සුවහසක් ශ්‍රී ලාංකිකයන්ගේ බලාපොරොත්තු දල්වමින් විදුලි බිලට කරන්න යන දේ - ඉන්ධන මිල ගැනත් තීරණයක්.. සම්පූර්ණ විස්තරය මෙතනින්.. (PHOTOS)
krishani
ජනවාරි මාසයේ සිදුකිරීමට නියමිත විදුලි ඛිල සංශෝධනයේ දී යම් ජනතාවට සහනයක් ලබා දීමට හැකි වනු ඇති බව විදුලිබල සහ බලශක්ති අමාත්‍ය කංචන විජේසේකර මහතා පැවසීය.
එම විදුලිඛිල සංශෝධනයට එකතු කළ අගය මත බද්දෙහි (VAT) කිසිදු බලපෑමක් නොමැති බව ද අමාත්‍යවරයා අවධාරණය කළේ ය.
විදුලිබල සහ බලශක්ති අමාත්‍ය කංචන විජේසේකර මහතා මේ බව සඳහන් කර සිටියේ ' ස්ථාවර රටකට සැවොම එක මහකට' මැයෙන් අද (19) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ජාවට එක්වෙමින් ය.
එහිදී වැඩිදුරටත් අදහස් දැක්වූ විදුලිබල සහ බලශක්ති අමාත්‍ය කංචන විජේසේකර මහතා මෙසේ පැවසීය.
"යෝජිත නව විදුලිබල පනත් කෙටුම්පත මේ වන විට ගැසට් කර තිබෙනවා. ඒ පිළිබඳ විවිධ අදහස් අපට මේ වන විට ලැබෙමින් පවතිනවා. එම පනත් කෙටුම්පත පිළිබඳව උනන්දුවක් දක්වන වෘත්තීය සමිති, දේශපාලන පක්ෂ, මහජන නියෝජිතයින්, විදුලි පාරිභෝගිකයන් හෝ ඕනෑම පාර්ශවයකට අදහස් හා යෝජනා ඉදිරිපත් කළ හැකියි.
එම යෝජනා හා අදහස් අද සිට ජනවාරි මස 03 වනදා දක්වා ලිඛිතව අප වෙත ඉදිරිපත් කළ හැකියි. යෝජිත නව පනත් කෙටුම්පත විදුලිබල ක්ෂේත්‍රයේ ප්‍රතිසංස්කරණ වලට සහ අනාගතය ශක්තිමත් කළ හැකි පනතක් බවට පරිවර්තනය කළ හැකි වනවා.
ඒ අනුව සියලු පාර්ශ්ව වෙතින් ඉදිරිපත් වන යෝජනා ද සැළකිල්ලට ගනිමින් සකස් කෙරෙන පනත් කෙටුම්පත ජනවාරි මාසයේ දී පාර්ලිමේන්තුවට ඉදිරිපත් කිරීමට ද අප බලාපොරොත්තු වෙනවා.
ඒ වගේම ජනවාරි මාසයේ විදුලි බිල සංශෝධනය කිරීමට බලාපොරොත්තු වනවා. දැනට උපරිම ධාරිතාවයෙන් ජල විදුලිය උත්පාදනය සිදු කෙරෙනවා.
මින් පෙර ඔක්තෝම්බර් මාසයේදී විදුලි ගාස්තු වැඩි කිරීම සිදු කළේ ෆොසිල ඉන්ධන භාවිතය හේතුවෙන් විදුලිය නිෂ්පාදනයට වැය වන අධික පිරිවැය සැළකිල්ලට ගනිමිනුයි.
කෙසේ වෙතත්, දැන් කාලගුණික තත්ත්වය වෙනස් වී තිබෙනවා, පසු ගිය මාස දෙක තුළ වර්ෂාපතනය ලැබුණු බැවින් සහ වර්ෂාපතනය තවත් සති දෙකක කාලයක් පවතිනු ඇතැයි අපේක්ෂා කරන බැවින් විදුලි ගාස්තු සංශෝධනය කළ හැකි බව ලංකා විදුලිබල මණ්ඩලය (ලංවීම) අප වෙත දන්වා තිබෙනවා.
ඒ අනුව දෙසැම්බර් මාසයේ ලංකා විදුලිබල මණ්ඩලයේ ශේෂ පත්‍ර සළකා බලා ලබන ජනවාරි මාසයේ පැවැත්වෙන මීළඟ ගාස්තු සංශෝධනයේදී යම් සහනයක් ජනතාවට ලබාදීමට හැකිවනු ඇතැයි අප විශ්වාස කරනවා.
එමෙන්ම ජනවාරියේ සිදුවන විදුලිඛිල සංශෝධනයට එකතු කළ අගය මත බද්දෙහි (VAT) කිසිදු බලපෑමක් ඇති වන්නේ නැහැ.
විදුලි ජනනය සඳහා භාවිතා කෙරෙන නැප්තා සහ ගල් අඟුරු බද්දෙන් නිදහස් නිසා විදුලි බල ක්ෂේත්‍රයට වැට් බද්ද අදාල නොවන බව පැවසිය යුතුයි.
නමුත් වැට් බද්ද ඉන්ධන සම්බන්ධයෙන් යම් බලපෑමක් ඇති කරනවා. නමුත් එම බලපෑම අවම කිරීම සඳහා ගත හැකි වෙනත් විකල්ප සම්බන්ධයෙන් අප මේ වන විට සකච්ජා කරමින් සිටිනවා. එහි ප්‍රථිපලයත් සමඟින් ජනවාරි මාසයේ දී ඉන්ධන මිල සංශෝධනය කිරීමට ද නියමිතයි.
එහිදී කිසිදු ඉන්ධන හිඟයක් ඇති වීමට ඉඩ දෙන්නේ නැහැ. මේ වන විටත් ප්‍රමාණවත් තරම් ඉන්ධන තොග අප සතුව පවතිනවා. එමෙන්ම පසුගිය නොවැම්බර් මාසයේ සහ එළඹෙන ජනවාරි මාසයේදී විදුලි ජනනය සඳහා වැය වන දැවි තෙල් ප්‍රමාණය අඩුවීම නිසා දැවිතෙල් මෙන්ම නැප්තා යන ඉන්ධන වර්ග විශාල වශයෙන් ඉතිරි වී තිඛෙනවා. පිරිපහදුවෙන් ලැබුණු නිෂ්පාදන වලින් ලංකා තොග ගබඩා පර්යන්තයේ ටැංකි පද්ධතිය උපරිම ධාරිතාවට පැමිණ තිබෙනවා.
ඒ අනුව මෙරට පවතින අතිරික්ත ඉන්ධන තෙල් සහ නැප්තා අපනයනය කිරීමට ඊයේ පැවති කැබිනට් රැස්වීමේදී අනුමැතිය හිමිවුණා.
එමෙන්ම ඇතැමුන් ඉන්දීය සූර්ය බලාගාර සහ මෙරට සූර්ය බලාගාර සමඟ සංසන්දනය කරමින් විවිධ චෝදනා එල්ල කරනවා.නමුත් ඉන්දීය සූර්ය බලාගාර සහ මෙරට සූර්ය බලාගාර සැසඳිය නොහැක.
ඉන්දියාව තමන්ගේම සූර්ය පැනල් නිෂ්පාදනය කරන රටක්.අපේ රටේ සූර්ය පැනල නිෂ්පාදනය කරන්නේ නැහැ. අපිට හැම දෙයක්ම ආනයනය කළ යුතුයි.
නිෂ්පාදන පිරිවැය සම්බන්ධයෙන් දෙරට අතර විශාල පරතරයක් පවතිනවා.එමෙන්ම සුළං බලයෙන් විදුලිය නිෂ්පාදනයේ දී ද සම්ප්‍රේෂණ රැහැන් පද්ධති සඳහා ද එම තත්ත්වය එකසේ බලපානවා." යනුවෙන් ය.
