ජාත්‍යන්තර වෙසක් දින සැමරුම් උත්සවය වෙනුවෙන් විදෙස් අමාත්‍යවරයාගේ පණිවිඩය

​එක්සත් ජාතීන්ගේ මූලස්ථානයේ ඊකොසොක් (ECOSOC) ශාලාවේදී පැවැත්වුණු 27 වන ජාත්‍යන්තර වෙසක් දින සැමරුම් උත්සවය වෙනුවෙන් විදේශ කටයුතු, විදේශ රැකියා සහ සංචාරක අමාත්‍යවරයා විසින් වීඩියෝ පණිවුඩයක් මඟින් නිල දේශනය පවත්වන ලදී.

පූජ්‍ය භික්ෂු පඤ්ඤාකාර ස්වාමින් වහන්සේ ප්‍රමුඛ මහා සංඝරත්නය, විවිධ රටවල නිත්‍ය නියෝජිතවරුන් සහ රාජ්‍ය තාන්ත්‍රිකයින් රැසකගේ සහභාගිත්වයෙන් මෙම උත්සවය පසුගිය දා පැවැත්විණි. ​

අමාත්‍යවරයා සිය කතාව ආරම්භ කරමින්, එක්සත් ජාතීන්ගේ මූලස්ථානයේ සහ එහි සනාථිත අනෙකුත් කාර්යාලයන්හි වෙසක් දිනය ජාත්‍යන්තර වශයෙන් පිළිගැනීමට අදාළ "54/115" ඓතිහාසික යෝජනාව සම්මත වී වසර 27ක් සපිරීම නිමිත්තෙන් මෙම සභාව ඇමතීමට ලැබීම තමන්ට ලැබුණු ගෞරවයක් බව ප්‍රකාශ කළේය.

ශ්‍රී ලංකාවේ හිටපු විදේශ කටයුතු අමාත්‍ය, අභාවප්‍රාප්ත ලක්ෂ්මන් කදිරගාමර් මහතාගේ මූලිකත්වයෙන් සහ දූරදර්ශී දැක්මෙන් යුතුව ගෙන ආ මෙම යෝජනාව හේතුවෙන් ලොව පුරා මිලියන සංඛ්‍යාත බෞද්ධ ජනතාවගේ පූජනීය දිනයක් වන වෙසක් දිනයට ගෝලීය පිළිගැනීමක් හිමිවිය.

එක්සත් ජාතීන්ගේ සංසදයේදී වාර්ෂිකව පැවැත්වෙන මෙම වෙසක් දින සැමරුම මෙහෙයවීමට සහ ඒ සඳහා දායක වීමට ශ්‍රී ලංකාවට ලැබීම භාග්‍යයක් කොට සලකන බව පැවසූ අමාත්‍යවරයා, මෙම අවස්ථාව සම-සංවිධානය කිරීම පිළිබඳව තායිලන්ත රාජකීය රජයට සිය විශේෂ ස්තූතිය පුද කළේය. ​

එසේම, මෑතකදී ශ්‍රී ලංකාවට පැමිණ, සියලු සත්වයන් වෙත සාමය සහ සුභාශිංසනයේ පණිවුඩය බෙදා හරිමින් ඓතිහාසික "සාම පාගමනක" නිරත වූ පූජ්‍ය භික්ෂු පඤ්ඤාකාර ස්වාමින් වහන්සේ ඇතුළු මහා සංඝරත්නය වෙත ද අමාත්‍යවරයා මෙහිදී සිය ප්‍රණාමය පුද කර සිටියේය. ​අමාත්‍යවරයා බුදුදහමේ මූලික ඉගැන්වීම් වර්තමාන ලෝක අර්බුදයන්ට ගළපමින් දීර්ඝ විග්‍රහයක නිරත වෙමින් කියා සිටියේ, වෙසක් දිනය මඟින් බුදුරජාණන් වහන්සේගේ උපත, බුදුවීම සහ පිරිනිවීම සිහිපත් කරන බවයි.

මිනිස් මනසේ ඇති සැබෑ විභවය ලෝකයට පෙන්වා දුන් උන්වහන්සේ, අභ්‍යන්තර හා බාහිර සාමය උදාකර ගැනීම සඳහා ආර්ය අෂ්ටාංගික මාර්ගය සහ නිවන නමැති පරම සැපත පෙන්වා දුන් බවද හෙතෙම සඳහන් කළේය.

බුදුදහම යනු අසනීප හා මරණය වැනි ස්වභාවික සීමාවන්ගෙන් මෙන්ම, මිනිසා විසින්ම මවාගත් සමාජ නිර්මිතයන් නිසා ඇතිවන නිමක් නැති දුක්ඛිත සංසාර චක්‍රයට විසඳුම් සෙවීමේ ගමනක් බවද ඔහු පෙන්වා දුන්නේය. ​

සියලු මනුෂ්‍යයන්ට පොදු වන්නේ විඥානය ම බවත්, අප කවුද යන්න තීරණය වන්නේ අප විසින්ම ගොඩනඟා ගන්නා ලද සහ අභ්‍යන්තරීකරණය කරන ලද මතවාද මත බවත් බුදුරජාණන් වහන්සේ පැහැදිලි කර තිබෙන බව ඔහු ප්‍රකාශ කර තිබේ .

මෙම මතවාදයන් අප තුළ වෙන්වීමේ හැඟීමක් ඇති කරන අතර, ඒවා සමාජ සංස්ථාවන් තුළ මුල් බැසගත් විට මිනිස් ඉතිහාසයේ බහුතරයක් දුක් වේදනාවන් රාජ්‍ය, ජාතිය, කුලය, ස්ත්‍රී-පුරුෂ භාවය, වර්ණය සහ ආගම් වැනි බෙදීම් ඔස්සේ නිර්මාණය වේ.

මෙම බෙදීම්වලට ඇති දැඩි ඇමුණුම සහ උපාදානය දුකට මූලික හේතුව වන අතර, එමඟින් මිනිසුන් එකිනෙකාට එරෙහිව පෙළඹෙන තත්ත්වයන් නිර්මාණය වන බව අමාත්‍යවරයා අවධාරණය කළේය. ​

අතීතයේ සිටම බුදුදහම ලොව පුරා ව්‍යාප්ත වූ විට මිලියන සංඛ්‍යාත ජනතාව ගිහි පැවිදි දෙපාර්ශවය ලෙසම මෙම මාර්ගය අනුගමනය කරමින් නිවන් මඟ සෙවූ අතර, එම සමාජයන් සිය ජීවිත බෞද්ධ ඉගැන්වීම් වටා හැඩගස්වා ගත්හ.

ශ්‍රී ලංකාව සැමවිටම බුදුදහම ජාතික අනන්‍යතාවයේ සහ සංස්කෘතියේ හදවත බඳු කොට සලකන බව සිහිපත් කළ අමාත්‍යවරයා, වත්මන් රජය ආර්ථික සංවර්ධනය, පරිසරය, යහපාලනය සහ සමාජ සුභසාධනය සමතුලිත කරමින්, සදාචාරාත්මක සහ තිරසාර දැක්මකින් යුතුව "Clean Sri Lanka" වැඩසටහන ක්‍රියාවට නංවන බව ප්‍රකාශ කළේය. ​

හොරාගෙ අම්මගෙන් මේ ආණ්ඩුව පේන අහනවා නාමල්ගෙන් සැර කතාවක්

අවසාන වශයෙන් අමාත්‍යවරයා සඳහන් කළේ, අපගේ පොදු අරමුණු මඟින් බහුපාර්ශවීය ජාත්‍යන්තර පද්ධතිය කෙරෙහි විශ්වාසය නැවත ඇති කරනු ඇතැයි බලාපොරොත්තු වන බවයි.

එහිදී රාජ්‍යයන් එකිනෙකා අතර අදහස් හුවමාරු කරගත යුත්තේ අන්‍යෝන්‍ය අවබෝධයෙන් යුතුව වන අතර, අර්බුද හමුවේ එකඟතාවලට පැමිණීම හෝ නම්‍යශීලී වීම දුර්වලකමක් නොව ශක්තියක් ලෙස දැකිය යුතුය.

ලෝක සාමය සහ සහජීවනය උදෙසා මෙත්තා, කරුණා, මුදිතා සහ උපේක්ඛා යන සතර බ්‍රහ්ම විහරණයන් පෙරදැරි කරගෙන කටයුතු කිරීමට අප සැම මඟපෙන්වීම ලැබිය යුතුය. ​

අමාත්‍යවරයා සිය කතාව අවසන් කරමින්, ශ්‍රී ලාංකීය ජනතාව වෙනුවෙන් ලෝකවාසී සැමට අභ්‍යන්තර සාමය සහ උතුම් ශ්‍රී සද්ධර්මයේ මඟෙහි ගමන් කිරීමට ශක්තිය ප්‍රාර්ථනා කළ අතර, උතුම් වූ තෙරුවන් සරණ ප්‍රාර්ථනා කළේය.