ඉන්දීය ගුවන් හමුදාවෙන් ශ්‍රී ලංකාවේ අවතැන් ජනතාවට මානුෂීය ආධාර ටික මෙන්න

අයහපත් කාලගුණ තත්ත්වය නිසා ගංවතුරු හා නායයෑම්වලින් දැඩි ලෙස පීඩාවට පත්ව සිටින ශ්‍රී ලංකාවේ අවතැන් වූ ජනතාව වෙනුවෙන් ඉන්දීය ගුවන් හමුදාවට අයත් C-130J ගුවන් යානයක් මගින් ටොන් 12කට ආසන්න මානුෂීය ආධාර තොගයක් අද (29) අලුයම කටුනායක ජාත්‍යන්තර ගුවන්තොටුපළට ළඟා විය.

ඉන්දියානු රජයේ ‘සාගර් බන්ධු’ (Operation Sagar Bandhu) මෙහෙයුම යටතේ පිරිනමන මෙම ආධාරවලට කූඩාරම්, ටාපෝලින්, බ්ලැන්කට්, සනීපාරක්ෂක කට්ටල, කෑමට සූදානම් ආහාර හා අනෙකුත් අත්‍යවශ්‍ය ද්‍රව්‍ය ඇතුළත් වේ. මෙම ගුවන් යානය අලුයම 1.30ට පමණ ගුවන්තොටුපළට ගොඩබැස්සවූ අතර, ආධාර භාරදීමේ අවස්ථාවට ඉන්දියානු මහ කොමසාරිස් කාර්යාලයේ Mr. Maitrey Kulkarni (Counsellor - Development Cooperation), Lt. Col. Mandeep Singh Negi (Assistant Defence Adviser) ඇතුළු ඉන්දීය ගුවන් හමුදා නිලධාරීන් පිරිසක් සහභාගි වූහ.

මෙම ආධාර භාරගැනීම සඳහා ශ්‍රී ලංකා ගුවන් හමුදා මාණ්ඩලික ප්‍රධානී එයාර් වයිස් මාර්ෂල් ලසිත සුමනවීර මහතා ඇතුළු ගුවන් හමුදා නිලධාරීන් පිරිසක් ද සහභාගි වූ බව වාර්තා වේ.

මෙය ඉන්දියාවේ දෙවැනි ප්‍රධාන ආධාර තොගය වන අතර, පෙර දිනයේදී ඉන්දීය නාවික හමුදාවේ INS Vikrant සහ INS Udaygiri නෞකා මගින් ටොන් 6.5ක ආධාර තොගයක් ලබාදෙන ලදී. එසේම, ඉන්දීය ජාතික ආපදා ප්‍රතිචාර බලකායේ (NDRF) සාමාජිකයන් 80කට අධික පිරිසක් සහ ටොන් 8ක උපකරණ සමඟ IL-76 ගුවන් යානයක් ද මෙදින ගොඩබැස්සවූ බව ඉන්දීය ගුවන් හමුදාව නිවේදනය කළේය. මෙම සමස්ත ආධාර ප්‍රමාණය ටොන් 21කට ආසන්න වේ.

සයික්ලෝන් ඩිට්වා (Cyclone Ditwah) හේතුවෙන් ඇතිවූ ගංවතුරු හා නායයෑම් නිසා මෙතෙක් මරණ 123ක් සහ අතුරුදන් 130ක් වාර්තා වී ඇති අතර, පවුල් 12,313කට අයත් පුද්ගලයන් 43,991ක් පීඩාවට පත්ව ඇත. රාජාංගනය, බදුල්ල, නුවරඑළිය ඇතුළු ප්‍රදේශ බලපෑමට ලක්ව තිබේ.

ඉන්දීය අග්‍රාමාත්‍ය නරේන්ද්‍ර මෝදි මහතා සහ විදේශ අමාත්‍ය එස්. ජයශංකර් මහතා මෙම ආධාර පිළිබඳව සමාජ මාධ්‍ය හරහා දැනුම්දී ඇති අතර, ‘අසල්වැසි ප්‍රථම’ ප්‍රතිපත්තිය යටතේ ශ්‍රී ලංකාවට අඛණ්ඩ සහාය ලබාදෙන බව තහවුරු කළහ.