ගුරු -විදුහල්පති ගැටලුවට මෙන්න විසදුම...

නොවැම්බර් මස අයවැය ලේඛනය ඉදිරිපත් කිරීමට පෙර ගුරු සේවාව සංවෘත සේවාවක් බවට පත්කරන බව අමාත්‍ය අනු කමිටු සාමාජික පරිසර අමාත්‍ය මහින්ද අමරවීර මහතා පවසයි.

ගුරු - විදුහල්පති වැටුප් සම්බන්ධව පත්කරන ලද අනු කමිටුවේ වාර්තාව අමාත්‍ය මණ්ඩලයට ඉදිරිපත් කළා. ඇත්ත වශයෙන්ම ගුරු- විදුහල්පති ඉල්ලීම් සාධාරණ බව රජය වශයෙන් පිළිගන්නවා. නමුත් රටේ වර්තමානයේ පවතින ආර්ථික තත්ත්වය මත ඒ සියලුම ඉල්ලීම් එකවර ලබා දෙන්න බැරිවෙයි.

නමුත් දිගින් දිගටම ඒ ඉල්ලීම් ලබා දීම අපහසුතා කියමින් ඉදිරියට ඇදගෙන යන්නට රජය අපේක්ෂා කරන්නේත් නැහැ. උතුරේ දරුවන් ඔන්ලයින් යටතේ ඉගෙන ගන්නවා. කොළඹ උසස් පාසැල්වල හා ජාත්‍යන්තර පාසැල්වල දරුවනුත් ඹන්ලයින් යටතේ ඉගෙන ගන්නවා. ගුරුවරුන් ඔන්ලයින් අධ්‍යාපනය නැවැත්වීම නිසා අද වැඩිපුරම පහර වැදී තිබෙන්නේ ගම්වල ඉන්න අහිංසක දරුවන්ටයි. ඒ දරුවෝ මෙන්ම මව්පියන් ද ගුරුවරු නැවත ඔන්ලයින් මගින් හෝ උගන්වන තෙක් බලා ගෙන ඉන්නවා.

වැටුප් පිළිබඳ සියලු තොරතුරු විමල් වීරවංශ අමාත්‍යතුමා ඉදිරිපත් කළ නිසා මම වැටුප් පිළිබඳව ගත් තීරණ කියන්නේ නැහැ. නමුත් ඊට අමතරව ගුරු- විදුහල්පති සියල්ලන්ට ම බලපාන තීන්දු තීරණ රැසක් අපි යෝජනා කළා. ගුරු- විදුහල්පති ඉල්ලීම් 11ක් සම්බන්ධව අපි යෝජනා අමාත්‍ය මණ්ඩලයට ඉදිරිපත් කළා. ඉන් ප්‍රධාන ඉල්ලීමක් වුනේ ගුරු සේවාව සංවෘත සේවාවක් බවට පත් කරන ලෙස කළ ඉල්ලීමයි. අමාත්‍ය මණ්ඩලය ඒ යෝජනාව පිළිගත්තා. ඒ අනුව නොවැම්බර් මාසයේ අයවැය ලේඛණය ඉදිරිපත් කිරීමට පෙර ගුරු සේවාව සංවෘත සේවාවක් බවට පත් කිරීම සඳහා අදාල ගැසට් නිවේදනය පළ කරන ලෙස අධ්‍යාපන අමාත්‍යවරයාට අමාත්‍ය මණ්ඩලය විසින් උපදෙස් දුන්නා. ගුරු- විදුහල්පති වැටුප් විසමතා පිළීබඳව සොයා බැලීමට පත් කළ අමාත්‍ය අනු කමිටුවේ සාමාජික පරිසර අමාත්‍ය මහින්ද අමරවීර මහතා මෙම අදහස් පළ කළේ ඊයේ (01) රජයේ ප්‍රවෘත්ති දෙපාර්තමේන්තුවේ දී පැවැති මාධ්‍ය හමුවකට එක්වෙමිනි.

ඒ වගේම ගුරුවරුන්ට අධ්‍යාපන පරිපාලන සේවාවට මෙන්ම පරිපාලන සේවාවට යාම සඳහා මෙතෙක් පැවැති බාධක ඉවත් කිරීම සම්බන්ධවත් අපි යෝජනා කළා. පරිපාලන ව්‍යවස්ථාවන් වෙනස් කරමින් හා තිරස්ව මෙන්ම සිරස්ව එම සේවාවන්ට ඇතුළත් වීමට අවස්ථාව ලබා දීමට අපි යෝජනා කළා. . ඒ වගේම අධ්‍යාපන පරිපාලන සේවාවට බඳවා ගත යුත්තේ පාසැලක උගන්වන ගුරුවරුන්ට බවත්, ඔවුන්ට ඒ සඳහා ප්‍රමුඛත්වය ලබා දීමටත් යෝජනා කළා. විදුහල්පතිවරුන් විශාල වගකීම් සම්භාරයක් දරනවා. පාසැල තමන්ගේ ජීවිතය කර ගත් විදුහල්පතිවරු ඉන්නවා. ඔවුන් මාණ්ඩලික සේවාවට අයත් වුනත් මාණ්ඩලික සේවයේ සිටින අනිකුත් සේවාවල අයට ලබා දෙන පහසුකම් කිසිවක් විදුහල්පතිවරුන්ට ලැබෙන්නේ නැහැ.

ඒ නිසා විදුහල්පතිවරුන්ට දුරකථන දීමනාවක්, ඉන්ධන දීමනාවක්, කාර්යාල පහසුකම්, කාර්ය මණ්ඩලයක්, වැනි මාණ්ඩලික ශ්‍රේණියේ අනෙකුත් නිලධාරින් සියලු දෙනාට හිමි සියලු වරප්‍රසාද විදුහල්පතිවරුන්ට ලබා දෙන්නටත් අපි යෝජනා කළා. ඒ වගේම ගුරු වෘත්තිය සංගම්වල ඉන්න නිලධාරින්ට නිල හැඳුනුම්පතක් දැනට නැහැ. නමුත් අනෙකුත් වෘත්තිය සංගම්වල අයට හැඳුනුම්පතක් ලබා දී තිබෙනවා. එම නිසා රජය මුදල් වැය කර ගුරු සංගම් නියෝජිතයින්ට හැඳුනුම්පතක් නිකුත් කිරීමටත් අපි කටයුතු කරනවා. ඔන්ලයින් අධ්‍යාපනය සඳහා බොහෝ පාසැල්වලට පහසුකම් නැහැ.

අවශ්‍ය අන්තර් ජාල පහසුකම් වගේම අවශ්‍ය උපකරණත් නැහැ. මේවා හැම පන්ති කාමරයකටම ලබා දිය යුතු වුනත් මූළික වශයෙන් විදුහල්පති නිල කාමර සඳහා ඒවා ලබා දිය යුතු බවට අපි අමාත්‍ය අනු කමිටුව වශයෙන් යෝජනා කළා. අනික් කාරණය තමයි හැමෝම කතා කරන්නේ සුබෝධිනී කමිටු වාර්තාව සම්බන්ධයෙන්. ඒක එතරම් සාර්ථක වාර්තාවක් යැයි අපි පිළිගන්නේ නැහැ. නමුත් එහි සාධනීය කරුණු සියල්ලම අපි අවධානයට යොමු කර ගත්තා. සුබෝදිනී කමිටු වාර්තාව අනුව වැටුප් වැඩි කළොත් ඒ සඳහා ගුරුවරුන් සඳහා පමණක් මාසයකට රජයට අලුතින් රුපියල් බිලියන 71ක් වැය කරන්න සිදුවෙනවා. ඒ තත්ත්වය කිසිසේත්ම පවතින ආර්ථික තත්ත්වය මත රජයට දැරිය හැක්කක් නොවෙයි. ඒ වගේම අපි වැටුප් කොමිසම විසින් ලබා දී ඇති නිර්දේශ බැලුවා. ඒ නිර්දේශ අනුව ගුරු වැටුප් වැඩි කිරීම සඳහා ලබා දිය හැක්කේ මාසිකව රුපියල් බිලියන 08ක් පමණයි. අපි කිව්වා ඒක පිළිගන්න බැහැ. මොකද ගුරු වැටුප් සම්බන්ධව පවතින අසාධාරණයට එම මුදල කිසිසේත්ම ප්‍රමාණවත් නැහැ.

ඒ නිසා අපි වැටුප් කොමිසමේ එම නිර්දේශය බැහැර කළා. ඊට පස්සේ අපි අධ්‍යාපන අමාත්‍යාංශය විසින් දී ඇති නිරදේශය බැලුවා. එහි තිබුනේ රුපියල් බිලියන 15ක් මාසිකව වැටුප් සඳහා ලබා දිය යුතු බවට. අපි ඒකත් බැහැර කළා. ඒ අනුව අපි හදමු ක්‍රමය තුළ රටේ ආර්ථිකය ගැනත් අවධානය යොමු කර රුපියල් බිලියන 32ක් ගුරු වැටුප් ගැටළුව සඳහා මාසිකව වෙන් කිරීමට යෝජනා කළා. නමුත් ඒ මුදල වැටුප් සඳහා පමණයි. නමුත් අපි යෝජනා කළ අනෙකුත් දීමනා හා පහසුකම් සඳහාත් රුපියල් බිලියන ගණනක් වැය වෙනවා. ඒවාත් රජය විසින් වැය කළ යුතුයි.

ඒ නිසා ගුරු - විදුහල්පති ඉල්ලීම්වලට උපරිම සහන අමාත්‍ය අනු කමිටුව ඉදිරිපත් කළ යෝජනාවලියෙහි අන්තර්ගත ව තිබෙනවා. මුදල් අමාත්‍යාංශය විසින් මාසිකව අගෝස්තු හා සැප්තැම්බර් මාස දෙක සඳහා රු. 5000ක අමකර දීමනාවක් ලබා දෙන්නට යෝජනා කළේ මෙම නිර්දේශ අයවැයෙන් පසු ක්‍රියාත්මක වීම සළකා බලමිනුයි. නමුත් වෘත්තිය සංගම් ඒක ප්‍රතික්ෂේප කර තිබෙනවා. ඒකට අපේ අකැමැත්තක් නෑ.

ඒක ඒ අයගේ තීරණයක්. නමුත් අපි රජය වශයෙන් මෙන්ම ජනාධිපතිතුමා ජනාධිපතිවරණයට පෙර ඉදිරිපත් කළ සෞභාග්‍යයේ දැක්ම පරිදිත් ගුරු වැටුප් විසමතා සම්බන්ධව අවධානය යොමු කර තිබුනා. ඒ නිසා අපි ඉල්ලා සිටින්නේ ගුරුවරුන් පන්ති කාමරයට එන තෙක් අහිංසක දරුවෝ බලා ගෙන ඉන්නවා. රජය වශයෙන් අපි උපරිම වශයෙන් නම්‍යශීලි ලෙස විදුහල්පති වැටුප් ගැටළුව සම්බන්ධයෙන් පියවර අරගෙන තිබෙනවා. ඒ නිසා දරුවන්ට නැවතත් ඔන්ලයින් අධ්‍යාපනය ලබා දීම සඳහා පැමිණෙන ලෙසයි.