නැවත පදිංචියත් පස්සට- වෙන් කළ අරමුදල්වලින් 82%ක්ම තාම පාවිච්චි කරලා නෑ

දිට්වා සුළි කුණාටුවෙන් පසු පුනරුත්ථාපන හා ප්‍රතිසංස්කරණ කටයුතු සඳහා ලබා දුන් අරමුදල්වලින් මේ දක්වා භාවිත කර ඇත්තේ 30%ක් පමණක් බව අනාවරණය වී තිබේ. ඒ අනුව, ඉතිරි අරමුදල් කඩිනමින් ප්‍රතිලාභීන් වෙත ලබා දෙන ලෙස ආරක්ෂක අමාත්‍යාංශය දිස්ත්‍රික් ලේකම්වරුන්ට උපදෙස් දී ඇත.

භාණ්ඩාගාර වාර්තාවලට අනුව, ගංවතුර හා නායයෑම්වලින් බලපෑමට ලක් වූ ප්‍රදේශවල වන්දි ගෙවීම් සහ යටිතල පහසුකම් සංවර්ධනය සඳහා 2026 ජනවාරි සිට ජූලි දක්වා කාලය තුළ රුපියල් බිලියන 86.7ක මුදලක් නිකුත් කර තිබේ.

එයින් වියදම් කර ඇත්තේ රුපියල් බිලියන 26.4ක් පමණක් වන අතර, රුපියල් බිලියන 60.3ක් තවමත් භාවිතයට ගෙන නොමැත.

අගෝස්තු 12 වැනිදා නිකුත් කළ ලිපියක් මගින්, ඉතිරි මුදල් ප්‍රමාදයකින් තොරව ප්‍රතිලාභීන් වෙත ලබාදීමට පියවර ගන්නා ලෙස දිස්ත්‍රික් ලේකම්වරුන්ට දැනුම් දී ඇත.

මහ බැංකු වාර්තාවෙන් සතුටු හිතෙන ආරංචියක් - කොළඹ කොටස් වෙළෙඳපොළේ කැපී පෙනෙන වර්ධනයක්

මේ අතර, බලපෑමට ලක් වූ පවුල් නැවත පදිංචි කිරීම සඳහා වෙන් කළ රුපියල් බිලියන 1.05ක මුදලින් ජූලි 31 වන විට වියදම් කර ඇත්තේ රුපියල් මිලියන 190ක් හෙවත් 18%ක් පමණි. රුපියල් මිලියන 868ක් තවදුරටත් භාවිතයට ගෙන නොමැත.

නැවත පදිංචි කිරීමේ වැඩසටහන් සහ යටිතල පහසුකම් සංවර්ධන කටයුතු කඩිනම් කිරීමේ අවශ්‍යතාව බලධාරීන් අවධාරණය කර ඇති අතර, ඒ සඳහා අමතර රුපියල් බිලියන 1.94ක ප්‍රතිපාදන ලබාදීමට අපේක්ෂා කෙරේ.

කෙසේ වෙතත්, ක්ෂණික සහන වැඩසටහන්වල ප්‍රගතිය සාපේක්ෂව යහපත් මට්ටමක පවතී. ජූලි 31 වන විට හදිසි සහන සඳහා නිකුත් කළ රුපියල් බිලියන 7.6ක මුදලින් 85%ක් ප්‍රතිලාභීන් වෙත ලබා දී තිබේ.

දිට්වා සුළි කුණාටුවෙන් බලපෑමට ලක් වූ ප්‍රදේශවල ජන ජීවිතය යථා තත්ත්වයට පත් කිරීම සඳහා අරමුදල් කඩිනමින් හා ඵලදායී ලෙස භාවිත කිරීමේ වැදගත්කම බලධාරීන් අවධාරණය කර ඇත.