අකුරේගොඩ ද්විත්ව ඝාතනයේ තවත් තොරතුරු රැසක් එළියට - සැකකරුවන් සියල්ල වමාරයි

තලංගම අකුරේගොඩදී නීතීඥවරයෙකු හා ඔහුගේ බිරිඳ වෙඩි තබා ඝාතනය කිරීමේ සිද්ධිය සම්බන්ධයෙන් අත්අඩංගුවට ගත් අදාළ සොහොයුරන් දෙදෙනා කඩුවෙල මහේස්ත්‍රාත් අධිකරණයට අද (17) ඉදිරිපත් කර තිබේ.

එහිදී අගතියට පත් පාර්ශවය වෙනුවෙන් ජනාධිපති නීතිඥ රියන්සි අර්සකූලරත්න සහ නීතිඥ සංගමයේ සභාපති රජීව් අමරසූරිය යන මහත්වරුන් ඇතුළු නීතීඥයන් සියයකට ආසන්න පිරිසක් අධිකරණයෙහි පෙනී සිට නමුත් විත්තිකරුවන් වෙනුවෙන් කිසිදු නීතිඥයෙකු ඉදිරිපත්වී සිටියේ නැති බව සඳහන් වේ. පසුව අදාල සැකකරුවන් දෙදෙනා පැය 48ක් දක්වා රඳවාගෙන ප්‍රශ්න කිරීමට පොලීසිය අධිකරණයෙන් අවසර ඉල්ලා සිටි අතර ඒ අනුව එයට අධිකරණයෙන් අවසර හිමිවිය.

අකුරේගොඩ ද්විත්ව ඝාතනයට සම්බන්ධ තවත් පුද්ගලයෙක් අත්අඩංගුවට

මේ අතර අදාළ ඝාතනය සඳහා භාවිත කළ ගිනිඅවි ප්‍රවාහනය කිරීම අදාළ තරුණයන් දෙදෙනාට උපදෙස් ලබාදුන් "පොල්ගස්ඕවිට ඩිලා" නැමැත්තාව බස්නාහිර දකුණ දිසා අපරාධ කොට්ඨාසය අද අත්අඩංගුවට ගත්තේය.

එහිදී 28 හැවිරිදි සැකකරු පොල්ගස්ඕවිට ප්‍රදේශයේදී අත්අඩංගුවටගත් අතර ඔහු "මෝදර නිපුන"ගේ හා "මල්වානේ ටුටූ" නැමැත්තාගේ මත්ද්‍රව්‍ය ජාවාරමේ නිරත අයෙක් බව පොලිසිය සඳහන් කරයි.

මොහුද අත්අඩංගුවට පත් වූ තරුණයන් දෙදෙනා සමග ගිනිඅවි වෙඩික්කරුවන්ට ලබාදීමට ගොස් ඇති බව විමර්ශනවලදී අනාවරණ වී ඇත. එමෙන්ම අදාළ වෙඩික්කරුවන් පැමිණි බවට සැකකෙරෙන මෝටර් රථය බද්දේගම, අගලිය ප්‍රදේශයේ පාළු ස්ථානයක ගිනිතබා තිබියදී පොලීසිය පසුගියදා සොයා ගෙන තිබේ.

ඒ අනුව අදාළ මෝටර් රථය අද පෙරවරුවේ රස පරීක්ෂක දෙපාර්තමේන්තුවේ නිලධාරීන් පරීක්ෂා කර තිබුණි. අනතුරුව සිදුවීම සම්බන්ධව බස්නාහිර දකුණු දිසා අපරාධ කොට්ඨාසය විසින් එකම පවුලේ සොහොයුරන් දෙදෙනෙක් අත්අඩංගුවට ගත් අතර ඔවුන් දෙදෙනා වෙඩික්කරුවන් භාවිත කළ ගිනිඅවි ප්‍රවාහනය කළ බවට සැකකරන බව පොලීසිය සඳහන් කරයි.

කරන්දෙණියේ සුද්දාගේ උපදෙස් මත මෝදර නිපුන හා මල්වානේ ටුටූ නැමැත්තන් මෙම ඝාතනය මෙහෙයවා ඇති බව ඔවුන්ගෙන් සිදුකළ ප්‍රශ්න කිරීම්වලදී අනාවරණ වී තිබුණි.

අකුරේගොඩ ඝාතනයට අත්අඩංගුවට ගත් අයියා මලෝ දෙන්නා අද අධිකරණයට - කරන්දෙණියේ සුද්දාගේ ඇතුළු නම් රැසක් වමාරයි

මේ අතර අදාළ සොහොයුරන් දෙදෙනා අකුරේගොඩ පිහිටි සුපිරි වෙළෙඳසැල අසල රැඳී සිටි වෙඩික්කරුවන්ට ගිනිඅවි ලබාදෙන අයුරු දැක්වෙන සීසීටීවී රූපරාමු පෙළක් නිකුත් වී ඇත.

එහි දැක්වෙන්නේ අත්අඩංගුවට පත් වූ එක් තරුණයෙකු ඔවුන් පැමිණි මෝටර් රථයෙන් බෑගයක් රැගෙනවිත් වෙඩික්කරුවන් රැඳී සිටි මෝටර් රථයට ලබාදෙන ආකරයයි.