ජනපති රනිල්ගේ නිවසට ඇතුළු වීමේ සිද්ධියට අදාළ දුරකථන අංක 99කට වෙන්න යන දේ.

පසුගිය ජූලි මස 09 වනදා ජනාධිපති රනිල් වික්‍රමසිංහ මහතාගේ පුද්ගලික නිවසට අයුතු ඇතුළු වීමක් සිදු කළ සිද්ධියට අදාළව දුරකථන අංක 99 ක් සම්බන්ධයෙන් විශේෂ විශ්ලේෂණයක් සිදු කිරීමට නියමිතයි.

ඒ බව රජයේ ජ්‍යෙෂ්ඨ අතිරේක සොලිසිටර් ජෙනරාල් හරිප්‍රියා ජයසුන්දර මහත්මිය ඊයේ 05 කොටුව මහේස්ත්‍රාත් තිළිණ ගමගේ මහතා හමුවේ දැනුම් දුන්නා.

එහිදී ඇය කියා සිටියේ, සාක්ෂිකරුවන් 662ක ප්‍රකාශ සටහන් කරගෙන ඇති බවත්, එම අවස්ථාව ආවරණය කළ රූපවාහිනි මාධ්‍ය ආයතන වල මාධ්‍යවේදීන් සහ ඡායාරූප ශිල්පීනිගේ ප්‍රකාශ සටහන් කරගෙන ඇති බවත්ය.

එමෙන්ම ජනාධිපති රනිල් වික්‍රමසිංහ මහතාගේ පුද්ගලික නිවසට ගිනි තැබූ සිද්ධියේ මෙතෙක් රක්ෂිත බන්ධනාගාර ගතව සිටි පුද්ගලයින් 6 දෙනෙක් රුපියල් ලක්ෂ පහක ශරීර ඇප මත මුදා හරින ලෙස මහේස්ත්‍රාත්වරයා නියෝග කළා.

මේ අතර අපරාධ පරීක්ෂණ දෙපාර්තමේන්තුව විසින් සිදු කරන පරීක්ෂණ සදහා සහාය ලබා දෙන ලෙස වට්ස්ඇප් සමාගමට නියෝගයක් නිකුත් කරන ලෙස අතිරේක සොලිසිටර් ජෙනරාල් වරිය සිදු කළ ඉල්ලීමට අවසර ලැබී තිබෙනවා.