යේමන ජනාධිපති මන්දිරයට හූති මිසයිල ප්‍රහාරයක් - 5ක් මරුට අගමැති නූලෙන් බේරෙයි

යේමනයේ ඒඩන් (Aden) නුවර පිහිටි ජනාධිපති මන්දිර පරිශ්‍රයට එල්ල වූ මිසයිල ප්‍රහාරයකින් පුද්ගලයින් පස් දෙනෙකු ජීවිතක්ෂයට පත්ව තවත් 16 දෙනෙකු තුවාල ලබා ඇති බව යේමන සෞඛ්‍ය අමාත්‍යවරයා ප්‍රකාශ කර තිබේ.

යේමන රජයේ හමුදා සහ සෞදි අරාබිය ප්‍රමුඛ හමුදා සන්ධානය භාවිත කරන අල්-මාෂික් (Al-Maashiq) මන්දිර පරිශ්‍රයේ පිහිටි හමුදා අණදෙන මධ්‍යස්ථාන ඉලක්ක කර ගනිමින් මෙම ප්‍රහාරය එල්ල වී ඇත.

ප්‍රහාරයෙන් මියගිය සහ තුවාල ලැබූවන් අතර ආරක්ෂක කටයුතුවල නිරත පුද්ගලයින් මෙන්ම සිවිල් සේවකයින් ද සිටින බව යේමන සෞඛ්‍ය අමාත්‍ය කාසිම් බුහයිබේ (Qasim Buhaibeh) සඳහන් කර තිබේ.

නම් සඳහන් කිරීමට අකමැති වූ යේමන අමාත්‍යවරයෙකු උපුටා දක්වමින් ප්‍රංශ පුවත් සේවය (AFP) වාර්තා කර ඇත්තේ, ජනාධිපති මන්දිර පරිශ්‍රයේ පිහිටි අණදෙන මධ්‍යස්ථාන වෙත මෙම මිසයිල ප්‍රහාර එල්ල වූ බවයි.

අගමැතිවරයා ප්‍රහාරය හෙළා දකියි යේමන අග්‍රාමාත්‍ය ෂයා අල්-සින්දානි (Shaya al-Zindani) සිය X සමාජ මාධ්‍ය ගිණුමේ සටහනක් තබමින් ප්‍රහාරය දැඩි ලෙස හෙළා දැක තිබේ. ඔහු මෙම ක්‍රියාව “බියගුලු” ක්‍රියාවක් ලෙස හඳුන්වා ඇති අතර, සිවිල් ස්ථාන සහ සිවිල් වැසියන් ඉලක්ක කිරීම සම්බන්ධයෙන් හූති කැරලිකරුවන්ට චෝදනා කර ඇත.

ප්‍රහාරය එල්ල වන අවස්ථාවේ අගමැතිවරයා මන්දිර පරිශ්‍රය තුළ සිටියද, ඔහුට කිසිදු හානියක් සිදුවී නොමැති බව යේමන රජයේ අමාත්‍යවරයෙකු AFP පුවත් සේවයට පවසා තිබේ.

එම අමාත්‍යවරයාට අනුව, යේමන රජයේ හමුදා භාවිත කරන අණදෙන මධ්‍යස්ථානයකට මිසයිල තුනක් ද, සෞදි අරාබිය ප්‍රමුඛ සන්ධාන හමුදා භාවිත කරන තවත් මධ්‍යස්ථානයකට මිසයිල දෙකක් ද එල්ල කර ඇත.

ප්‍රහාරවලින් යේමන සහ සෞදි පාර්ශ්වයන්ට ද හානි සිදුවී ඇති බව ඔහු සඳහන් කළද, ඒ පිළිබඳ නිශ්චිත තොරතුරු අනාවරණය කර නොමැත. මේ අතර, හූති කැරලිකරුවන්ට සම්බන්ධ මාධ්‍ය වාර්තා කර ඇත්තේ, සෞදි නිලධාරීන්ගේ මෙහෙයවීම යටතේ පවතින බවට ඔවුන් චෝදනා කරන අල්-මාෂික් මන්දිරයේ හමුදා මෙහෙයුම් මූලස්ථානය ඉලක්ක කර ප්‍රහාර එල්ල කළ බවයි.

සන්ධාන හමුදාවට අයත් අවි ගබඩා ද ඉලක්ක අතර වූ බව එම වාර්තාවල දැක්වේ. යේමන රජය සටන අඛණ්ඩව ගෙන යාමට සූදානම් යේමනයේ සිවිල් යුද්ධයේ ආරම්භය 2014 වසර දක්වා දිව යයි. එම වසරේදී හූති කැරලිකරුවන් අගනුවර වන සනා (Sanaa) අත්පත් කර ගනිමින් රටේ විශාල ප්‍රදේශයක පාලනය සියතට ගත්හ.

ඊට ප්‍රතිචාර වශයෙන්, ජාත්‍යන්තරව පිළිගත් යේමන රජයට සහාය දැක්වීම සඳහා සෞදි අරාබියේ නායකත්වයෙන් යුත් හමුදා සන්ධානයක් 2015 වසරේදී මැදිහත් විය. ඉන් අනතුරුව සෞදි ප්‍රමුඛ සන්ධානය ගුවන් ප්‍රහාර මාලාවක් දියත් කළ අතර, වසර ගණනාවක් පුරා ගැටුම් අඛණ්ඩව පැවතිණි.

2022 වසරේදී සටන් විරාමයක් ක්‍රියාත්මක වුවද, යේමනයේ දේශපාලන හා ආරක්ෂක අර්බුදය මුළුමනින්ම විසඳී නොමැත. සටන් විරාමය බිඳ වැටීමත් සමඟ ගැටුම් යළිත් උත්සන්න වී ඇති බව වාර්තා වේ.

සෞදි අරාබියට එරෙහි ප්‍රහාරත් ඉහළට සෞදි අරාබියට එරෙහිව හූති කැරලිකරුවන් සිදු කරන ප්‍රහාර ඉහළ ගොස් ඇති බවට වාර්තා පළ වන පසුබිමක ඒඩන් නුවරට ද මෙම ප්‍රහාරය එල්ල වී තිබේ.

වාර්තාවලට අනුව, ඔක්තෝබර් මාසයේ මුල් භාගයේදී සෞදි අරාබියේ ගුවන් තොටුපළ ඉලක්ක කර එල්ල වූ ප්‍රහාර හේතුවෙන් අවම වශයෙන් පුද්ගලයින් 19 දෙනෙකු ජීවිතක්ෂයට පත්ව ඇත.

සෞදි අරාබිය ප්‍රමුඛ සන්ධානයේ ප්‍රකාශක තුර්කි අල්-මාලිකි (Turki Al-Maliki) රූපවාහිනී මාධ්‍ය හමුවකදී පවසා ඇත්තේ, ඔක්තෝබර් මාසය තුළ පමණක් රියාද්හි කිං කාලිඩ් ජාත්‍යන්තර ගුවන් තොටුපළ (King Khalid International Airport) ඉලක්ක කරමින් හූතිවරුන් ප්‍රහාර 20ක් එල්ල කර ඇති බවයි.

හූති කැරලිකරුවන්ට එරෙහිව ගොඩබිම් මෙහෙයුම්වල නිරත යේමන රජයේ හමුදාවන්ට සෞදි අරාබිය අඛණ්ඩව ගුවන් සහාය ලබා දෙන බව ද අල්-මාලිකි වැඩිදුරටත් සඳහන් කර තිබේ.

ඒඩන් නුවර ජනාධිපති මන්දිර පරිශ්‍රයට එල්ල වූ මෙම ප්‍රහාරය, යේමනයේ දිගුකාලීන ගැටුම තවදුරටත් උත්සන්න වීමේ අවදානම පිළිබඳ අවධානය යොමු කරවන සිදුවීමක් ලෙස සැලකේ.

සම්පත් බැංකු පාරිභෝගිකයින්ට හදිසි නිවේදනයක්

විදේශ කටයුතු අමාත්‍යාංශයෙන් හදිසි නිවේදනයක් - සෙනසුරාදා දවස්වල විදේශ ලේඛන සහතික කරගන්න වේලාව වෙන්කරගන්න හැටි මෙන්න