විශ්‍රාම යන හමුදා සාමාජිකයින්ට සුපිරි රැකියා අවස්ථා - ආරක්ෂක අමාත්‍යාංශයෙන් අලුත්ම වැඩපිළිවෙළක්

ශ්‍රී ලංකා ත්‍රිවිධ හමුදාවෙන් විශ්‍රාම යන සාමාජිකයින්ට වෘත්තීය සුදුසුකම් ලබා දෙමින් දේශීය හා විදේශීය රැකියා අවස්ථා සඳහා යොමු කිරීමේ නව වැඩසටහනක් ක්‍රියාත්මක කිරීම පිළිබඳව ආරක්ෂක අමාත්‍යාංශය අවධානය යොමු කර තිබේ.

විශ්‍රාමික හමුදා සාමාජිකයින්ට පිළිගත් වෘත්තීය පුහුණුවක් ලබා දී ස්ථාවර ආදායම් මාර්ගයක් සකස් කර ගැනීමට සහාය වීම අරමුණු කරගත් මෙම වැඩසටහන සම්බන්ධයෙන්, ඔක්තෝබර් 29 වැනිදා ආරක්ෂක නියෝජ්‍ය අමාත්‍ය මේජර් ජෙනරාල් (විශ්‍රාමික) අරුණ ජයසේකර මහතාගේ ප්‍රධානත්වයෙන් පැවති සාකච්ඡාවකදී අවධානය යොමු විය.

ආරක්ෂක අමාත්‍යාංශය සඳහන් කළේ, හමුදා සේවයෙන් විශ්‍රාම ගැනීමෙන් අනතුරුව සාමාජිකයින් මුහුණ දෙන වෘත්තීය සහ ආර්ථික අභියෝග අවම කිරීම මෙම වැඩසටහනේ ප්‍රධාන අරමුණක් බවයි. විශේෂයෙන්ම තාක්ෂණික නොවන අංශවල සේවය කළ සාමාජිකයින්ට නව වෘත්තීය මාර්ග විවෘත කිරීම කෙරෙහි මෙහිදී වැඩි අවධානයක් යොමු කෙරේ.

ඒ අනුව, විශ්‍රාමික හමුදා සාමාජිකයින්ට දේශීය හා ජාත්‍යන්තර රැකියා වෙළඳපොළට පිවිසීමට අවශ්‍ය ජාතික වෘත්තීය සුදුසුකම් (NVQ) සහ අනෙකුත් පිළිගත් වෘත්තීය සහතික ලබාදීම යෝජිත වැඩසටහනේ ප්‍රධාන අංගයක් වනු ඇත.

සලකා බලමින් පවතින වෘත්තීය පුහුණු ක්ෂේත්‍ර අතරට පහත අංශ ඇතුළත් වේ.

විද්‍යුත් වාහන (EV) තාක්ෂණය සහ මෝටර් රථ ඉංජිනේරු විද්‍යාව හෝටල් කළමනාකරණය, පේස්ට්‍රි සහ බේකරි නිෂ්පාදනය රැකබලා ගැනීමේ සේවා (Caregiving) සහ පෙර පාසල් ගුරු පුහුණුව මෙකට්‍රොනික්ස්, ඉලෙක්ට්‍රොනික විද්‍යාව සහ රොබෝ තාක්ෂණය ගිනි නිවීමේ සේවා සහ පෞද්ගලික ආරක්ෂක සේවා කෘෂිකර්මාන්තය සහ රූපලාවණ්‍ය ශිල්පය මීට අමතරව, ජාත්‍යන්තර රැකියා වෙළඳපොළේ සහ සමුද්‍රීය ක්ෂේත්‍රයේ පවතින රැකියා අවස්ථා සඳහා විශ්‍රාමික හමුදා සාමාජිකයින් යොමු කිරීම කෙරෙහි ද විශේෂ අවධානයක් යොමු කිරීමට නියමිතය.

හමුදා සාමාජිකයින් සේවා කාලය තුළ ලබාගන්නා ප්‍රායෝගික දැනුම, තාක්ෂණික කුසලතා සහ වෘත්තීය අත්දැකීම් ඇගයීමට ලක් කර ඒවා NVQ හෝ ඩිප්ලෝමා මට්ටමේ සුදුසුකම් ලෙස පිළිගැනීමට ඇති හැකියාව පිළිබඳව ද සාකච්ඡා කර තිබේ.

රාජ්‍ය සේවකයින්ගේ වැටුප් ඉහළට - පහසුකම් හා දීමනා ඉහළ දැමීමක් - රාජ්‍ය සේවයට නව සේවකයන් බඳවා ගැනීම්

එමෙන්ම, දැනට ක්‍රියාත්මක හමුදා පුහුණු වැඩසටහන්, රණවිරු සම්පත් මධ්‍යස්ථානය (Ranaviru Resource Centre) සහ වෘත්තීය පුහුණු අධිකාරිය (VTA) මගින් පිරිනමනු ලබන පාඨමාලා සමඟ ඒකාබද්ධ කිරීමේ යෝජනා ද ඉදිරිපත් වී ඇත. විශ්‍රාම යාමට පෙර සිටම සාමාජිකයින්ට වෘත්තීය පුහුණුව ලබාදීම සඳහා දිවයින පුරා පිහිටි වෘත්තීය පුහුණු අධිකාරියේ දිස්ත්‍රික් මධ්‍යස්ථාන යොදා ගැනීමේ හැකියාව පිළිබඳව ද මෙහිදී අවධානය යොමු විය.

යෝජිත වැඩසටහන ක්‍රියාත්මක කිරීම සඳහා අවශ්‍ය මූල්‍ය ප්‍රතිපාදන ද ඇතුළත් විධිමත් ක්‍රියාකාරී සැලැස්මක් සකස් කිරීමට කටයුතු කරන බව ආරක්ෂක අමාත්‍යාංශය වැඩිදුරටත් සඳහන් කළේය

. මෙම සාකච්ඡාව සඳහා ආරක්ෂක අමාත්‍යාංශයේ, වෘත්තීය පුහුණු අධිකාරියේ සහ ත්‍රිවිධ හමුදාවේ ජ්‍යෙෂ්ඨ නිලධාරීන් පිරිසක් සහභාගී වූහ. යෝජිත වැඩසටහන ක්‍රියාත්මක වුවහොත්, හමුදා සේවයෙන් විශ්‍රාම ගන්නා සාමාජිකයින්ගේ වෘත්තීය අත්දැකීම් විධිමත් සුදුසුකම් බවට පරිවර්තනය කරමින් නව රැකියා අවස්ථා සඳහා යොමු වීමට අවස්ථාව සැලසෙනු ඇත.