හා ප්‍රායෝගික ක්‍රියාකාරකම් සංවර්ධනය කිරීම, පාසල් දරුවන්ගේ පෝෂණය හා සෞඛ්‍ය ඉහළ නැංවීම ඇතුළු අධ්‍යාපන ක්‍රෂේත්‍රයට අඳාළ කරුණු ගණනාවක් පිළිබඳව මෙහිදී අවධානය යොමු විය.

එසේම මෙම අවස්ථාවට අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යංශයේ ස්වේච්ඡා උපදේශක සභාවේ නිලධාරීන් පිරිසක් එක් විය. 

ඉදිරි පැය 36 ගැන කාලගුණෙන් හදිසි අනතුරු ඇඟවීමක්- පළාත් රැසකට ම්.මී. 100 පැන්න තද වැසි