තවත් අනිවාර්ය කිරීමක්... මෙය නැතිනම් මින් ඉදිරියට කිසිවක් නැහැ....

සියලුම ආකාරයේ බැංකු ගිණුම් විවෘත කිරීමේදී බදු හඳුනාගැනීමේ අංකය (TIN) ලබා දීම අනිවාර්ය කිරීම සඳහා 2017 අංක 24 දරන දේශීය ආදායම් පනතට අවශ්‍ය සංශෝධන ආරම්භ කිරීමේ යෝජනාව අමාත්‍ය මණ්ඩලය විසින් අනුමත කර ඇත.

බදු අයකර ගැනීම සඳහා වාර්ෂික ආදායම් සීමාව වන රුපියල් මිලියන 1.8 නොඉක්මවන ආදායමක් ඇති පුද්ගලයන්ගෙන් පවා අත්තිකාරම් ආදායම් බද්ද අයකිරීම හේතුවෙන් 2025 අප්‍රේල් 1 වන දින සිට ක්‍රියාත්මක වන පරිදි 2025 අංක 2 දරන දේශීය ආදායම් (සංශෝධන) පනත මගින් රඳවාගැනීමේ බදු අනුපාතය 5% සිට 10% දක්වා වැඩි කිරීම සඳහා නීතිමය විධිවිධාන හඳුන්වා දෙන ලදී.

තැන්පත්කරුවන් සහ අඩු ආදායම් ලබන පුද්ගලයන් අපහසුතාවයට මුහුණදෙන බව පෙනෙන බැවින් මෙම පියවර ගන්නා ලදී. ගැටලුවට විසඳුමක් ලෙස, බදු නිදහස් ආන්තිකයට වඩා අඩු ආදායමක් ඇති පුද්ගලයන් විසින් ස්වයං ප්‍රකාශයක් ඉදිරිපත් කිරීම සඳහා ක්‍රමවේදයක් හඳුන්වාදීමට යෝජනා කර ඇත.

ඒ අනුව, වාර්ෂිකව රුපියල් මිලියන 1.8 නොඉක්මවන ඇස්තමේන්තුගත ආදායමක් ඇති සියලුම දේශීය තැන්පත්කරුවන් සඳහා පොලිය මත රඳවාගැනීමේ බද්ද අයකර ගැනීමෙන් නිදහස් කිරීම සඳහා සහ සියලු වර්ගවල බැංකු ගිණුම් විවෘත කිරීම සඳහා බදු හඳුනාගැනීමේ අංකය (TIN) සැපයීම අනිවාර්ය කිරීම වෙනුවෙන් ස්වයං ප්‍රකාශනයක් හඳුන්වා දීමට 2017 අංක 24 දරන දේශීය ආදායම් පනතට අවශ්‍ය සංශෝධන සිදුකිරීම සඳහා මුදල්, ප්‍රතිපත්ති සැලසුම් සහ ආර්ථික සංවර්ධන අමාත්‍යවරයා ලෙස ජනාධිපතිවරයා විසින් ඉදිරිපත් කරන ලද යෝජනාවට අමාත්‍ය මණ්ඩලය අනුමැතිය ලබා දී ඇත.